Nˈokmëdooˈijtëmë Jyobaa yˈayuk oy mä nyajpatëm

“Mdatsk tmëdowäˈäny tuˈugë ayuk mˈëxkëˈëy diˈib jënäˈänëp: Tyäˈädë yëˈë duˈun ja tuˈu.” (IS. 30:21)

¿WIˈIX MˈATSOOJËMBITÄˈÄNY?

¿Ti tyuumbyë Satanás parë kyaj nmëdooˈijtëmë Jyobaa yˈayuk?

¿Tijatyë korasoon tsyejpy diˈib mbäät xyajtuˈudujkëm ets kyaj nmëdooˈijtëmë Jyobaa yˈayuk?

¿Ti mbäät nduˈunëm parë Jyobaa xytyuˈumoˈoyëm?

1, 2. ¿Wiˈixë Jyobaa tmëgajpxy pënaty mëduunëp?

NUˈUN kujkë xëë tiempë nyaxy, wiˈixëmë Jyobaa ttuˈumoˈoy pënaty mëduunëp. Tëëyëp, ojts näägë jäˈäy tmëgajpxy mët yëˈëgyëjxmë anklësëty, ttukˈijxy tijaty o dyajwingumääy parë ttuknijäˈäwë ti nety miimp këdakp o parë ttuknipëjky tijaty tyundëp (Núm. 7:89; Ezeq. 1:1; Dan. 2:19). Ets nääk ojts ttuˈumoˈoy mët yëˈëgyëjxmë jäˈäyëty diˈib yajtuun yä Naxwiiny. Per oy tiiyëm dyajtuunyë Jyobaa, pënaty mëmëdoojëdë ojts yajkunuˈkxtë mëjwiin kajaa.

² Tyamë Jyobaa xytyuˈumoˈoy mët yëˈëgyëjxmë Biiblyë, myëjää etsë naymyujkën (Apos. 9:31; 15:28; 2 Tim. 3:16, 17). Yajxon nyigëxëˈëky wiˈix xytyuˈumoˈoyëm, duˈunxyëp extëm pën ëxkëˈëy xyˈanmäˈäyëm: “Tyäˈädë yëˈë duˈun ja tuˈu. Yoˈoytyë yëˈë” (Is. 30:21). Nan yëˈë yajtuumbyë Jesus parë xymyëgäjpxëm, pes të ttuknipëky parë yëˈë ttuˈumoˈoyët ja naymyujkën mët yëˈëgyëjxm ja “tuumbë diˈibë kuwijy es tyiimpy ti wyintsën tsyejpy” (Mat. 24:45). Nan tsojkëp nmëjpëjtakëm wiˈixë Jyobaa xytyuˈumoˈoyëm ets nmëmëdoˈojëm, net mbäät njukyˈäjtëm winë xëë winë tiempë (Eb. 5:9).

3. ¿Ti mbäät xyajtuˈudëgoˈoyëm parë kyaj nmëmëdoˈojëmë Jyobaa? (Ixë dibujë mä tsyondaˈagyë tyäˈädë artikulo.)

³ Satanás nyijäˈäwëp ko pën nbanëjkxëm extëmë Jyobaa xytyuˈumoˈoyëm xyajnitsoˈogäˈänëm, pääty xyajtuˈudëgoyäˈänëm. Ets ja tuk pëky, mbäät xywyinˈëˈënëmë ngorasoonˈäjtëm ets kyaj nmëmëdoˈojëmë Diosë yˈanaˈamën (Jer. 17:9). Pääty, min nˈokˈijxëm wiˈix mbäät njëjpkudijëm tijaty mbäät xyajtëgoˈoyëm parë kyaj nmëdooˈijtëmë Diosë yˈayuk. Ets nanduˈun nˈixäˈänëm wiˈix ko mëdë Jyobaa ngäjpx nmaytyakëm, mbäät xypyudëjkëm parë oy mëët nˈijtëm, oy wiˈix nyaˈijx nyajpatëm.

TIJATYË SATANÁS XYTYUKˈYAJTËGOYÄˈÄNËM

4. ¿Wiˈixë Satanás dyajmäˈädäˈänyë jäˈäyë jyot wyinmäˈäny?

