Jeremías nyimaytyakˈadëtsë Jyobaa

Ko jäˈäy ndukmëtmaytyakëmë Jyobaa, ta nääk xytyukxikëm o xytyukjotˈambëjkëm. Ko duˈun njäjtëm, ta axëëk nnayjäˈäwëm, ¿këdii? Ets mbäät nwinmäˈäyëm: “Kyajtsë Jyobaa nekynyimaytyäˈägäˈäny”. ¿Të näˈä duˈun mjaty?... Biiblyë myaytyakypy tuˈugë mixy diˈib tsyojkë Jyobaa ets xëmë tnimaytyaky, per ja waanë tyäˈädë tuunk tkamastuty. Ja txëˈäjty Jeremías. Min nˈokˈijxëm wiˈix jyajty.

Ko Jeremías yaˈkpëtsëëmy, ta Jyobaa yˈanmääyë ets nëjkxë jäˈäy tˈanëëmë parë kyaj tnekytyundëdë axëkˈäjtën. Jeremías tsip tˈijxyë tyäˈädë tuunk, ta tsyëˈkë. Pääty tˈanmääyë Jyobaa: Ëjts mutsknëmëts, ets kyajts nnijawë wiˈixëts nˈanëëmëdët. Perë Jyobaa ta yˈanmääyë: Kyaj mtsëˈëgët. Ëjts mijts nbudëkëyaampy.

Ta Jeremías tyëjkë tuumbë ets tˈanmääy ja jäˈäyëty: Pën kyaj mnayajtëgatsëdë, ta myajtukumëdowäˈändë. ¿Ojtsëdaa Jeremías yajmëmëdoy?... Kyaj. Jeˈeyë yajnëxiky yajtukxiky ets jyantsy yajtukjotˈambëjky. Nääk ¡axtë yaˈoogandë ja Jeremías! ¿Wiˈixëdaa nyayjäˈäwë?... Mëk tsyëˈkë ets jyënany: Kyajts nekynyimaytyäˈägäˈänyë Jyobaa. Per ¿ojtsëdaa yˈëxtëkëwaˈaky?... Kyaj yˈëxtëkëwaˈky. Jeremías mëk ttsejkyë Jyobaa, pääty tnimaytyakˈadëtsy. Ets kom kyaj yˈëxtëkëwaˈky, ta Jyobaa yaˈˈawäˈätspëtsëëmë.

Extëm tëgok, ojtsë axëkjäˈäy kyujëduwëdë mä tuˈugë këk jut parë jap myoˈontsjëënët. Ets nan kyaj yajmooyë nëë ets ni käˈäy ukën. ¡Ja axëkjäˈäyëty yëˈë nety tsyojkëp etsë Jeremías jap yˈoogët! Perë Jyobaa ta dyajtuunyë jäˈäy parë yajjuudët.

¿Ti mdukniˈˈijxëbë yˈijxpajtënë Jeremías?... Ko xëmë tnimaytyakyë Jyobaa, oy näˈäty tsyëˈkë. Ko mijts xynyimaytyäˈägëdë Jyobaa, mbäädë jäˈäy mdukxiˈigyëty o mdukjotˈambëkyëty, mbäät mtsoytyuny o axtë mtsëˈëgë. Per pën xëmë xynyimaytyaˈaky, Jyobaa yëˈë mbudëkëyanëp extëm tpudëjkë Jeremías.