Jesus xëmë myëdooy

¿Tsip xyjawë xymyëmëdowëdë mdääk mdeety?... Näˈäty tsiptakp. ¿Per mnijäˈäwëp ti mbäät mbudëkëty parë mmëdowët? Yëˈë Jesusë yˈijxpajtën. ¿Mnijäˈäwëp ko Jesus xëmë tmëmëdooyë Jyobaa ets ja tyääk tyeety?... Min nˈokˈijxëm wiˈix yajnimaytyäˈägäˈäny.

Mä netyë Jesus kyaminyëm yä Naxwiiny, jamë nety tsyëënë tsäjpotm mëdë Tyeety, Jyobaa. Perë Jesus nan myëdäjtë tyääk tyeety yä Naxwiiny. Ja tyeety txëˈäjty José etsë tyääk María. ¿Mnijäˈäwëp wiˈix ko yëˈë ttääkˈäjty tteetyˈajty?...

Jyobaa yëˈë yajtëgäjtsë Jesusë jyukyˈäjtën jam tsäjpotm ets ojts tpëjtaˈaky María jyodoty parë myaxuˈunkˈatët yä Naxwiiny. ¡Yëˈë tuˈugë mëjˈäjtën diˈibë Dios tyuun! Jesus ta yeˈky María jyodoty extëmë maxuˈunk yaaktë tyääk jodoty. Ets ko nyajxy taxtujk poˈo, ta myaxuˈunkˈäjty. Duˈunë Jesus yä Naxwiiny ttääkˈäjtyë María ets tteetyˈajtyë José.

Ko netyë Jesusë jyëmëjt 12, ta dyajnigëxëˈky ko mëk ttsekyë Jyobaa diˈib Tyeetyˈajtypy. Jamë nety të nyijkxy Jerusalén mëdë fyamilyë parë tˈawdatäˈändë Jyobaa. Per ko ojts jyëmbijnëdë, ta José mëdë María tˈijxpattë tuˈääy ko kyaj mää ja Jesus, ta tˈëxtääytyë ets kyaj mä tpattë. ¿Mnijäˈäwëp ti net tyuundë?...

Ta jyëmbijttë jantsy jotëgoy Jerusalén parë tˈëxtäˈäyäˈändë Jesus. Ta jyotmaytyuktëjkëdë ko kyaj mä tpattë. Per ko nyajxy tëgëk xëë, ¡ta tpattë mä ja Diosë tyëjk! ¿Tiko Jesus ojts nyijkxy mä Diosë tyëjk?... Yëˈko mbäädë nety jap niˈigyë yajtuknijawë pënën Tyeetyˈajtypy. Jesus tsyejpyë netyë Jyobaa ets nyijawëyaambyë nety wiˈix dyajjotkujkˈatët. Axtë ko ojts yaˈkˈabajnë duˈunyëm tmëmëdooyë Jyobaa. Jesus xëmë myëdooy oy ojts tsyiptakxëty ets oy tkuˈayoˈowë. Per ¿nan myëmëdoodaa José mëdë María?... Biiblyë jyënaˈany ko myëmëdoo.

¿Ti mdukniˈˈijxëbë yˈijxpajtënë Jesus?... Ko mijts nan tsojkëp xymyëmëdowëdë mdääk mdeety, oy näˈäty mtsiptakxëdët. ¿Mdunaampy duˈun?...