⁴ Satanás yajmäˈädaambyë jäˈäyë jyot wyinmäˈäny mëdë informasion diˈib kyaj tyëyˈäjtënëty ets dyajmëjwindëkë piˈtsˈëy piˈtskajpxy (käjpxë 1 Juan 5:19, Traducción del Nuevo Mundo [TNM]).a Tyam, oy myääjëty jyaˈˈatyë perioodikë, liibrë, rebistë, raadyë, telebisionk etsë Internet. Tyäˈädë mbäät xypyudëjkëm, per yajmëjwindëjkëbë tsojkën diˈib yajkubojkypyë Jyobaa yˈanaˈamën (Jer. 2:13). Extëm nˈokpëjtakëm, may jyënäˈändë ko kyaj yˈaxëëgëty ko pyëktë ak yetyëjk o ak toxytyëjk ets ta net may wyinmaytyë ko Biiblyë tyim yaˈˈaniˈigyëp tijaty (1 Kor. 6:9, 10).

5. ¿Wiˈix mbäät njëjpkudijëm tijatyë Satanás xytyukwinˈëënäˈänëm?

⁵ Pënaty tsyojktëbë Jyobaa yˈanaˈamën, ¿wiˈix mbäät tjëjpkudijëdë piˈtsˈëy piˈtskajpxy diˈibë Satanás yajtuumpy parë xywyinˈëënäˈänëm? ¿Wiˈix mbäät tnijawëdë diˈibë oy ets diˈibë axëëk? “Ko wijy kejy nyayaˈitëdët” extëmë Diosë yˈayuk jyënaˈany (Sal. 119:9). Diosë yˈAyuk xypyudëjkëm parë nnijäˈäwëm diˈibë tëyˈäjtën ets diˈibë kyaj tyëyˈäjtënëty (Prov. 23:23). Jesus jyënany: “Kyaj jyatyimˈyëˈëyëtyë tsäjkaaky mëët jyikyˈaty ja jäˈäy, tyukjikyˈatëp mët tëgekyë Diosë yˈayuk” (Mat. 4:4). Tyäˈädë yëˈë yˈandijpy ko tsojkëp nguytyuˈunëm tijaty njäjtëm mä Biiblyë. Extëm nˈokpëjtakëm, mä nety kyayajkujayënëm mä ja Ley ko kubojkp ko tuˈugë kasäädë jäˈäy tmëttsëënë wiinkpë, José nyijäˈäwëbë nety ko mëj poky parë Jyobaa ko tmëttsëënëdë nyëdoˈoxyë Potifar. Ets ninuˈun kyamiiny mä wyinmäˈäny tmëdëgoyëdë Jyobaa yˈanaˈamën oy ja toxytyëjk mëktaˈaky jyaˈˈanmääyë (käjpxë Génesis 39:7-9, Mʉgoxpʉ ja̱ noky mʉdiˈibʉ jyaayʉn Moisés [MNM]).b José kyaj tmëdooˈijty ko ja toxytyëjk mëktaˈaky yˈanmääyë parë mëët tsyëënët, yëˈë myëdooˈijt Jyobaa yˈayuk. ¿Ti tyäˈädë xytyukniˈˈijxëm? Parë nnijäˈäwëm ti oy ets ti axëëk, jëjpˈam ets nmëdooˈijtëmë Jyobaa yˈayuk ets kyaj nmëjpëjtakëm wiˈixë Satanás xywyinˈëënäˈänëm.

6, 7. ¿Wiˈix mbäät njëjpkudijëm tijatyë Satanás xytyukwinˈëënäˈänëm?

