Dios tsyejpy ets xymyëwingonët

¿TIKO NÄÄGË JÄˈÄY KYAJ TMËBËKTË? Mayë jäˈäy myëbëjktëbë Dios, per wyinmaytyë ko jantsy jagam yajpääty. Christina, tuˈugë toxytyëjk diˈib Irlanda diˈibë nety sëmään sëmään nëjkxp tsäjptëgoty, jyënaˈany: “Nnijäˈäwëbëts nety ko Dios yëˈë diˈib tukëˈëyë tijaty të dyajkojtäˈäy, per kyajtsë nety nˈixyˈaty. Ninäˈäjëts nganayjäˈäwë wingon mä yëˈë”.

¿WIˈIXË BIIBLYË TYUKNIˈˈIXË? Mbäät näˈäty nnayjäˈäwëm ko jagam nyajpatëm mä Dios, per yëˈë ninäˈä xykyamastutëm. Jesus duˈun tpëjtakyë ijxpajtën ko tnimaytyaky wiˈixë Dios xykyuentˈäjtëm: “Pën ja pën tmëdaty mëgoˈpxë byorreegë es yˈëxˈyoˈoy tuˈuk, ¿ti kyaj dyajwëˈëmët yëˈë tadë mäjtäˈpx mäjmokx mäjtaxkpë jamyë ujtsoty, es nëjx tˈëxtäˈäy tadë tuˈukpë?”. ¿Ti tyäˈädë yˈandijpy? Jesus jyënany: “Nandëˈënë dëˈën yëˈë mDeetyëty diˈibë ijtp tsäjpotm, kyaj ttseky tyëgoyët ni tuˈugë tyäˈädë ënäˈkuˈungëty” (Matewʉ 18:12-14).

Dios yajtsobatypy niduˈuk niduˈugë tyäˈädë “ënäˈkuˈungëty”. ¿Wiˈix tˈëxtäˈäy ja diˈib të yoˈoytyëgoy? Duˈun extëm jyënaˈanyë tekstë mä tsyondaˈagyë tyäˈädë artikulo, Dios yëˈë diˈib myëjwoopy.

Dios yëˈë diˈib jawyiin myëjwoobyë jäˈäy diˈib mëwingoonëp. Mä primer siiglë kyajxë Felipe parë tnaspäädët tuˈugë yajkutujkpë diˈib Etiopía, ets ttukmëtmaytyäˈägët wiˈix nyikejy tijatyë nety jam kyajpxypy diˈib të yajnaskäjpxë (Apostʉlʉty 8:26-39). Ets jatëgok, kyajxë apostëlë Pedro mä Cornelio tyëjk, diˈib tuun soldäädë wintsën Roma, yëˈë xëmë nety nyuˈkxtaˈaky ets ttunyë mëjää parë tmëdunyë Dios (Apostʉlʉty 10:1-48). Dios nan tyuˈumooyë apostëlë Pablo ets ja myëguˈuktëjk parë jyäjttë mëjnëëbëˈääy mä ja käjpn diˈib Filipos. Jam tˈixyˈäjttë Lidia diˈib “yˈawdäjtypy ja Dios”, etsë Dios ojts yaˈˈawatsxëtyë kyorasoon ets “tyukmëbëjkë” (Apostʉlʉty 16:9-15).

Extëm të nˈijxëm, Jyobaa yëˈë diˈib këˈëm myëjwoojë jäˈäy diˈibë nety ëxtääyëdëp parë yˈixyˈatëdët. Ets tyam, ¿pën diˈib nyinëjkxtëbë jäˈäy mä jyëën tyëjk o tmëwingondë tuˈääy parë ttukmëtmaytyäˈäktë Dios? Yëˈë Jyobaa tyestiigëty. Oknayajtëwëdë: “¿Yëˈëdaa Dios yajtuumpy parëts xymyëjwoy?”. Mënuˈkxtäˈägë Dios parë mbudëkëdët ets xymyëwingonët.a