Ko Jesus jyukypyejky yëˈë yˈandijpy jukyˈäjtënë winë xëë
KO JESUS jyukypyejky jëjpˈam parë ëtsäjtëm, kyaj nanëgoobë duˈun tyuun jyäjtë. Apostëlë Pablo duˈun tnimaytyaky: “Jesukristë jyikypyejky ko yˈeˈky. Dëˈën jaˈa extëm ja pëjtaˈaky diˈibë jawyiin tëëmpˈäjtp [...]. Pes dëˈën extëm tuˈugë yetyëjk dyajtsondaky ja oˈkën naxwiiny, nandëˈën tuˈugë yetyëjk dyajtsondaky es ja oˈkpëty jyikypyëktët. Diˈibëts nmaytyakypy, jaˈa dëˈën ko nidëgekyë jäˈäyëty yˈooktë mët ko tyëëmpˈat yˈäätsˈatëdë Adan, es nandëˈën diˈibaty yˈaxäjëdëp ja Jesukristë extëmë Yajnitsokpë, Dios yajjikypyëkëdëp” (1 Korintʉ 15:20-22).
Jesus ja jyukypyejky 16 äämbë Nisán mä jëmëjt 33. Mä tadë xëë, ja ijtyë judiyëtëjk nyëjkxtë mä templë diˈib Jerusalén parë tˈyoxtë tijaty jawyiin tëëmˈäjtp ets ttukwintsëˈëgëdë Jyobaa. Ko Pablo jyënany ko Jesukristë yëˈë “diˈibë jawyiin tëëmˈäjtp”, ta dyajjaygyujkë ko ta wiinkpë jäˈäy diˈib jukypyëkandëp.
Ets ¿wiˈix wyimbëtsëëmy ko Jesus jyukypyejky? Pablo jyënany: “Dëˈën extëm tuˈugë yetyëjk dyajtsondaky ja oˈkën naxwiiny, nandëˈën tuˈugë yetyëjk dyajtsondaky es ja oˈkpëty jyikypyëktët”. Niˈamukë nˈoˈkëm mët ko Adán ojts xytyukninäjxëm ja poky. Per ko Jesus dyajkyë jyukyˈäjtënë wäˈätspë extëmë wintsëˈkën ets jyukypyejky, ta ojts xyaˈˈawäˈätspëtsëˈëmëm mä poky etsë oˈkën. Mä Romanʉs 6:23, japë Pablo yajxon tnigajpxy: “Yëˈë [poky] yajkypy ja mëjuˈuny, esë tadë mëjuˈuny yëˈë dëˈën ja oˈkën; per Dios nadëˈënyë dyaky ja jikyˈäjtënë winë xëë winë tiempë mët jaˈagyëjxm Nintsënˈäjtëm Jesukristë”.
Jesus ojts tnigajpxy nuˈunën jyëjpˈamëty parë ëtsäjtëm ko ojts xykyuˈoˈkëm ets ko jyukypyejky. Yëˈë ojts tnigajpxy ko jukypyëkäämbë ets jyënany: “Nidëgekyë diˈibëts xymyëbëjkpëts ëj, jikyˈatëp winë xëë winë tiempë. Jaˈa ko yëˈë Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë winë tiempë es kyaj kyutëgoytyët” (Fwank 3:14-16).
¡Okpawinmay mjukyˈatët winë xëë mä kyaj nyekyjyamˈatëdë ayoˈon etsë pëjk adoˈonën! (Diˈibʉ Jatanʉp 21:3, 4.) ¡Jantsy oy diˈib nˈawijx njëjpˈijxëm! Tuˈugë ëxpëkyjyaˈay jyënany: “Oˈkpë jut yëˈë xytyukjamyajtsëm ko jantsy waanë njukyˈäjtëm, ets ko oˈkpë jyukypyëkäˈäny yëˈë xytyukjamyajtsëm ko jantsy waanë nˈitäˈänëm ooky”. Tyäˈädë yëˈë xytyukˈijxëm ko kyaj mbäät pën tjëjpkugäjpxë ko yëˈë yˈandijpy jukyˈäjtënë ko Jesus jyukypyejky.
[Dibujë diˈib mä pajina 6]