DIˈIB MIIMP MÄ NYIˈAK: ¿TIKO MBÄÄT MNUˈKXTAˈAKY?

¿Tiko jäˈäy nyuˈkxtäˈäktë?

¿Mnuˈkxtakp xëmë? Mayë jäˈäy nuˈkxtaktëp, axtë diˈib kyaj tmëbëktë Dios. ¿Tiko nyuˈkxtäˈäktë? Të yajwijtspëtsëmy ko mä paˈis Francia, nigujkwaˈkxyë jäˈäy nyuˈkxtäˈäktë, näˈäty “jeˈeyë parë oy nyayjawëdët”. Nanduˈun Europa, kyaj tmënuˈkxtäˈäktë Dios parë tˈawdatäˈändë, “jeˈeyë parë oy nyayjawëyäˈänëdë”. Nan ta diˈib myëbëjktëbë Dios, per jaayë tmënuˈkxtäˈäktë ko tmëdattë amay jotmay ets yˈawijxtëp parë pojënë Dios yˈatsoojëmbitëdët (Isaías 26:16).

Ets mijts, ¿wiˈix mˈokwinmay? ¿Waˈandaa nuˈkxtakën jeˈeyë xypyudëjkëm parë nwinmäˈäyëm ti mbäät nduˈunëm? Pën mmëbëjkypyë Dios, ¿mˈijxypy ko yˈatsoojëmbijtypyë mnuˈkxtakën o mwinmaapy ko kyaj tˈatsoojëmbity? Biiblyë yëˈë mbudëkëyanëp parë xyˈixët ko nuˈkxtakën kyaj jeˈeyë oy xyajnayjäˈäwëm, nanduˈun xypyudëjkëm parë nmëwingoˈonëmë Dios.