⁶ Tyäˈädë Naxwinyëdë të tyuktuky mëdë tukniˈˈijxënë diˈib kujoˈp ets mayë jäˈäy wyinmaytyë ko tsip tpäättëdë relijyonk diˈib tëyˈäjtën. Perë Jyobaa tyuˈumoopy pënaty tsyojkënyëˈäjttëp parë pojënë tpäädët ja tëyˈäjtën. Jeˈeyë ko tsojkëp nwinˈijxëm pën diˈib nmëdooˈitäˈänëmë yˈayuk. Ets kom tsiptakp nmëdooˈijtëm ko nimajtskë jäˈäy kyäjpxtë, tsojkëp nyoˈkmëdoˈojëmë Jesus ets nmëdooˈijtëm, pes yëˈë diˈibë Jyobaa të ttuknipëky parë tkuentˈattëdë byorreegëty (käjpxpë Fwank 10:3-5).

⁷ Jesus jyënany: “Mbëktëbë kuentë miits mët diˈibë mmëdoodëp” (Mar. 4:24). Jyobaa yajxon xykyäjpxwijëm ets tëyˈäjtën myëët, per tsojkëp nˈëxkujkëmë korasoon parë njaygyujkëm ets ngupëjkëm. Pën kyaj nnaygyuentˈäjtëm, mbäät yëˈë nmëdooˈijtëmë Satanás ets kyaj yëˈëjëtyë Diosë kyäjpxwijën. Ninäˈä nganasˈijxëm ets xynyinäjxëm tijaty jaˈäjtp yä naxwiiny extëmë ëy yaˈaxy diˈib kyaj yˈoyëty, pelikula, pënaty mëët nduˈukmujkëm, maˈestrëtëjk o pënaty nayajnäjxëdëp ko oy yˈëwij kyäjpxwijtë (Kol. 2:8).

8. 1) ¿Wiˈix mbäädë korasoon xywyinˈëˈënëm parë Satanás xyajtëgoˈoyëm? 2) ¿Ti mbäät xyjäjtëm pën kyaj nmëjpëjtakëm tijaty xyajtëgoyäˈänëm?

⁸ Satanás nyijäˈäwëp ko pokyjyaˈay nyajpatëm ets yˈëxtaabyë winmäˈäny wiˈix xyajtëgoyäˈänëm ets mbäät niˈigyë tsyiptaˈaky parë Jyobaa xëmë nmëduˈunëm (Fwank 8:44-47). Extëm nˈokpëjtakëm, waˈan kyaj nekymyënuˈkxtakëmë Jyobaa, kyaj nekynyëjkxëm käjpxwäˈkxpë o kyaj jëjwitsë nekynyëjkxëm mä naymyujkën. Tyäˈädë mbäät yëˈë xytyuknijäˈäwëm wiˈix yajpäätyë korasoon ets kujotmay pën kyaj nmëjpëjtakëm. Pën kyaj nnayaˈijtëm wijy, mbäät wanaty wanaty kyaj nekymyëdooˈijtëmë Jyobaa yˈayuk. Ets mbäät ok xyajtëgoˈoyëm diˈib ntsojkënyëˈäjtëm ets nduˈunëm diˈib axëëk, diˈibë nety ninäˈä të ngawinmäˈäyëm ndunäˈänëm (Rom. 7:15). ¿Wiˈix mbäät njëjpkudijëm parë kyaj ndëgoˈoyëm? Ko wijy kejy nnayaˈijtëm, nˈijxëm tijaty xyajtëgoyäˈänëm ets pojënë nnayaˈoˈoyëm. Pën yajxon nmëdooˈijtëmë Jyobaa yˈayuk, ninäˈä nëjkx ngamëdooˈijtëm pënaty të ttukpëtsëëmduˈuttë Diosë kyäjpn (Prov. 11:9).

9. ¿Tiko jyëjpˈamëty ets nbëjkëmë kuentë mä kyajnëm nduundëgoˈoyëm?

