6. Yajmëtmaytyaˈagyë jäˈäy abëtsemy nyaxwinyëdë
“Tyäˈädë oybyë ayuk diˈibë nyimaytyakypy ja tsäjpotmëdë kutujkën yajkäjxwäˈxäämp es yajknijawët mä tëgekyë naxwinyëdë.” (MATEWɄ 24:14)
● Vaiatea tsyëënë jantsy nidëkë mä tuˈugë isla diˈib yajpatp Tuamotú mä Óceano Pacífico. Tuamotú ja tmëdaty 80 mutskatypyë isla ets ja myëjëty 803,000 kilometrë kuadräädë, ets jeˈeyë jäˈäy tsyëënëdë 16,000. Per oy jantsy nidëkë tsyëënë, Vaiatea mëdë myëdëjkpäˈä ninëjkxëdëbë Jyobaa tyestiigëty. ¿Tiko jyäˈttë jagambäät? Yëˈko tyuknijawëyandëp niˈamukë jäˈäy ja oybyë ayuk diˈib nyimaytyakypyë Diosë yˈAnaˈamën oy mä yajpäättët.
¿WIˈIX YAJWIJTSPËTSEMY? Axtë jagambäät yajmënëjkxyë Diosë yˈayuk. Mä jëmëjt 2010, ja të kyäjpxwäˈkxtë Jyobaa testiigëty 1,600 miyonk oorë mä 236 paˈis ets nuˈunë yˈit lyugäär, duˈunxyëp extëm tuˈugë tuˈugë Testiigë të tyuny 30 minutë tuˈuk tuˈugë xëë. Nuˈun të nyaxy mäjk jëmëjt, ja të dyajpëtsëmdë 20,000 miyonk naxyë ëxpëjkpajn ets të dyajwäˈkxtë parë jäˈäy dyaˈëxpëktë.
¿WIˈIXË JÄˈÄY TJËJPKUGÄJPXË? Kanäk mil jëmëjt kujk nyäjxnë ets duˈunyëmë jäˈäy tnimaytyäˈäktë Biiblyë.
¿TËYˈÄJTËN EXTËM TJËJPKUGÄJPXËDË? Jantsy tëyˈäjtën, të mayë jäˈäy tjayajwäˈkxäˈändë kajabäädë Diosë yˈAyuk. Per jeˈeyë tuk tiempë tyundë ets kyaj jyäˈttë jagambäät. Perë Jyobaa tyestiigëty, abëtsemy nyaxwinyëdë kyäjpxwäˈkxtë ets miyonkˈamë jäˈäy tmëtmaytyäˈäktë. Ets tyundë oy nuˈunë jäˈäy nyibëdëˈëgëdët diˈib myëdäjttëbë kutujkën ets tyëytyunëdët (Markʉs 13:13).a Jyobaa tyestiigëty namayˈäjtën dyajtundë xyëë tiempë parë kyäjpxwäˈkxtë ets tkëyaktë ëxpëjkpajn diˈib kyaj ttooktë. Ets mä dyajtuˈuyoˈoytyë tyäˈädë tuunk, yëˈë yajtuundëbë meeny sentääbë diˈib yajnayäjkp tsojkëngyëjxm.
¿WIˈIX MˈOKWINMAY? ¿Ja tyam yajkäjpxwaˈkxy abëtsemy nyaxwinyëdë ja “oybyë ayuk diˈibë nyimaytyakypy ja tsäjpotmëdë kutujkën”? Ko tyam yˈadëyë tyäˈädë tekstë diˈib ojts yajnaskäjpxë, ¿waˈandaa yëˈë tˈandijy ko ta myiny kyëdaˈagyë oyˈäjtën?
[Notë diˈib noky ëxˈääy]
a Pën mˈaknijawëyaampy, ixë pelikula Fieles ante las pruebas, Los triángulos púrpuras etsë Los testigos de Jehová se mantienen firmes ante el ataque nazi, diˈib yajpëtsëëmdëbë Jyobaa tyestiigëty.
[Letrë diˈib miimp mä dibujë mä pajina 9]
“Axtë mäbäädë Jyobaa tˈaˈixë, duˈunyëm ndukxondäˈägäˈänëmë tyäˈädë tuunk mä ngäjpxwäˈkxëmë oybyë ayuk, ets nyajtuˈunëm tijaty jaˈäjtp parë jäˈäy ninëjkxëm oytyim määjëty.”
(ANUARIO DE LOS TESTIGOS DE JEHOVÁ 2010)