¿Mbäädë jäˈäy ttuny tijaty tëyˈäjtën myëët oy niˈamukë tkatundët tijaty oy?
“Ndunäˈänëm tukëˈëyë tëyˈäjtën myëët.” (HEBREOS 13:18, Traducción del Nuevo Mundo [TNM])
OY NBOKYJYAˈAYˈÄJTËM, oy njukyˈäjtëm mä axëëgë jäˈäy jyukyˈaty ets oyë Satanás xyajtëgoyäˈänëm, mbäät njëjpkuwäˈkëm. ¿Ti mbäät nduˈunëm? Nmëwingoˈonëmë Dios ets nguytyuˈunëmë Biiblyë kyäjpxwijën diˈib kanäk siiglë kujkë jäˈäy pyudëkëdë. Min nˈokˈijxëm majtskë ijxpajtën.
BIIBLYË KYÄJPXWIJËN: “[Këdii] miits xymyëdattë ja winmäˈäny extëm pënëtyë naxwinyëdë winmäˈäny jaˈäjtëdëp” (Romanʉs 12:2).
Diˈib tuun jäjtëp: Guilherme, yëˈë tuˈugë jäˈäy diˈib myëdäjtypyë mëj negosyë Brasil, jyënaˈany ko tsiptakp yajtunët tijaty tëyˈäjtën myëët. Yëˈë jyënaˈany: “Tuˈugë jäˈäy diˈib tuump mä tuˈugë negosyë, mbäät pojënë tijaty ttuuntsondaˈaky diˈib kyaj yˈoyëty, mët ko duˈun tijaty yajtuny mä empresë o parë tijaty tˈix tpäättët mä ttundë kompetensyë. May kyaj wiˈix tnekyˈixtë ko nyaymyeenymyoˈoyëdë. Ko mdunët mä tuˈugë empresë ets xynyikëjxmˈatët mëjwiin kajaa meeny sentääbë, tsiptakp tijaty xytyunët tëyˈäjtën myëët”.
Per oy duˈunë jäˈäy yˈadëˈëtstë, Guilherme kyaj ttuny ti jäˈäy tuktunanëp. Yëˈë jyënaˈany: “Mbäät tuˈugë jäˈäy ttuny tijaty tëyˈäjtën myëët oy niˈamukë tkatundët tijaty oy. Diˈib tsojkëp, yëˈë tpëjtäˈägët mëk ja wyinmäˈäny parë kyaj duˈun ttunët. Biiblyë yëˈëjëts të xypyudëkë parëts nˈixy wiˈixëts ndukˈoyˈaty kojëts tijaty nduny tëyˈäjtën myëët, extëm nnayjawëtyëts oy, nmëdatyëts wäˈätsë njot nwinmäˈäny ets nnaymyëjˈixyëtyëts. Ets ja jäˈäy diˈib tyuumpy tijaty tëyˈäjtën myëët, nan mbäät tpudëkë pënaty mëët yajpäättë”.
BIIBLYË KYÄJPXWIJËN: “Diˈibë wyinmäˈänyˈajtypy nyayajmëkjäˈäytyäˈägäˈänyëty, kyaj tsyipëty kyäˈät pekyoty. Jaˈa myëdäjtypy maylyokë winmäˈäny es diˈibë jäˈäy yajpekytyuunëp, es dëˈën dyajnëjxët es dyajtëgoyët. Jaˈa ko jäˈäy tˈatsoktë meeny, yëˈë dëˈën yajmiimpy oytyim diˈibë axëkˈäjtënëty” (1 Timotee 6:9, 10).
Diˈib tuun jäjtëp: André, yëˈë nyiwintsënˈäjtypy tuˈugë empresë mä jäˈäy tpëjtaˈaky tijaty parë jëën tëjk yˈitët seguurë, extëmë alarmë. Ets tuˈugë jäˈäy diˈib yajmëduunëp, yëˈë diˈib jyaˈäjtypy tuˈugë mëj lugäär mä yajtukuyatyë futbol. Tëgok, ko ja partiidë jyëjpkëjxy, ta André ojts tmënëjkxy ja resiibë mä ja ofisinë parë yajmëjuytyët. Mëkë nety jap jyantsy tyundë, tjantsy myaytsyowdë ja meeny mä ja boletë të ttooktë. Kom të nety tsyuˈujënë, ta ja superbisoor jäjt oˈkp tjantsy myëjuuy pënatyë nety të tyundë, ets niduˈuk diˈib duˈun yajmëjuuy, yëˈë André.
André jyënaˈany: “Kojëts njëmbijty mäjëtsë ndëjk, tajëts nˈijxy ko tëjëtsë nety ja meeny nyajmooynyiˈigyë. Tajëts nwinmääy ko ja superbisoor ninäˈä nety tkanijawëyaˈany pën ja meeny të tmooynyiˈigyë, per nan nnijäˈäwëbëtsë nety ko përoobë tyäˈädë yetyëjk yëˈë nety kyëbataampy, tajëts njëmbijty. Oywiˈixëts nnäjxy mä ja mayjyaˈay parëts ja meeny nyajjëmbijty. Mëjˈixy ja superbisoor tjäˈäwë, pes ninäˈänëmë nety pën duˈun tkatuny”.
André ta yˈakjënäˈäny: “Kojëts duˈun nduuny, mëjkugäjpxëts xyaˈijty ja superbisoor. Të nyäjxnë kanäk jëmëjt ets ëjts jeˈeyë diˈib jap ak tuump. Ets jantsy oyëtsë jäˈäy xynyimaytyaˈaky mët kojëtsë Biiblyë kyäjpxwijënë nbanëjkxë”.
Jotkujk nnayjäˈäwëm ko mët yëˈëgyëjxmë Diosë nyaybyudëkë, mbäät njëjpkudijëm mä jäˈäy kyaj oy tijaty ttundë. Nituˈugë jäˈäy mbäät tkapudëkë naxwinyëdë jäˈäy parë ttundët tijaty tëyˈäjtën myëët. Të myëjwindëkë tyäˈädë jotmay ets tsipë naxwinyëdë jäˈäy dyajjëgaˈagët. ¿Yëˈë net yˈandijpy ko kyaj jyëjptëgoyaˈany? Mä ja tuˈukpë artikulo nnijawëyäˈänëm wiˈixë Biiblyë tˈatsoojëmbity.