⁹ Ko tsojk yajnijawë ti päˈäm myëdäjtypy tuˈugë jäˈäy, mbäät yˈagëdaˈaky. Nanduˈun jyaty mët ëtsäjtëm, pën netyë nbëjkëmë kuentë ko tap nyaxkëdaˈagyë axëëkpë tsojkën ets pojënë nnayaˈoˈoyëm, ta kyaj “ja mëjkuˈugopk” xytyuktuˈunëm “oytyiity extëm yëˈë ttseky” (2 Tim. 2:26). Pääty, pën të nbëjkëmë kuentë ko të nyaxkëdaˈagyë axëëkpë tsojkën etsë axëëkpë winmäˈäny diˈib xytyukmëjagamgakëmë Jyobaa, ¿ti mbäät nduˈunëm? Pojënë nnijëmbijtëm mëdë yujyˈat tudaˈakyˈat, nyaˈˈawatsëmë kopk tatsk ets nmëdooˈijtëmë kyäjpxwijën amumduˈukjot (Is. 44:22). Ko kyaj oy tijaty nwinˈijxëm diˈib ndunäˈänëm, mbäät mëjwiin kajaa xyˈaxëktuˈunëm ets nyajnäjxëmë jäj jëmuˈumën. Pääty, mas oy ko nnayaˈoˈoyëm mä kyajnëm nduundëgoˈoyëm.

NˈOKJËJPKUDIJËM JA MËJˈAT KËJXMˈAT ETS KO TI NˈATSOJKËM

10, 11. 1) ¿Wiˈix mbäät nyigëxëˈëgyë mëjˈat këjxmˈat? 2) ¿Ti xytyukniˈˈijxëm extëm yˈadëtstë Coré, Datán etsë Abiram?

¹⁰ Tsojkëp nˈëxkäjpëm ko ngorasoonˈäjtëm mbäät xytyukmëjagamgakëmë Jyobaa. Extëm nˈokpëjtakëm, mëjˈat këjxmˈat ets ko ti nˈatsojkëm mbäät yëˈë xyajtuˈudujkëm ets kyaj nmëdooˈijtëmë Jyobaa yˈayuk ets xyajtuundëgoˈoyëm. Tuˈugë jäˈäy diˈib mëj këjxm, mbäät wyinmay ko nipën kyaduˈunëty extëm yëˈë. Ets ko mbäät ttuny ti tyim tunaampy ets ko kyaj pën wiˈix yˈanëˈëmxëdët. Ets mbäädë net wyinmay ko kyaj tiko kyäjpxwijëdët ja mëjjäˈäytyëjk etsë wiinkpë nmëguˈukˈäjtëm, ni yëˈë ja Diosë kyäjpn. Duˈumbë jäˈäy mbäät jantsy jagam yajpääty mëdë Jyobaa ets jeˈeyë mëjmëj tmëdoy wiˈix yˈanëˈëmxëty.

¹¹ Ko nety ja israelitëty yajpäättë mä ja lugäärë äänëˈëk tëëtsëˈëkpë, Coré, Datán etsë Abiram ojts tnibëdëˈëktë ja kyutujkënë Moisés etsë Aarón. Mët ko tyuktëjkëdë mëjˈat këjxmˈat, ta tjaˈˈawdatandë Jyobaa extëm yëˈë ttsoktë. ¿Ti tyuunë Jyobaa? Ojts dyaˈoˈktäˈäy (Núm. 26:8-10). Tyäˈädë, yëˈë xytyukniˈˈijxëm ko nnibëdëˈkëmë Jyobaa niwiˈixtsoo kyaˈoybyëtsëmy. Ets nan xytyukjamyajtsëm ko “mëjˈat këjxmˈat ja myiny mä pën kyaˈˈayoˈonbäätynyëm” (Prov. 16:18; Is. 13:11).

12, 13. 1) Okpëjtäˈäk tuˈugë ijxpajtën wiˈix mbäät xyajtëgoˈoyëm ko nˈatsojkëm. 2) Nimaytyäˈäk wiˈix mbäät myëjwindëkë atsojkën pën kyaj njëjpkudijëm.

