Jesus yˈoˈky jam Gólgota

Ja saserdotë wintsënëty yajnëjkxtë Jesus mä nety yajpääty ja yajkutujkpë. Jamë Pilato dyajtëëy: “¿Ti mdukniwäämbajttëbë tyäˈädë yetyëjk?”. Yëˈëjëty ta yˈatsoowdë: “¡Jyënaˈany ko yëˈë rey!”. Pilato ta dyajtëëyë Jesus: “¿Tii mijtsë duˈun ja israelitëtyë ryey?”. Jesus ta yˈatsooy: “Yëˈë nGutujkënëts kyaj yajpääty yä naxwiiny”.

Ta netë Pilato tkejxyë Jesus mä Herodes, diˈib yajkutujkp Galilea, parë tˈixäˈäny pën yajpatp ja tyëgoˈoyën. Herodes yˈijx ko Jesus nitii nety të tkatuundëgoy, pääty jatëgok tkejxy mä Pilato. Ta Pilato tˈanmääy ja jäˈäyëty: “Ni Herodes ets ni ëjts, ngapäättëtsë tyëgoˈoyënë tyäˈädë yetyëjk. Nyaˈˈawäˈätspëtsëmaambyëts”. Per ja jäˈäyëty ta yaxkaktë: “¡Waˈan tˈooky! ¡Waˈan tˈooky!”. Ja soldäädëty ta twojptë Jesus, twintsujëˈktë ets tsiˈk tkojxtë. Ta ojts tpëjtakëdë kyoronë diˈibë nety të dyaˈoyëdë mëdë apyny ets tnëxik ttukxiktë, ta net tˈanmääytyë: “¡Wiˈix jyaty, israelitëtyë ryey!”. Pilato ta jatëgokë jäˈäy tˈanmääy: “Kyajts të nˈixyë tyäˈädë yetyëjk ti të ttuundëgoy”. Per yëˈëty ta yaxkaktë: “¡Këxwop kepykyëjxy!”. Ta Pilato tkëyajkyë Jesus parë yˈoogët.

Ta netë Jesus ojts yajmënëjkxy mä tuˈugë lugäär diˈib xyëwˈäjtypy, Gólgota. Ta yajkëxwojpy mä tuˈugë kepy ets jam ojts tnikaˈaktë kudëy. Jesus ta tmënuˈkxtakyë Jyobaa: “Tatë, pokymyaˈkx, yëˈko kyaj tnijawëdë ti tyuundëp”. Ja jäˈäyëty jeˈeyë tnëxik ttukxiktë Jesus ets tˈanmääytyë: “¡Pën yëˈë Dios mˈUˈunkˈäjtëp, jënak mä tadë kepy ets mnayajtsoˈogëdët!”.

Jesus ta yˈanmääyë niduˈuk ja yajjäˈäyˈoˈkpë diˈib pyëˈääy: “Jamyajtskëts ko mdëkët mä mˈAnaˈamën”. Jesus ta ttukwandaky: “Myajpäädäämp mët ëjts mä ja it lugäärë tsujpë”. Ta net ojts kyootsë jënaky xyëëw, ets tëgëk oorë duˈun yˈijty. Nääk ja Jesusë yˈëxpëjkpëty jamyë ojts wyëˈëmdë wingon mä yajkëxwojpy, axtë ja tyääk, María. Jesus ta ttuknipëjkyë Juan parë tkuentˈatëdë María extëmxyëp yëˈë ttäägëty.

Ok, ta Jesus jyënany: “¡Të net yˈadëy!”. Ta ojts wyindaknë ets ojts yˈakmëkxejy. Ta nyajxy ja mëk ujx. Ets ta ja kortinë diˈib mä ja templë ojts kyëˈtswaˈkxy, diˈib yajnaywyäˈkxëp ja lugäärë Wäˈätspë mëdë Mëk Wäˈätspë. Ta net tuˈugë soldäädë wintsën jyënany: “Jantsy yëˈëdëmë netyë Diosë yˈUˈunk”.