Jyobaa myëmaˈkxtujkë Jonás

Jam Asiria tam ijty tuˈugë käjpn diˈib xëwˈäjt Nínive, mä tsyëënëdë axëkjäˈäy. Päätyë Jyobaa tkejxyë Jonás parë jam nyëjkxët ets tˈanëëmëdë jäˈäy parë dyajtëgatstët ja jyukyˈäjtën. Perë Jonás kyaj ojts nyijkxy Nínive, yëˈë tyuktëjkë ja barkë diˈib nëjkxp mä tuˈugë lugäär diˈib xyëwˈäjtypy Tarsis.

Ko nety ja barkë yajpatnë mejnyoty, ta myiinyë mëk poj tuu ets ta ja barkë yajˈyeˈebyëty jyantsy nyayˈatsëˈkëdë. Ta këjkjaˈa tmënuˈkxtaktë diˈib diosˈäjttëp ets nyayˈanmääyëdë: “¿Tiko tyam duˈun njäjtëm?”. Ok, ta Jonás jyënany: “Ëjtsë nboky. Yëˈëts ngugekypyë Jyobaa jaˈko kyajts ndunäˈäny diˈibëts të xytyukˈaneˈemy. Kujëbijpnäjxtëgëts mejnyoty parë nyaxëdë tyäˈädë mëk poj tuu”. Ja barkë yajˈyeˈebyëty kyaj tjakujëbijpnaxandë Jonás, per yëˈë mëktaˈaky jyënany ets yajkujëbijpnaxët. Ta yajkujëbijpnäjxy ets ta nyajxy ja mëk poj tuu.

Jonás, ta wyinmääy ko oogëbë net. Ko mas niˈigyë ojts kyiinë, ta tmënuˈkxtakyë Jyobaa. Ta Jyobaa tkejxy tuˈugë mëj äjkx parë jyëënëdët, per kyaj yaˈoˈkë. Jap äjkx jodoty, ta Jonás tˈanmääyë Jyobaa: “Nwandakypyëts ko xëmë nmëmëdowäˈäny”. Jyobaa juuky dyaˈijtyë Jonás tëgëk xëëw äjkx jodoty, ets ok, ta ojts dyajnëjkxy ja äjkx windëˈëtstuuy parë jam yajnasˈëëtsët.

Jyobaa yajtsokë Jonás, per ¿yëˈë nety yˈandijpy ko kyaj nyekynyëjkxët Nínive? Kyaj. Jyobaa kajxë jatëgok, etsë Jonás ta myëdooy. Ojts nyijkxy ets tˈanmääy ja axëkjäˈäytyëjk diˈib jam tsënääytyëp: “Jeˈeyë 40 xyëëw yˈaktëgoyˈaty, ta Jyobaa dyajkutëgoyaˈanyë tyäˈädë käjpn”. Per ta tyuun jyäjtë diˈibë nety kyaj ttimwinmay, ja jäˈäy diˈib Nínive jodëmbijttë. Ta ja rey diˈib Nínive tˈanmääy ja nyax kyäjpn: “Mmëgäjpxtë Dios ets jodëmbittë, koxyëp kyaj xynyayajkutëgoˈoyëm”. Ko Jyobaa tˈijxy ko ja jäˈäy të jyodëmbittë, ta kyaj dyajkutëgooytyë.

Jonás ta jyotˈambëjky ko Jyobaa kyaj dyajkutëgooy ja käjpn. Okwinmay: Jyobaa myëmaˈkxtujkë Jonás ets pyaˈˈayoow. Per yëˈë kyaj tpaˈˈayooy ja jäˈäy diˈib tsënääytyëp Nínive. Niˈigyë dyajmäˈtääy ja wyiin jyëjp ets nyaxweˈtsy käjpnbëˈam mä yaˈˈaniktsoˈogyëty tuˈugë xuty tsyiˈääy. Per ta tyëtsy, etsë Jonás ta jyantsy jotˈambëjky. Päätyë Jyobaa yˈanmääyë: “¿Niˈigyë xypyaˈˈayoyë tadë ujts ets kyaj dyuˈunëtyë jäˈäy diˈib tsënääytyëp Nínive? Ëjts, tëts nbaˈˈayoy ets päätyëts kyaj të nyajkutëgoytyë”. ¿Ti netyë Dios tyukniˈˈixëyaambyë Jonás? Ko niˈigyë dyajtsobääty ja jäˈäy diˈib tsënääytyëp Nínive ets kyaj dyuˈunëty ääy ujts.