David etsë Saúl

Ko netyë David të dyaˈoogyë Goliat, ta rey Saúl wyinˈijxë parë yëˈë tniwintsënˈatët ja tsiptuumbëty. David kanäkˈok myadaky mä tsyiptuundë ets oypyënëty yˈixyˈäjtë. Koogoo ijty jyëmbity mä ojts të tsyiptundë, ta ja toxytyëjkëty jyëjpadëˈëgëdë, jyantsy yˈats jyantsy pyuttë ets yˈëw yäˈäxtë: “Saúl të tmëmadaˈaky milˈamë myëtsip, perë David të tmëmadaˈaky mäjk milˈam”. Päätyë Saúl tˈaxëkˈijxtsondakyë David ets tjayaˈoogany.

David jantsy oy ijty ttukkoyë arpë. Tëgok, tamë netyë David ttukkoyë arpë, ko ja Saúl tyukjëduuwë ja lyansë. Perë David ta tˈagooduty ets ja lansë myëkuˈpejty potsywyinm. Desde jaa Saúl kanäkˈok tjayaˈooganyë David. Ok, ta David kyeky ets ojts nyayuˈutsyëty mä lugäärë äänëˈëk tëtsëˈëkpë.

Ta netë Saúl mët nidëgëk milë syoldäädë tpatsoˈonyë David. Saúl ta tyëjkë mä tuˈugë äänk mä netyë David mëdë syoldäädëtëjk të nyayuˈutsëdë. Ta ja syoldäädëtëjkë David ayuˈutsy ameˈtsyë yˈanmääyë: “Tyam mbäädë net xyaˈoogyë Saúl”. David, ta tmëwingoonyë Saúl ets ojts tputsujkë tukpedasë ja wyit, Saúl kyaj tpëjkyë kuentë. Per ok, ta David axëëk jantsy nyayjäˈäwë, yëˈko kyaj nety të tmëjˈixy ja rey diˈibë Jyobaa wyinˈijx. Päätyë David kyaj tnasˈijxë ets ja syoldäädëtëjk tnibëdëˈëktëdë Saúl. Ko Saúl pyëtsëëmy äängoty, ta David ojts myëgajpxyëty: “Mbäätxyëp të njayaˈooky, per kyaj wiˈix të nduny”. Wiˈix mˈokwinmay, ¿waˈandaa Saúl tyëgäjtsy?

Kyaj. Saúl duˈunyëm ojts tpajëdityë David. Mä tuˈugë ux, ta David mëdë tsyojkmäänk Abisái tyëjkëdë mä nety të nyaynyikojˈyëtyë Saúl ets kyaj pën yˈijxëdë. Axtë Abner diˈibë nety kyuentˈäjtypyë Saúl, të nety myanaxy. Abisái ta tˈanmääyë David: “¡Tyam, mbäädë net nyaˈoˈkëmë Saúl! Minëts nˈokˈyaˈooky”. Perë David ta yˈatsoowë: “Jyobaa yëˈë diˈib tukumëdowanëp. Yëˈëyë pagäjpë lyansë etsë nyëëduˈts, ets joˈomdë”.

Ta netë David pyatëjkë mä tuˈugë kopk diˈib jamyë wingon. Desde jamë David tkukäjpxnäjxyë Saúl: “¡Abner! ¿Tiko kyaj të xykyuentˈatyë rey? ¿Mä net ja nyëëduˈts ets ja lyansë?”. Saúl yoˈkmëdoowë David, ta tˈanmääy: “Mbäätxyëbëts të xyjayaˈooky, per kyajts wiˈix të xytyuny. Tyamnëmëtsë net të nˈixy ko mijts diˈib mdunäämp rey jam Israel”. Ta netë Saúl jyëmbijty mä ja pyalasyë. Per kyaj nety niˈamukë ja jyiiky myëguˈugë Saúl tmëtsipˈattë David.