Tuˈugë burrëtoˈoxy kyajpxy

Ja israelitëty naa 40 jëmëjtë nety kujk tsyënääyëdittë mä ja lugäärë äänëˈëk tëëtsëˈëkpë, ets të nety tjaˈabëktë kanäägë nax käjpn diˈib kumëjääw. Ko jyäjttë mä yˈajoyë Moab, diˈib jatsoo yajpatp mä Jordán mëjnëë, ta ojts nyaynyikojëdë. Jawaanë nety yˈaktëgoyˈaty parë tyëkëdët mä ja Nax diˈib Yajtukwandaktë. Balac, diˈib anaˈam Moab, tsëˈkë ko ja israelitëty pyëjkxëdët ja nyax. Pääty tˈanmääy tuˈugë yetyëjk diˈib xyëwˈäjt Balaam parë nyëjkxët Moab ets nëjkx ttuknikäjpxpetyë ayoˈon ja israelitëty parë axëëk jyat kyëbattët.

Perë Jyobaa ta tˈanmääyë Balaam: “Kyaj mbäät xytyuknikäjpxpetyë ayoˈon ja israelitëty”. Päätyë Balaam kyaj nyëjkxany Moab. Ta jatëgokë rey Balac nyigajxë ets yˈanmääyë ko yajmoˈoyäämp ti yëˈë tyim tsyojkypy, perë Balaam kyaj ojts nyijkxy. Ta netë Dios yˈanmääyë: “Tyam nmoˈoyë permisë parë mnëjkxët. Per duˈun xyˈanëëmët extëm yam nˈanëëmëyaˈany”.

Ta ja Balaam ojts nyijkxy burrëkëjxy Moab parë nëjkx ttuknikäjpxpatäˈänyë ayoˈon ja israelitëty, oyë netyë Jyobaa të jyaˈˈanëˈëmxëty ko kyaj duˈun yˈadëˈëtsët. Ta Jyobaa yˈanklës tëgëkˈok kyëxëˈky tuˈääy. Balaam kyaj tˈijxy ja anklës, per ja burrë yˈijx. Tim jawyiin, ta ja burrë tjëjpˈyoˈoytyuty ja tuˈu ets wiinktsoo ojts kyuyoˈoyë. Ok, ta ja burrë myëjˈyoˈoybyejty potsywyinm ets tjantsy yajwingoˈtsë ja tyekyë Balaam. Ets tim ok, ta ja burrë nyaygyoˈkë tuˈu itkujky. Ta Balaam tjantsy kyepywyojpy ja byurrë koogoo duˈun yˈadëtsy.

Ta Jyobaa ojts dyajkajpxy ja burrë. Ta ja burrë dyajtëëyë Balaam: “¿Tikots xywyopy?”. Ta Balaam yˈatsoowë: “Yëˈkots xytyimˈixy tsuu lokë. Koxyëbëts nˈokmëdaty tuˈugë espäädë, nyaˈoˈkypyxyëp”. Ta ja burrë yˈatsoowë: “Kanäk jëmëjtëts kujk xytyukˈuˈunyë, ¿të näˈä duˈun nˈoktuumbë?”.

Taanëmë netë Jyobaa ttukˈijxyë Balaam ja anklës. Ta ja anklës yˈanmääyë: “Jyobaa të mˈanëˈëmxëty ko kyaj nëjkx xytyuknikäjpxpetyë ayoˈon ja israelitëty”. Balaam ta yˈatsooy: “Tëts njantsy tyëgoy, oy kots njëmbitët mätsë ndëjk”. Per ja anklës ta yˈatsoowë: “Mbäät mnëjkxy Moab, per duˈun nëjkx myajkajpxynyaxy extëmë Dios të mˈanëˈëmxëty”.

Wiˈix mˈokwinmay, ¿tyuunëdaa duˈunë Balaam? Kyaj, yëˈko tëgëkˈok tjatuknikäjpxpatanyë ayoˈon ja israelitëty. Perë Jyobaa yëˈë yajtuun parë ttuknikäjpxpatët tëgëkˈok ja oyˈäjtën. Ok, ta ja israelitëty dyajkutëgooytyë Moab, ets ta Balaam yˈoˈky. ¿Këdii mas oyxyëp ko Balaam tmëmëdooyë Jyobaa ko tim jawyiin duˈun yˈanmääyë?