Jesus tmëtmaytyaky tuˈugë toxytyëjk mä ja nëdäjny

Ko nyajxy ja Paskë xëëw, ta Jesus mëdë yˈëxpëjkpëty jyëmbijttë Galilea. Jatsoo nyäjxtë Samaria ets jam ojts tyuˈuboˈkxtë mä ja nyëdäjnyë Jacob, diˈib naa jamyë wingon mä käjpn Sicar. Jamë Jesus ojts wyeˈemy, mientrës ja yˈëxpëjkpëty ojts nyëjkxtë käjpnoty parë tjuyäˈändë käˈäy ukën.

Ta tuˈugë toxytyëjk myiiny nëgoombë mä ja nëdäjny, ta Jesus tˈanmääy: “Yajnëˈukëts”. Ta ja toxytyëjk yˈatsooy: “¿Tikots xymyëgajpxy ets pën ëjts samaritanëts? Pesë judiyëtëjk kyaj tmëgäjpxtë samaritanë”. Jesus ta yˈatsooy: “Koxyëp xyˈoknijawë pëntsën ëjts, taxyëbëts xyˈamdoyë nëë ets yëˈëxyëp nmoobyë nëë diˈib yajkypyë jukyˈäjtën”. Ta ja toxytyëjk yajtëëwë: “¿Ti mmaytyäˈägaampy? Pes ni xykyamëdaty ti mëdë nëë xyjuudët”. Jesus ta yˈatsooy: “Ja diˈib yˈukypyë nëë diˈibëts ëjts nmoopy ninäˈä jatëgokë tëëtsë kyapäädëdët”. Ja toxytyëjk ta yˈatsooy: “Wintsën, mmoogyëtsë tadë nëë”.

Ta Jesus yˈanmääyë: “Anëëmë ja mëmëjjäˈäy waˈan nanduˈun tminy”. Yëˈë ta yˈatsooy: “Kyajts pënë nmëmëjjäˈäy”. Jesus ta yˈatsoowë: “Tëyˈäjtën extëm mjënäˈäny, per mëgoxkˈok kujk mbëky, ets diˈib tyam mëët mtsëënë kyajnëm xypyeky”. Ja toxytyëjk ta yˈatsooy: “Tyamëts nbëkyë kuentë ko mijts kugajpxy. Nax ngäjpnëts duˈun tmëbëktë ko yää mbäädë Dios yaˈˈawdaty mä tyäˈädë tun kopk, perë judiyëtëjk jyënäˈändë ko jamyë mbäädë Dios yaˈˈawdaty Jerusalén. Nwinmayëts ko myinëdë Mesías, yëˈë diˈib nëjkx xytyukniˈˈijxëm wiˈix nˈawdäjtëmë Dios”. Ta Jesus yˈanmääyë: “Tyam ti ndukˈawanëyaˈany diˈibëts kyajnëmë pën ndukˈawanë, ¡ëjtsë duˈun ja Mesías!”.

Ta ja toxytyëjk ojts pëyeˈegyë nyijkxy käjpnoty ets tˈanmääy ja myëgugäjpnëty: “Tëts jyawë nbääty ja Mesías. Wäˈäts tnijawë wiˈixëts njukyˈaty. Mindë parë xyˈixtët”. Ta ja jäˈäy ojts pyanëjkxëdë mä ja nëgoondakn parë tmëdowäˈändë wiˈixë Jesus yaˈëxpëky.

Ta net tˈanmääytyë Jesus parë wyëˈëmët. Majtsk xëëw jamë Jesus yˈijty mä ja käjpn ets ja jäˈäy dyaˈëxpëjky ets nimay myëbëjkëdë. Ok, ta ja toxytyëjk yaˈˈanmääy: “Kots të nmëdoowdäˈäytyë wiˈix myaytyaˈagyë tyäˈädë yetyëjk, ijttëbëtsë net seguurë ko jantsy yëˈë duˈun yajnitsoˈogaambyë naxwinyëdë jäˈäy”.