DIˈIB MIIMP MÄ NYIˈAK: ANËË DIˈIBË DIOS XYTYUKMËJAGAMGAKËM

Yajniwäämbajtë Dios ko mëk axëkjäˈäy

WIˈIXË JÄˈÄY JYËNÄˈÄNDË “Ko jäˈäy yˈooky diˈib mëjwiin kajaa të pyokytyuny, ta netyë nyijkxy infiernë ets jap yˈayoy, mä ja jëën xëmë yeeny.” (Catecismo de la Iglesia Católica.) Ets näägë wintsëndëjk diˈib mä relijyonk jyënäˈändë ko infiernë, yëˈë mä jäˈäy yajpëjtaknë abëky ets tmëjagamgaknë Dios.

WIˈIXË BIIBLYË JYËNAˈANY “Ja niniˈkx këbäjk diˈib pokytyuump... yëˈë oogäämp.” (Ezequiel 18:4.) Yëˈë “oˈkpë, nitii tkanijawëdë” (Eclesiastés 9:5). Pääty, pënë niniˈkx këbäjk oˈkp ets pënë oˈkpë kyaj ti tjawëdë, ¿wiˈix yˈayowët “mä ja jëën xëmë yeeny” o mä jäˈäy të yajpëjtaknë jantsy jagam mëdë Dios winë xëë winë tiempë?

Diˈib të yajkäjpxnaxy infiernë, mä ayuk ebreo ets grieegë yëˈë yˈandijpyë “oˈkpë jut”. Extëm nˈokpëjtakëm, ko Job pyatë tuˈugë mëk päˈäm diˈib yaˈˈayoowë, ta tmënuˈkxtakyë Dios: “Oyxyëbëts jeˈeyë xyyuˈutsy mä oˈkpë jut” (Job 14:13, Nueva Versión Internacional). O extëm tkäjpxnaxyë La Sagrada Biblia, de Guillermo Jünemann, “mä ja infiernë”. Job kyaj nety yˈitäˈäny mä yˈayowët winë xëë winë tiempë mä yˈitët jagam mëdë Dios, jeˈeyë nety pyoˈkxäˈäny jutoty.

¿TIKO MBÄÄT XYNYIJAWË? Niˈigyë nmëjagamgakëmë Dios ko nˈijxëm extëm tuˈugë axëkjäˈäy. Rocío diˈib tsënaapy mä tyäˈädë paˈis, Nëwinm, jyënaˈany: “Kojëts nmutskˈäjty, duˈunëts nyajtukniˈˈijxë ko jantsy taaˈäjtpë infiernë. Mëkëtsë nety ntsëˈëgë Dios ets kyajtsë nety nmëbëky ko myëdäjtypyë oybyë jäˈäyˈäjtën. Duˈunëtsë nety nwinmay ko jantsy awäˈän xëmë ets ko mëk axëkjäˈäy”.

Per extëmë Biiblyë tnimaytyaˈagyë Dios ets wiˈix yajpäättë oˈkpë, yëˈë yajtëgäjts extëmë netyë Rocío wyinmay. Yëˈë jyënaˈany: “Awäˈätstumëts nnayjäˈäwë, extëmxyëbëts jyawë ti të nyajtuknikëëytyuˈuty. Tajëts nbëjkyë kuentë ko Dios yëˈë xytyukmëtsojkëmë oyˈäjtën, ko xytsyojkëm ets ko mbäädëts ntseky. Tyam, duˈunëts nˈixy extëm tuˈugë uˈunkteety diˈib tsuj yajxon kyuentˈäjtypyë yˈuˈunk yˈënäˈk ets tyukmëtsejpyë oyˈäjtën” (Isaías 41:13).

Mayë jäˈäy ttukˈitëdë relijyonk mët ko ttsëˈëgëdë infiernë, perë Dios kyaj ttseky nmëduˈunëm mët ko ntsëˈkëm. Jesus jyënany: “Tsoktë ja mWintsën Dios” (Markʉs 12:29, 30). Ko njaygyujkëm ko Dios tëyˈäjtën myëët tijaty ttuny, ta nmëbëjkëm ko tyunaambyë tëyˈäjtën mä tiempë myiny kyëdaˈaky. Ets mbäät njënäˈänëm amumduˈukjot extëmë Elihú jyënany, ja myëtnaymyaayëbë Job: “¡Kyaj tyim jäˈty mä winmäˈäny etsë Dios ttunëdë axëkˈäjtën, ets diˈib myëdäjtypy tukëˈëyë mëkˈäjtën ttunët diˈib kyaj tyëyˈäjtënëty!” (Job 34:10, Nueva Versión Internacional).