Jyobaa ojts tkuwäˈänyë Jesus

Jam Israel, tamë nety tuˈugë lugäär mä jäˈäy tmëbëktë ko mëtsäˈä mbäät nyëˈëmoˈoy tyuˈumoˈoyëdë. Mä tuˈugë ux, ta näägë yetyëjk diˈib tsoˈondëp mä xëëw pyëtsëmy, tˈijxtë tuˈugë mëtsäˈä diˈib jantsy tëˈkxp ets yuˈkxy, ta tpatsoˈondë. Ja “mëtsäˈä” axtë jam ojts wyoowjäˈtëdë Jerusalén. Tyäˈädë yetyëjkëty, ta jäˈäy dyajtëëwdë nëˈääy tuˈääy: “¿Mä net ja mixyuˈunk diˈib tunäämp rey mä judiyëtëjk? Yëˈëts nwingoxtanëyandëp”.

Herodes, ja rey diˈib Jerusalén, myëdoow ko yajnimaytyaˈaky ja jembyë rey. Ta jyotmaytyuktëjkë ets dyajtëëy ja saserdotë wintsënëty: “¿Mä myaxuˈunkˈatäˈänyë tadë rey?”. Ta yˈatsoowdë: “Ja kugajpxyëty ojts tnaskäjpxëdë ko myaxuˈunkˈatäˈäny Belén”. Ta netë Herodes ojts tnigaxë ja yetyëjkëty diˈib tsoˈondëp jatsoo mä xëëw pyëtsëmy ets tˈanmääy: “Nëjkxtë Belén ets ëxtäˈäytyë tadë mixyuˈunk. Ko mjëmbittët, tats xytyukˈawanëdët mä yajpääty, yëˈko nan nëjkxëbëts nwingoxtanëyaˈany”. Per andakpë nety.

Ta ja “mëtsäˈä” jatëgok yoˈoytsyoˈony ets ta jatëgok tpatsoˈondë ja yetyëjkëty axtë tpajäjttë Belén. Ta ja “mëtsäˈä” ojts wyäˈkwëˈëmë mä tuˈugë tëjk, jap tyëjkëdë ets jap tpattë Jesus mëdë tyääk. Ta twingoxtënääytyë ja mixyuˈunk ets tmooytyë regalë extëmë, oorë etsë päˈäkxuˈkpë. Per ¿yëˈëdaa netyë Jyobaa të kyaxëdë tyäˈädë yetyëjkëty parë tninëjkxtëdë Jesus? Kyaj.

Mä tadë koots, ta Jyobaa tˈanmääyë José mä tuˈugë kumäˈäy: “Herodes yëˈë yaˈoogaambyë Jesus. Mëbëtsëm yää mgudëjk etsë mˈuˈunk, ets nëjkxtë Egipto. Jam mwëˈëmdët, kyaj mjëmbittët axtë koonëm nˈanëëmët ko kyaj yˈokkutsëˈëgëˈäjnë”. Ta netyë José mëdë fyamilyë ojts nyëjkxtë Egipto.

Jyobaa nanduˈun tˈanmääy ja yetyëjkëty diˈib tsoˈondëp mä ja xëëw pyëtsëmy ets kyaj nyekyjëmbittët mä Herodes. Ko Herodes tnijäˈäwë ko kyaj të nyekyjëmbittë tyäˈädë yetyëjkëty, ta jyantsy jyotˈambëjky. Ets kom kyaj tnekypyatyë Jesus, ta ojts tniˈanaˈamë parë niˈamukë yˈooktëdë mixyuˈunk diˈib Belén, diˈib naa duˈunë jyëmëjt extëmë Jesus. Per kyaj wiˈix jyajtyë Jesus mët ko jagamë nety të yajmënëjkxy, axtë Egipto.

Ko tiempë nyajxy, ta Herodes yˈoˈky. Ta netë Jyobaa tˈanmääyë José: “Kyaj yˈokkutsëˈëgëˈäjnë, mbäät mjëmbity”. José, María etsë Jesus, ta jyëmbijttë Israel ets jam tsyënääytyaknbëjktë Nazaret.