¹² Ko ti yaˈˈatsoky nan axëktuump. Tuˈugë jäˈäy diˈib atsojkp xëmë wyinmay ko kyaj dyajtëgoyˈatyë Jyobaa kyäjpxwijën. Ets mbäät wyinmay ko mbäät tjaˈabëky diˈib kyaj tjaˈˈaty. Naamán, diˈib nyiwintsënˈäjtë tsiptuumbë diˈib Siria, ojts yaˈˈagëdaˈagyëtyë Eliseo ko netyë leprë päˈäm tmëdaty. Komë Naamán mëjwiin kajaa tjantsy myëjjäˈäwë, ta tmooyë Eliseo ja meeny sentääbë etsë wit xox, per kyaj tkupëjky. Perë Guehazí ja tyuumbë Eliseo, yˈatsojkë tyäˈädë regalë, pääty wyinmääy: “Duˈun extëm tyëyˈäjtënëty ko Jyobaa jyukyˈaty, ëjts nbaboˈoyaambyëts ets nˈaxäjëyaˈanyëts diˈib yëˈë jyaˈäjtypy”. Ta pëyeˈegyë tpatsoˈonyë Naamán ets kyaj ttuknijäˈäwë Eliseo, wyinˈëˈënë Naamán parë tˈamdooy “tuˈugë talentë diˈib platë ets majtsk niˈkxë wit”. Ets nan wyinˈëˈën ja Jyobaa kyugäjpxpë. ¿Wiˈix jyajtyë Guehazí diˈib atsojkp? ¡Ninäjxë ja leprë päˈäm diˈibë nety myëdäjtypyë Naamán! (2 Rey. 5:20-27.)

¹³ Ko ti nˈatsojkëm mbäät pojënë myëjwindëkë pën nasˈijxëm, pes wanaty wanaty tsyondaˈaky ets mbäät xyˈaxëktuˈunëm. Extëmë Biiblyë tnimaytyaˈagyë Acán, yëˈë xytyukˈijxëm ko pojënë myëjwindëkë ets xyajtëgoˈoyëm. Acán jyënany: “Kojëts nˈijxy mä tijaty të yajnikeˈeky tuˈugë wintsënë wyit diˈib Sinar, tuˈuk diˈib jantsy oy këxëˈkp, ets 200 siclo diˈib platë ets tukpedasë oorë, diˈib jeˈemtsy 50 siclo, tajëts njantsy atsojky, etsëts njaˈabëjky”. Acán ojtsxyëp tjëjpkudijë tyäˈädë axëëkpë tsojkën, per yëˈë naytyukmëmadakë, ta ojts tmeetsy ets tˈyuˈtsy mä ja wyitëjk. Jyobaa yajnigëxëˈk ko Acán myeˈtsy ets mä tadë xëë, ja mëdë fyamilyë yajkukäˈtstë (Jos. 7:11, 21, 24, 25). Kujotmay ko jäˈäy yˈatsoky, pes mbäät pojënë yajtëgoyëty. Pääty kyaj yˈoyëty tijaty nˈatsojkëm (Luk. 12:15). Ko jäˈäy wyinmay yˈity tsyëënë mëdë wiinkpë, yëˈë ja tuk pëky diˈib yaˈˈatsojkp. Mbäät näˈäganäˈäty myinyë axëëkpë jot winmäˈäny, per jëjpˈam ets nguentˈäjtëm ets kyaj nasˈijxëm parë myëjwindëkëdë axëëkpë tsojkën mä jot winmäˈäny ets xyajpokytyuˈunëm (käjpxë Santya̱ˈa̱gʉ 1:14, 15).

14. ¿Ti mbäät nduˈunëm pën nˈijxëm ko tap xytyuktëjkëmë mëjˈat këjxmˈat o ko nˈatsojkëm tijaty?

¹⁴ Duˈunë mëjˈat këjxmˈat ets ko tijaty nˈatsojkëm, mbäät mëjwiin kajaa xyˈaxëktuˈunëm. Ko nbawinmäˈäyëm wiˈix wyimbëtsëmy, yëˈë xypyudëkëyäˈänëm parë njëjpkudijëmë axëëkpë tsojkën ets duˈunyëm nmëdooˈijtëm ko Jyobaa xymyëgäjpxëm (Deut. 32:29). Mët yëˈëgyëjxmë Biiblyë, Jyobaa xyˈanmäˈäyëm ko ndukˈoyˈäjtëm pën nbanëjkxëm ja nëˈë tuˈu diˈib oy, ets ko axëëk wyimbëtsëmäˈäny pën tuˈudëgoˈoyëm. Pënë jot korasoon yˈatsojkypy tijaty o xytyuktëjkëmë mëjˈat këjxmˈat, oy ko nwinmäˈäyëm wiˈix wyimbëtsëmäˈäny, wiˈix yˈaxëktunäˈänyëty ja jiiky mëguˈuk ets wiˈix nˈitäˈänëm mëdë Jyobaa.

