Elisabet dyajmaxuˈunkˈäjty tuˈugë uˈunk

Të nety nyäjxnë 400 jëmëjt mä yajnabojtsyë Jerusalén käjpn, ko jyukyˈajty tuˈugë saserdotë diˈib xëwˈäjt Zacarías etsë kyudëjk Elisabet, naa jamyë wingon tsyënääytyë Jerusalén. Zacarías mëdë Elisabet tëëyëbë nety pyëjknëdë, per kyaj mbäädë yˈuˈunk tpäättë. Tëgok, tamë netyë Zacarías tnoˈogyë poom mä ja templë ko ajotkumonë tˈijxy tuˈugë anklës diˈib xyëwˈäjtypy Gabriel. Zacarías ta jyantsy tsyëˈkë, per ta ja anklës yˈanmääyë: “Këdii mtsëˈëgë. Yëˈëtsë Jyobaa yˈayuk nyajnaxanëp. Yëˈë mgudëjk Elisabet, yajmaxuˈunkˈataampy tuˈugë mixyuˈunk, ets ja xyëëwmoˈoytyët Juan. Jyobaa yëˈë të wyinˈixyëty parë ttunët tuˈugë tuunk diˈib jëjpˈam”. Zacarías ta dyajtëëy ja anklës: “¿Wiˈixëts nnijawët ko tëyˈäjtën mjënäˈäny? Pes tëts nmëjjäˈäyëndë parëts nmëdattët tuˈugë uˈunk”. Ja anklës Gabriel ta yˈatsoowë: “Diosëts të xykyexy parë ndukˈawanëdë tyäˈädë oybyë ayuk. Per kom kyaj të xymyëbëky, ta net mwëˈëmët uum axtë koonëm ja uˈunk myaxuˈunkˈatët”.

Zacarías niˈigyë jap ojts jyajknë mä ja templë. Ko pyëtsëëmy, tapë netyë jäˈäy jyantsy yˈawijxëndë parë tnijawëyäˈändë ti të tyuny të jyatyëty. Per kom kyaj nety mbäät yˈokkäjpxnë, jeˈeyë ja yˈääw kyëˈë ojts tˈakˈyajˈyuˈkxy. Ta ja jäˈäy tpëjktë kuentë ko Zacarías të netyë Dios myëgajpxyëty.

Ko tiempë nyajxy, ta Elisabet ojts wyeˈemy uˈunkmëët ets ta dyajmaxuˈunkˈäjty tuˈugë mixyuˈunk extëmë nety ja anklës të jyënaˈany. Ta ja jyiiky myëguˈugë Elisabet ets ja myëtnaymyaayëbëty myiindë parë tˈixyˈatäˈändë ja mixyuˈunk, ets ttukxondaktë. Elisabet ta jyënany: “Ja txëwˈatäˈäny Juan”. Ta ja myëguˈuktëjk yˈatsoowdë: “Per kyaj pën duˈun txëwˈaty mä mfamilyë. Nik oy ko txëwˈatët Zacarías extëmë tyeety”. Perë Zacarías ta tkëxjääy: “Txëwˈaty Juan”. Taanëm jatëgokë Zacarías kyäjpxëˈky. Mä tukëˈëyë yˈit lyugäärë Judea tnijäˈäwëdë ko të myaxuˈunkˈaty tuˈugë mixyuˈunk ets ta jäˈäy nyayajtëëwëdë: “¿Tidaa tadë mixyuˈunk tyunaampy ko yaagët?”.

Ta netë Zacarías tyukëdakë ja Diosë myëjääw ets ojts tnaskäjpxë: “¡Nˈokmëjkumäˈäyëmë Jyobaa! Yëˈë tyukwandakë Abrahán ko kyaxaambyë nety tuˈugë yajnitsokpë, ja Mesías diˈib xyyaˈˈawäˈätspëtsëmäˈänëm. Etsë Juan, tyunäˈäny kugajpxy parë dyaˈˈawäˈätsäˈäny ja nyëˈë tyuˈujë Mesías”.

Mä ja tuˈukpë kapitulo, yëˈë nˈixäˈänëm wiˈixë tuˈugë myëguˈugë Elisabet, diˈib xëwˈäjt María, nanduˈun tpaty tuˈugë uˈunk.