¿Mäjëts nbëktë meeny parëts ndundë Diosë tyuunk abëtsemy nyaxwinyëdë?

Ëëtsëty, Jyobaa tyestiigëty, jëmëjt jëmëjtëts nyajpëtsëmdë ets nyajwäʼkxtëts miyonkʼamë Biiblyë ets wiinkpë ëxpëjkpajn namayʼäjtën. Nanduʼun yajkojy ets yʼaʼoyë Tëjk mäjëts nʼëxpëktë etsë sukursal. Ets nanduʼun yajmoʼoytyë gyastë pënaty tuundëp Betel ets pënaty tuundëp misioneerë, nan nbudëjkëdëbëtsë nmëguʼuktëjk ko muum tijaty yʼayoʼonbëjtaʼaky. ¿Mäjëts nbëktë meeny sentääbë parëts duʼun ndundë?

Kyajëts nʼamdowdë diesmë o meeny sentääbë. Oy kajaa tyunyë meeny mäjëts ngäjpxwäʼkxtë, per kyajtsë jäʼäy nʼamdowdë. Tam nyëjkxnë naa tuk siiglë, ko myëmajtskpë numero diʼib mä La Atalaya ojts tmaytyaʼaky ko seguurëts nʼittë ko Jyobaa yëʼë diʼibëts xypyudëjkëdëp. Ta yʼakjënany ko Diosë kyäjpn “ninäʼä meeny sentääbë tkaʼʼamdowäʼändë ets ni tkapëjktsowäʼändë jäʼäyë nyaybyudëkë”. Ets tyam duʼunën yajtuny, kyaj pën ti yaʼʼamdoy (Matewʉ 10:8).

Yëʼëts nyajtuundëbë meeny sentääbë diʼib tsojkëngyëjxm yajʼyäjkp. Mayë jäʼäy tmëjjawëdë kojëts ndukniʼʼixëdë Biiblyë ets pääty dyaktë meeny tsojkëngyëjxm. Ëëtsëty, nanduʼunëtsë nxëë ndiempë nyajtundë etsë meeny sentääbë parëts ndundë Diosë tyuunk abëtsemy nyaxwinyëdë (1 Crónicas 29:9). Mä Tëjk mäjëts nʼëxpëktë ets mäjëts ndundë asamblee tapë käjë parë pënaty tsyojkënyëʼäjttëp tʼagonëyäʼändë meeny sentääbë. O nan mbäät tkaxtë mä Internet, jw.org. Mayë jäʼäy diʼibë yäjktëp, yëʼë diʼib kyaj nëgoo ti tmëdattë, diʼib duʼun extëm ja kuʼookytyoxytyëjk diʼibë Jesus myëjkumääy ko tʼagonë majtskë meeny wyaʼxy mä ja käjë diʼib ijtp mä templë (Lukʉs 21:1-4). Oypyënëty mbäät ttukniwitsë nuʼun dyakäʼäny ja meeny, duʼun extëm ja jyot kyorasoon jyënaʼany (1 Korintʉ 16:2; 2 Korintʉ 9:7).

Ijttëbëts seguurë ko Jyobaa yëʼë diʼib yajʼyuʼkxaambyë jäʼäyë jyot kyorasoon diʼib yajmëjpëtsëmëdëp mët tijaty myëdäjttëp parë tpudëkëdët mä yajtunyë tyuunk, duʼun yajkuytyunët ti Dios të ttuknibëjtäägë (Proverbios 3:9).

• ¿Wiʼix tyëgatsyëtyë Diosë kyäjpn mëdë wiinkpë relijyonk?

• ¿Wiʼix tyuny ja meeny diʼib yajʼyäjkp tsojkëngyëjxm?