Ja Jesusë yˈëxpëjkpëty käjpxwäˈkxtë mä kanäägë it lugäär

Ja apostëlëty myëmëdoowdë Jesus, ojts tkäjpxwäˈkxtë ja oybyë ayuk mä tukëˈëyë naxwinyëdë. Mä jëmëjt 47, ta ja nmëguˈukˈäjtëm diˈib Antioquía tkajxtë Pablo etsë Bernabé parë nëjkx kyäjpxwäˈkxtë jagambäät. Tyukˈijx tyukxoondë tyäˈädë tuunk mientrës ojts nyëjkxtë mä yˈit lyugäärë Asia Menor extëm Derbe, Listra ets Iconio.

Pablo mëdë Bernabé niˈamukë jäˈäy tmëtmaytyaktë, duˈunë mëkjäˈäy, ayoowbë jäˈäy, mëjjäˈäytyëjk etsë ënäˈktëjk. Nimay tmëbëjktë Jesukristë. Pablo mëdë Bernabé nan myëtmaytyaktë Sergio Paulo, diˈibë nety anaˈamp Chipre, per ojts jyayajtuˈuˈadukäˈänëdë tuˈugë brujë. Pablo ta tˈanmääyë tyäˈädë brujë: “Jyobaa mdukumëdowanëp”. Ta netyë ja brujë ojts wyiintsë. Ko duˈun tˈijxy ja yajkutujkpë Sergio Paulo, ta tmëbëjkyë Jesus.

Pablo mëdë Bernabé oytyim määjëty ojts kyäjpxwäˈkxtët, duˈun tëjkmdëjkm, määyoty, nëˈääy tuˈääy ets mäjaty ja sinagoogë. Tëgok, jam Listra ojts dyajˈyoˈoyëˈëktë tuˈugë jäˈäy diˈibë nety tekymyäˈät. Ko ja jäˈäy duˈun tˈijxtë, ta wyinmääytyë ko Pablo mëdë Bernabé diosëty ets ta tjaˈˈawdatandë. Perë yëˈëjëty kyaj tkupëjktë, pääty tˈanmääytyë: “¡Yëˈëyë mbäät yaˈˈawdatyë Dios! Ëëtsëty nan naxwinyëdë jäˈäyëts”. Ta näägë judiyëtëjk jyäjttë ets tˈaˈëˈëw tˈagäjpxëdë jäˈäy parë yajnibëdëˈëgëdë Pablo. Ta ttsäägäˈtstë ets tjëdojtpëtsëëmdë käjpnbëˈääy, pes duˈun wyinmääytyë ko të yˈoˈknë. ¡Perë Pablo kyaj nety të yˈooky! Ta pojënë nyimiinëdë myëguˈuktëjk parë pyudëjkëdë ets ta jatëgok ojts yajmënëjkxy käjpnoty. Ok, ta Pablo jyëmbijty Antioquía.

Mä jëmëjt 49, ta Pablo jatëgok wiinktsoo ojts nyijkxy. Yëˈë ojts tninëjkxtë ja myëguˈuktëjk diˈib Asia Menor, ets ok, ta ojts nyijkxy ëwäˈkx käjpxwäˈkxpë mas jagam, Europa. Ojts nyaxy Atenas, Éfeso, Filipos, Tesalónica ets mä wiinkpë it lugäär. Yëˈë jamyëdäjtëdë Silas, Lucas ets tuˈugë mixy diˈib xëwˈäjt Timoteo. Tuˈugyë tyuundë parë dyajnaxkëdaktë kanäägë tuˈukmujkën ets tpudëjkëdë myëguˈuktëjk parë mëk nyayaˈitëdët. Pablo nan ijt jam Corinto tuk jëmëjt ja kujkm parë tpudëjkë ja myëguˈuktëjk. Pablo ëwäˈkx käjpxwäˈkx, yaˈëxpëjk ets jyaayë neky parë kanääk ja tuˈukmujkën. Nan yëˈë yaˈoˈoyë wittëjk diˈib naytyukˈijxë. Ko tiempë nyajxy, ta jyëmbijty jatëgok Antioquía.

Ok, mä jëmëjt 52, ta myëdëgëkˈokë Pablo tsyoˈony, jam ogäˈän jyajty Asia Menor. Jatsoo ojts nyijkxy anikëjxytsyoo axtë jyajty Filipos, ets ok, ta jyënajky axtë Corinto. Pablo nan kanäk jëmëjt yˈijty Éfeso parë dyaˈëxpëjkyë jäˈäy, dyaˈˈagëdaky ets tpudëjkë ja myëguˈuktëjk. Nan bom bom dyajnäjxyë diskursë mä eskuelëtëjk. Mayë jäˈäy tmëbëjktë ets dyajtëgäjtstë jyukyˈäjtën. Ko nety ojts të tkäjpxwaˈkxy ja Diosë yˈayuk mä kanäägë it lugäär, ta ojts jyëmbijnë Jerusalén.