Ja tëgëëkpë ayoˈon diˈib jawyiin yajkajx

Ja israelitëty yajtuumbëˈäjt yajmosëˈäjttëbë nety. Jyobaa ta tkejxyë Moisés etsë Aarón parë duˈun nëjkx tˈanëëmëdë faraon: “Kajxkëtsë ngäjpn parëts nëjkx xyˈawdaty mä ja lugäärë äänëˈëk tëëtsëˈëkpë”. Ja faraon kom jantsy mëj këjxm nyayjawëty, ta yˈatsooy: “Tits nguentëty wiˈixë Jyobaa jyënaˈany. Kyajts ngaxäˈänyë israelitëty”. Ko duˈun jyënany, ta faraon mas niˈigyë ttuunkmooy ja israelitëty. ¿Ti net tyuunë Jyobaa? Ta tkejxy mäjkë ayoˈon jap Egipto. Jyobaa ta tˈanmääyë Moisés: “Faraón kyajts xytyimmëjpëjtaˈaky. Jopyëp nyëjkxäˈäny mä mëjnëë diˈib xyëwˈäjtypy Nilo. Nëjkx ets anëëmë ko tadë nëë jyëmbitäˈäny ak neˈpyny, mët ko kyaj të tkexy ja ngäjpnëts”. Moisés ta duˈun ttuuny ets ojts tninëjkxy ja faraon. Ja faraon yˈijx wiˈixë Aarón twopy ja nëë mëdë tyäjk ets ta ja nëë jyëmbijty neˈpyny. Ta ja nëë axëëk jyantsy xyuˈkpëjky, kyaj nety mbäät pën tˈuuky ets oˈktääy ja äjkx. Perë faraon kujuundak ets kyaj tkejxy ja israelitëty.

Ko nyajxy jëxtujk xëëw, ta Jyobaa jatëgok tkejxyë Moisés mä faraon parë duˈun tˈanëëmët: “Pën kyaj xykyexyë ngäjpnëts, ta tyäˈädë käjpn tyuktukäˈäny mëdë nootsy”. Komë faraon kyaj tmëjpëjtaky, ta Aarón tkäjptëëy ja tyäjk ets ta tukëˈëyë ja paˈis tyuktujky mëdë nootsy. Ta ja nootsy tyëjkëdë oytyim määjëty, extëm jënoty tëgoty, mä wëëty mabajn ets tsimoty texyoty. Ta ja faraon tˈanmääyë Moisés: “Anëëmë Jyobaa waˈan jaayë dyajwëˈëmyë tyäˈädë ayoˈon netëts ngaxëdë israelitëty”. Ta Jyobaa ojts dyajnaxyë tyäˈädë ayoˈon ets ja Egipto jäˈäy dyajtuˈukmujktääytyë ja nootsyˈooky. Ta ja käjpn xyuˈkpëjky, per ta jatëgokë faraon kyaj tkejxy ja israelitëty.

Ok, ta Jyobaa tˈanmääyë Moisés: “Waˈanë Aarón twopyë nax mëdë tyäjk. Ko duˈun ttunët, ta naxway jyëmbitäˈäny jääm tsukts”. Ets duˈunën tyuun jyäjtë, may jyantsy myiiny ja jääm tsukts ets kyaj ja jäˈäy yajjotkujkˈäjtëdë. Ta nääk ja Egipto jäˈäy tˈanmääytyë faraon: “¡Tyäˈädë ayoˈon yëˈë yajmiimbyë Dios!”. Per ja faraon niwiˈixtsoo tkakejxy ja israelitëty.