Ja gobiernë diˈib itäämp winë xëëw

Mä tuˈugë koots, ja rey Nabucodonosor naa tëgatsy wyingumääy. Mëk ojts yajmay yajtäjˈyëty ets kyaj tsuu pyatë. Ta ojts tnigaxë ja xyëwëj xyëmaabyë ets tˈanmääy: “Oknimaytyäˈäktë extëmëts të ngumäˈäy”. Ta yˈatsoowdë: “Rey, oknigäjpx ti të xykyumäˈäy”. Per ja Nabucodonosor, ta yˈatsooy: “¡Kyaj! Anmääytyëgëts miitsëty tits të ngumäˈäy, pën kyaj xynyigäjpxtë, ta nyaˈooktët”. Ta jatëgok yˈatsoowdë: “Per nigäjpx wiˈix të mgumäˈäy, ets ta ndukˈawanëdët wiˈix nyikejy”. Ta Nabucodonosor, jyënany: “Nëgoo mˈandäˈäktë, anmääytyëgëts tits të ngumäˈäy”. Ta jatëgok tˈanmääytyë ja rey: “Nituˈugë naxwinyëdë jäˈäy mbäät tkatuny diˈib mˈamdoopy”.

Ta ja Nabucodonosor jyantsy jyotˈambëjky ets ojts tniˈanaˈamë yˈoˈktäˈäytyët ja wijyjyaˈayëty diˈib Babilonia. Nanduˈunë Daniel, Sadrac, Mesac etsë Abednego. Perë Daniel ta tˈanmääy ja rey ets waanë tiempë yˈakmoˈoyëdët. Ta mët ja myëtnaymyaayëbëty ojts tmëgäjpxtë Jyobaa ets tˈamdoowdë naybyudëkë. ¿Tidaa netë Jyobaa tyuun?

Ta Jyobaa ttukˈijxyë Daniel ti nety të twingumäˈäy ja Nabucodonosor ets ttuknijäˈäwë wiˈix nyikejy. Jakumbom, ta Daniel ojts tninëjkxy ja reyë tyuumbë ets tˈanmääy: “Kyaj xyaˈooktët nituˈugë wijyjyaˈay, mbäädëts nimaytyaˈaky ti ja rey të twingumäˈäy”. Ta ojts yajwoownëjkxy mä Nabucodonosor. Daniel ta tˈanmääy ja rey: “Dios yëˈë të mduknijawëty ti miin këdakp. Yëˈë tyäˈädë diˈib të xywyingumäˈäy: të xyˈixy tuˈugë mëj awinax diˈib ak oorë kyëbäjk, kyaatsy etsë kyëˈë ak platë, jyotˈëjx etsë pyuuy ak koobrë, ets mä kyox axtë mä tyekyyoˈkn ak yerrë, etsë tyeky, yëˈë yerrë xëbiny mëdë moˈonts. Ta tuˈugë tsää tsyoˈony kopkëjxy ets amëjääw ojts tyekymyëgäˈätsëty, ta jyëmbijty puˈxm, ta net myiinyë poj ets yˈëxpojtääy. Ets ja tsää, ta jyëmbijty extëm tuˈugë mëj kopk diˈib yajwindujktääy ja naxwinyëdë”.

Ta net ja Daniel yˈakjënany: “Duˈun nyikejy ja mgumäˈäy: yëˈë mgobiernë, yëˈë duˈun ja awinaxë kyëbäjk diˈib ak oorë. Ets diˈib platë, yëˈë tuˈugë gobiernë diˈib jaˈˈatäämp ok. Ta net jyaˈˈatäˈänyë wiinkpë gobiernë diˈib duˈunˈatäämp extëmë koobrë diˈib ok minäämp ets yˈanaˈamäˈäny abëtsemy nyaxwinyëdë. Ta pyëdëˈëgäˈäny jatuˈugë gobiernë diˈib itäämp mëk extëmë yerrë. Ets tim ok, ta pyëdëˈëgäˈäny tuˈugë gobiernë diˈib naywyäˈkxanëp, tam mä yˈitäˈäny mëk extëmë yerrë ets tam mä yˈitäˈäny yuunk extëmë moˈonts. Ets ja tsää diˈib jëmbijtp extëm tuˈugë mëj kopk, yëˈë ja Diosë gyobiernë, diˈib itäämp winë xëëw ets dyajkutëgoyaˈany tukëˈëyë ja gobiernë”.

Ta ja Nabucodonosor nyayjijtakë Daniel wyinduuy, ets jyënany: “Yëˈë mDios të mduknijawëty wiˈixëts të nwingumäˈäy. Kyaj jyaˈˈatyë wiinkpë dios extëm yëˈë”. Ta ja Nabucodonosor kyaj dyaˈoˈky ja Daniel, niˈigyë tmooy ja kutujkën parë tniwintsënˈatët niˈamukë ja wijy jyaˈayëty ets parë tˈanaˈamët tukëˈëyë ja it lugäär diˈib nyitënaabyë Babilonia. ¿Të xypyëkyë kuentë wiˈixë Jyobaa tˈatsoowëmbijtyë Daniel ko myënuˈkxtakë?