Ana ojts tˈamdoyë Jyobaa tuˈugë yˈuˈunk

Elcaná yëˈë nety tuˈugë israelitë jäˈäy ets nimajtskë kyudëjk: Ana etsë Peniná. Per yëˈë nety mas tsyojkypyë Ana. Peniná nimayë netyë yˈuˈunk yˈënäˈk, perë Ana nituˈuk. Päätyë Peniná tnëxiky ttukxikyë Ana. Jëmëjt jëmëjt ijtyë Elcaná tmënëjkxyë fyamilyë jam Siló parë tˈawdattë Jyobaa mä tabernakulo. Tëgok, ko nety jam yajpäättë, ta Elcaná tpëjkyë kuentë ko Ana mon tuk nyayjawëty. Pääty tˈanmääy: “Ana, tunë mayˈäjtën këdii mjëˈëy myaˈaxy. Tyääts ëjts, ets mëk ntsoky”.

Ok, ta Ana ojts naytyuˈuk nyijkxy nuˈkxtakpë ets duˈunyëm jyëëy yaxy, ta tmënuˈkxtakyë Jyobaa parë pyudëkëdët ets ttukwandaky: “Jyobaa, pën xymyoobyëts tuˈugë nmäänguˈunk, mijts nmoˈoyaampy parë mëdunëdët nuˈunë xyëëw jyukyˈäjtën”.

Elí ja saserdotë wintsën, yˈijx ko Ana jyëˈëy yaˈaxy ets jeˈeyë dyajˈyuˈkxyë yˈadaam, ta wyinmääy ko mukëbë nety. Ana ta ttukmëtmaytyaky: “Kyaj wintsën, kyajts nmuˈugyëty. Nmëdäjtypyëts tuˈugë mëj jotmay ets yëˈëtsë netyë Jyobaa ndukmëtmaytyakypy”. Ta Elí tpëjkyë kuentë ko të nety kyäjpxtëgoy ets ta tˈanmääyë Ana: “Waˈanë Jyobaa mmoˈoyëty diˈib të xyˈamdoy”. Ana, ta jyotkujkëtyaay ets ta ojts tsyoˈonë. Kyajnëmë nety yˈabety tuk jëmëjt, ko Ana tpaty tuˈugë myäänguˈunk ets ja txëëwmooy Samuel. ¿Mbawinmaapy wiˈixë Ana jantsy jotkujk nyayjäˈäwë?

Ana kyaj tjäˈäytyëgooy ti netyë Jyobaa të ttukwandaˈaky. Pääty jantsy jeˈeyë Samuelë tsyiˈtsk tmastuty, ta ojts yajwoonëjkxy mä ja tabernakulo parë jam tmëdunëdë Jyobaa. Ana ta tˈanmääyë Elí: “Yëˈëtsë Jyobaa nmënuˈkxtak parëts xymyoˈoyëdë tyäˈädë mixyuˈunk, tyamëtsë net nmoˈoy parë myëdunëdët nuˈunë xyëëw jyukyˈäjtën”. Elcaná mëdë Ana, jëmëjt jëmëjt ijty tninëjkxtë Samuel ets tmënëjkxëdë tuˈugë wyit diˈib këtuk. Ok, ta Ana tˈakpaty nidëgëëgë myäänk ets nimajtskë nyëëx, yëˈë Jyobaa aktukumääyë.