Yajtukumëdoy tuˈugë reyna diˈib mëk axëkjäˈäy

Jam Jezreel, ja rey Acab desde mä byentanë tkuˈijxnäjxy tuˈugë uubës kam diˈib jyaˈäjtypyë Nabot. Acab yëˈë nety tsyojkypyë tadë uubë kam, ta ojts tjaˈˈamdoyë Nabot parë tyukmëdoogëdët. Perë Nabot kyaj ttoogany mët ko ja Ley jyënaˈany ko kyaj mbäät yajtoogyë nax diˈibë tääk teety tyukumaabyë yˈuˈunk yˈënäˈk. Oy, diˈibë Nabot tyuun. Per wiˈix mˈokwinmay, ¿waˈandaa Acab tmëjˈijxy extëmë nety wyinmayë Nabot? Kyaj. Acab ta jyantsy jyotˈambëjky. Kom mëkë nety të jyantsy jyotˈambëky, ta kyaj nyekypyëtsëmany mä kyuartë ets kyaj ti tnekyjyëˈxany.

Acab yëˈë pyëjkë Jezabel, tuˈugë reyna diˈib mëk axëkjäˈäy. Duˈun tˈanmääyë Acab: “Mijts diˈib mduump rey yä Israel, pääty mbäät xymyëdaty tukëˈëyë ti mdimtsojkypy. Tyamëts nˈixët wiˈixëts njäˈäbëkyë tadë nax ets nmoˈoyët”. Ta net tnijäˈäyë ja mëjjäˈäytyëjk diˈib tuundëp mä ja käjpn. Mä tyäˈädë neky, jap tˈanmääyë mëjjäˈäytyëjk parë tniwäämbattëdë Nabot ko yëˈë të tmëgäjpxtëgoyë Dios ets ta net tkukäˈätstët. Ja mëjjäˈäytyëjk duˈun ttuundë extëmë Jezabel jyënany. Ok, ta Jezabel tˈanmääyë Acab: “Të tyam yˈoˈknë Nabot. Mbäädë net xymyëwëˈëmë ja yˈuubës kam”.

Jezabel kyaj yëˈëyë Nabot ojts dyaˈooky diˈibë nety kyaj ti të ttuundëgoy, nan ojts dyaˈooky mayë Dios mëduumbë. Jezabel nan yˈawdäjt mayë agojwinax ets ak yëˈë tyuunë axëkˈäjtën. Perë Jyobaa yˈijx tijaty axëkˈäjtënë Jezabel tyuun. Pääty, ¿wiˈixëdaa netyë Jyobaa ttunäˈänyë Jezabel?

Ko yˈoˈkyë Acab, ta nyajxy waanë tiempë ets ta tyëjkë anaˈambë ja myäänk Jehoram. Ta netë Jyobaa tkejxy tuˈugë yetyëjk diˈib xëwˈäjt Jehú parë nëjkx ttukumëdoyë Jezabel mëdë fyamilyë.

Ta Jehú pyejty mä kyarrë ets ojts nyijkxy Jezreel mä tsyëënë Jezabel. Etsë Jehoram ta nanduˈun pyejty mä kyarrë parë nëjkx tmëtmaytyäˈägäˈänyë Jehú. Ko nyaybyatëdë, ta Jehoram dyajtëëy: “¿Jaˈäjtpë tuˈugyëˈäjtën?”. Jehú ta yˈatsooy: “Kyaj jyaˈˈatäˈänyë tuˈugyëˈäjtën, pën duˈunyëmë mdääk Jezabel ttunyë axëkˈäjtën”. Ta Jehoram tjayajëmbitany ja kyarrë, perë Jehú ta ojts tyuktiˈpxyëty tuˈugë fletyë ets ta yˈoˈky.

Ta netë Jehú ojts nyijkxy mä pyalasyë Jezabel. Ko tnijäˈäwë ko ta yajniminy, ta jyantsy nyaywyingooy jyantsy nyayˈagooyë, nyaygyuˈtë ets nyaxweˈtsy byentanëˈagëˈëy parë tjëjpˈixäˈänyë Jehú. Ko Jehú jyajty, Jezabel kyaj oy ojts kyäjpxpoˈkxyëty. Jehú ta tˈanmääy ja tyuumbëtyë Jezabel diˈibë nety jam nadënääyëp: “¡Kujëbijpnaxtë!”. Ta ojts tkujëbijpnaxtë mä ja bentanë ets ooky ojts tyim käˈäy.

Ok, ta Jehú ojts dyaˈooky 70 yˈuˈunk yˈënäˈkë Acab ets kyaj pën tnekyˈawdäjtyë Baal mä ja it lugäär. ¿Mbëjkypyë kuentë ko Jyobaa yˈijxypy tukëˈëyë? ¿Ets ko yëˈë tyukumëdoopy pënaty axëëk adëtstëp näˈä yëˈë tˈixy ko të tiempë tpääty?