ËXPËJKËN 4
¿Pënën Jesukristë?
1. ¿Wiˈixë Jesus jyukyˈäjttsondaky?
¿Ti jäˈäyˈäjtënë Jesus yaˈijxë diˈib yajnigëxëˈkë ko ajiiky amëguˈuk? (MATEWɄ 11:29; MARKɄS 10:13-16)
Jesus tim tëgatsy mëdë naxwinyëdë jäˈäy, yëˈë jam jyukyˈajty tsäjpotm extëm tuˈugë anklës mä nety kyamaxuˈunkˈatynyëm yä Naxwiiny (Fwank 8: 23). Dios yëˈë diˈib tim jawyiin ojts dyajkojˈyë Jesus ets yëˈë pudëjkë mä tijaty dyajkojtääy. Mä Biiblyë tnigajpxy ko yëˈë “diˈibë tuˈugë Dios yˈUˈunkˈäjtypy” mët ko këˈëmë Dios ojts yajkojˈyëty (Fwank 1:14). Nanduˈun yaˈixyˈaty extëmë “Ayuk”, mët ko Tyeety yajkugajpxyˈäjtë. Käjpxë Proverbios 8:22, 23, 30 etsë Kolosʉ 1:15, 16.
2. ¿Tiko myiinyë Jesus yä Naxwiiny?
Dios kyajxë yˈUˈunk yä Naxwiiny. Yëˈë yajtëgäjtsë jyukyˈäjtën ets tpëjtaky mä María yˈuˈunk tëjk, tuˈugë kiixy diˈib judiyë. Päätyë Jesus kyaj tteetyˈajtyë naxwinyëdë jäˈäy (Lukʉs 1:30-35). Tëgëk peky jyaˈˈaty tiko Jesus myiiny yä Naxwiiny: 1) parë xytyukniˈˈixëyäˈänëm pënën Dios, 2) parë tpëjtaky tuˈugë ijxpajtën wiˈix mbäät nduˈunëmë Diosë tyuunk oy nbatëmë amay jotmay, ets 3) parë dyajkyë jyukyˈäjtën ets ojts xyjuˈuybyëtsëˈëmëm. Käjpxë Matewʉ 20:28.
3. ¿Tiko ntsojkëm nyajjuˈuybyëtsëˈëmëm?
Ko tuˈugë jäˈäy yajjuybyëtsemy yëˈë parë yˈawäˈätspëtsëmët ets kyaj yˈoogët (Éxodo 21:29, 30). Dios kyaj nety të ttuknibëjtäägë parë jäˈäy yˈoogët ets myëjjäˈäyët. ¿Wiˈix nnijäˈäwëm? Yëˈko Jyobaa të nety tˈanëëmë Adán ko pën pokytyuump ta yˈoogët, koxyëp kyapokytyuuny ninäˈäxyëp ojts kyaˈooky (Génesis 2:16, 17; 5:5). Biiblyë jyënaˈany ko oˈkën “tsyondaky” mët yëˈëgyëjxmë Adán. O ja tukpeky njënäˈänëm, Adán yëˈë tyukninäjxë yˈuˈunk yˈënäˈkë poky ets ja oˈkën. Pääty tsojkëbë nety pën xyjuuybyëtsëˈëmëm. Käjpxë Romanʉs 5:12 etsë 6:23.
Per ¿pënë nety mbäät xyjuˈuybyëtsëˈëmëm ets xyaˈˈawäˈätspëtsëˈëmëm mä oˈkën? Ko nˈoˈkëm, ta ngumëdoˈojëm ja poky. Ets kom ak pokyjyaˈay nyajpatëm, nipën mbäät xykyajuuybyëtsëˈëmëm. Käjpxë Salmo 49:7-9.
4. ¿Tiko yˈoˈkyë Jesus?
Jesus wäˈäts jäˈäy, ninäˈä kyapokytyuuny, kyaj dyuˈunëty extëm ëtsäjtëm. Pääty kyaj yëˈë tkuˈoˈkë pyoky, yëˈën kyuˈoˈkë nbokyˈäjtëm. Ko Dios tkejxyë yˈUˈunk parë xykyuˈoˈkëm, duˈun dyaˈijxë ko mëk xytsyojkëm. Etsë Jesus nan yaˈijxë ko xytsyojkëm, mët ko tmëmëdooyë Tyeety ets dyajkyë jyukyˈäjtën parë ojts xyaˈˈawäˈätspëtsëˈëmëm mä poky ets mä oˈkën. Käjpxë Fwank 3:16 etsë Romanʉs 5:18, 19.
Ixë bideo ¿Tiko yˈoˈkyë Jesus?
5. ¿Ti tyamë Jesus tyuumpy?
Ko jyukyˈajty yä Naxwiiny, yaˈˈagëdakë päˈäm jäˈäy, yajjukypyëjkë oˈkpë ets pyudëjkë pënatyë ayoodëp, duˈun ojts dyajnigëxeˈeky tijaty tyukmëduunaampy pënaty myëmëdoobyë Dios mä tiempë myiny kyëdaˈaky (Matewʉ 15:30, 31; Fwank 5:28). Ko Jesus yˈoˈky, ta Dios yajjukypyëjkë extëm tuˈugë anklës parë jyukyˈatët tsäjpotm (1 Peedrʉ 3:18). Ta netë Jesus yˈawijxy Tyeety pyëˈääy axtë koonëm yajmoˈoyët ja kutujkën parë yˈanaˈamët yä Naxwiiny (Ebreeʉsʉty 10:12, 13). Tyam, tamë Jesus yˈaneˈemy tsäjpotm etsë yˈëxpëjkpëty yëˈë nyimaytyaktëbë tyäˈädë oybyë ayuk abëtsemy nyaxwinyëdë. Käjpxë Daniel 7:13, 14 etsë Matewʉ 24:14.
Tim tsojkë Jesus dyajtunäˈänyë yˈanaˈamën diˈibë Dios të myoˈoyëty ets dyajjëjptëgoyaˈany tukëˈëyë ayoˈon ets pënaty yajjaˈäjttëp. Ets nëjkxëp jyukyˈattë agujk jotkujk yä Naxwiiny mä ja lugäärë tsujpë pënaty myëdäjttëbë mëbëjkën mä Jesus ets myëmëdoodëp. Käjpxë Salmo 37:9-11.