¿Ti yajtuump mä tuʼugë sukursal?

Familyë Betel kanäk pëkyë tuunk ttundë mä sukursal parë yajkäjpxwaʼkxyë Diosë yʼayuk mäjatyë paʼis. Tam diʼib kyäjpxnäjxtëbë ëxpëjkpajn, diʼib yajpëtsëëmdëbë rebistë, diʼib pyëjtaktëbë liibrë nyiʼak, diʼib yajpëtsëëmdëbë diskë, pelikula ets tam diʼib tiiyëm tyuundëp.

Tuʼugë Komitee diʼib mä Sukursal yëʼë yʼijxypy wiʼix tijaty yajtuny. Diʼib wyooyoʼobyë Jyobaa tyestiigëty, yëʼë të ttuknipëktë tuunk diʼib tuundëp komitee mäjatyë sukursal, diʼib duʼun tuundëp yëʼë mëjjäʼäytyëjk diʼib kajaa tijaty nyijäʼäwëdëp ets tyundë nidëgëëk o niganääk. Tyäʼädë komitee, yëʼë diʼib tyukʼawäʼänëdëp wiʼix wyimbetyë tuunk mä ja lugäär diʼib yʼijxtëp ets tijaty jotmay mbäät jyaʼʼaty. Ko duʼun yajtukʼawanëdë Diʼib wyooyoʼoytyëbë Jyobaa tyestiigëty, ta net tnijawëdë tijaty ja ëxpëjkpajn myaytyäʼägëp diʼib pëtsëmäämp ets tijaty mbäät nyaxy mä naymyujkën ets mä asamblee. Nan kyajxtëbë kyudënaabyëty, ets nëjkx tkuʼixëdë mäjatyë sukursal yajpääty ets tnëʼëmoʼoy ttuʼumoʼoytyët ja Komitee diʼib tuundëp mä Sukursal parë ttundët diʼib të yajtuknipëktë (Proverbios 11:14). Yajtukniwijtsëp ets dyajnaxët tuʼugë diskursë espesial parë yajmëjjämoʼoytyët ja nmëguʼuktëjkëtyëts diʼib tsënääytyëp mä ja it lugäär diʼib yʼijxypyë sukursal.

Yajpudëkëdë ja naymyujkën. Mä sukursal jam yajkupëky parë nyaxkëdäʼägëdë naymyujkën. Nan jam yaʼixy wiʼix kyäjpxwäʼkxtë prekursoor, misioneerë etsë sirkuitë. Ets nan jam yajtukniwitsë asamblee, ko yajkojʼyë Tëjk mäjëts nʼëxpëktë ets ko yajkexyë ëxpëjkpajn mäjatyë naymyujkën. Tukëʼëyë diʼib yajtuump mä tuʼugë sukursal, yëʼë parë myëjwindëkët mä yajkäjpxwaʼkxyë Diosë yʼAyuk (1 Korintʉ 14:33, 40).

• ¿Wiʼixë Komitee diʼib tuundëp mä Sukursal tpudëkëdë Diʼib wyooyoʼoytyëbë Jyobaa tyestiigëty?

• ¿Tijaty yajtuump mä tuʼugë sukursal?