David kyaj tsyëˈkë

¿Ti mduumpy ko mtsëˈëgë?... Waˈan yëˈë xynyinëjkxyë mdääk o mdeety parë mbudëkëdët. Per ta tuˈugë jäˈäy diˈib mbäät nanduˈun mbudëkëty. Ets nipën duˈun kyakumëjääwëty extëm yëˈë. ¿Mnijäˈäwëp pën?... Yëˈë Jyobaa Dios. Min nˈokˈijxëm wiˈixë Biiblyë tnimaytyaˈaky tuˈugë mixyuˈunk diˈib xëˈäjt David. Yëˈë nyijäˈäwëbë nety ko Jyobaa mbäät xëmë pyudëkëty, ets pääty kyaj tsyëˈkë.

Desde ko David myutskˈäjty, ta tyääk tyeety tyukniˈˈijxë parë ttsokëdë Jyobaa. Pääty kyaj tsyëˈkë, ets ni yëˈë tkatsëˈkë diˈib oypyënëty atsëˈëgëdëp. David nyijäˈäwëbë nety ko yëˈë mëdë Jyobaa nyaymyayëty ets ko mbäät pyudëkëty. Tëgok, tamë netyë David byorreegë kuentˈaty ko tuˈugë mëj kää myiiny ets ojts yajtsëëmgeˈeky tuˈugë byorreegë. ¿Mnijäˈäwëp ti David tyuun? Pyatsoˈon, ¡ets waˈan dyaˈoˈky ja kää mëdë yˈää kyëˈë! ¡Nan ojts dyaˈooky tuˈugë osë ko jatëgok yajtsëëmgekyë byorreegë! ¿Pëndaa diˈibë David pudëjkë?... Yëˈë Jyobaa.

David ojts jatëgok dyaˈixyëtyë jotmëkˈäjtën ko ja israelitëty tsyiptuundë mët ja filisteety. ¡Ja filisteety tamë nety tuˈugë syoldäädë tmëdattë diˈib jantsy päjkˈyeny, diˈib xëˈäjt Goliat! Tyäˈädë soldäädë jeˈeyë nety tnëxiˈiky ttukxiˈiky ja israelitëty ets nanduˈunë Jyobaa. Jyënaˈany: ¡Aber pën okjotmëktakp tsyiptunët mët ëjts! Niˈamukë ja israelitë aktsëˈkëdëp, nipën tkawinguwäˈägëyaˈany. Ko David duˈun tmëdooy, ta tˈanmääyë Goliat: ¡Ëjts tsiptunäämp mëët mijts! Jyobaa yëˈëjëts diˈib xypyudëkëyäämp, ¡ets tyamëts mijts nyajkëdawäˈäny! ¿Këdii jantsy jotmëkë David yˈijty?... Duˈun, jotmëk yˈijty. ¿Ti net tuun jäjtë?

Ta David ojts tmëtsoony ja tyiˈpxn ets mëgoxkë tsää tëˈkxatypyë, ta ojts tninëjkxy ja Goliat parë mëët tsyiptunäˈäny. Ko Goliat tˈijxyë David mutsknëm, ¡ta jeˈeyë tnëxiky ttukxiky! Perë David ta yˈanmääyë: ¡Mijts xynyiminyëts mëdë mˈespäädë, per mijts ninëjkxy xyëëgyëjxmë Jyobaa! David ta ojts tpëjtaˈaky tuˈugë tsää mä ja tyiˈpxn, tnibëyëˈktsoˈony ja Goliat ets ta tjëduuy ja tyiˈpxn. ¡Ta ja tsää tyëjkë wyimbokoty! ¡Goliat ta jyëbijpkëdaky ets yˈoˈky! Ko ja filisteety duˈun tˈijxtë, ta tsyëˈkëdë ets kyaktääytyë. Per ¿wiˈix tuˈugë mixyuˈunk extëmë David dyajjëbijpkëdaky tuˈugë päjkˈyeny jyaˈay?... Yëˈko Jyobaa pyudëjkë, ¡pesë Jyobaa mas kumëjää ets kyaj dyuˈunëty nituˈugë päjkˈyeny jyaˈay!

¿Ti mdukniˈˈijxëp extëmë David yajnimaytyaˈaky?... Ko nipën duˈun kyakumëjääwëty extëmë Jyobaa. Pääty pën ja näˈä mtsëˈëgë, jamyats ko Jyobaa yëˈë mëët mnaymyayëty ets yëˈë mbudëkëyanëp parë mˈitët amëk jotmëk.