XËMË NMAYTYAKËM MËDË JYOBAA

15. ¿Ti xytyukniˈˈijxëmë Jesusë yˈijxpajtën?

¹⁵ Jyobaa xytyukmëtsojkëmë oyˈäjtën (Sal. 1:1-3). Xynyëˈëmoˈoy xytyuˈumoˈoyëm mä meerë nyajtëgoyˈäjtëm (käjpxë Ebreeʉsʉty 4:16). Axtë Jesus diˈib wäˈätsjäˈäy ijt, tsojkëbë nety xëmë myaytyäˈägët mëdë Jyobaa, pääty xëmë tmënuˈkxtaky. Jyobaa pudëjkë ets nëˈëmooy tuˈumooyë mëjwiin kajaa. Yajtuknigajxë anklës parë pyudëjkë, yajmooyë espiritë santë ets yajtuˈumooy ko twinˈijxy ja nimäjmajtskpë yˈapostëlëty. Jyobaa nan ojts kyajpxy desde tsäjpotm parë dyajnigëxëˈky ko pyudëjkëbë nety ja yˈUˈunk ets kyupëjkypy (Mat. 3:17; 17:5; Mar. 1:12, 13; Luk. 6:12, 13; Fwank 12:28). Duˈun extëmë Jesus, ëtsäjtëm tsojkëp nuˈkxtakëm xëmë ets nyaˈˈawatsëmë jot korasoon (Sal. 62:7, 8; Eb. 5:7). Ko duˈun nduˈunëm, nëjkxëp wingon nyajpatëm mëdë Jyobaa ets nëjkxëp njukyˈäjtëm extëm mbäät nyajmëjpëtsëˈëmëm.

16. ¿Ti mbäät nduˈunëm parë Jyobaa xypyudëjkëm ets nmëdooˈijtëmë yˈayuk?

¹⁶ Jyobaa niˈamukë xykyäjpxwijëm, per kyaj pën ttukˈaguanëˈaty parë myëmëdowëdët. Pën ntsojkëm ets xytyuˈumoˈoyëm, jëjpˈam ets nˈamdoˈojëmë yˈespiritë santë, mët ko yëˈë mëjwiin kajaa yˈoyjyaˈayëty (käjpxë Lukʉs 11:10-13). Perë Biiblyë jyënaˈany: “Mëdowdë yajxon”, tyäˈädë yëˈë yˈandijpy nbaduˈunëm extëm nmëdoˈojëm (Luk. 8:18). Extëm nˈokpëjtakëm, pën nˈanmäˈäyëmë Jyobaa parë xypyudëjkëm ets njëjpkudijëm mä jäˈäy axëëk yˈit tsyëënëdë, per duˈunyëm nˈijxëmë pornografía o pelikula mä jäˈäy axëëk yˈit tsyëënëdë, yëˈë nety nyajnigëxëˈkëm ko kyaj ntsojkëm etsë Jyobaa xypyudëjkëm. Parë xypyudëjkëm, tsojkëp nyajpatëm mä mbäät yajpäätyë Jyobaa yˈespiritë santë, extëm mä naymyujkën. Mayë nmëguˈukˈäjtëm mët ko tmëdooˈittë Diosë yˈayuk mä naymyujkën, ta tpëktë kuentë ko taptëmë nety të nyaxkëdaˈagyë axëëkpë tsojkën mä jyot kyorasoon ets ta nyayaˈoyëdë, duˈun kyaj tpäättë mëjwiin kajaa amay jotmay (Sal. 73:12-17; 143:10).

XËMË NMËDOOˈIJTËM WIˈIXË JYOBAA XYˈANMÄˈÄYËM

17. ¿Tiko kyujotmayëty ko këˈëm nnaytyukˈijxpajtëm?

¹⁷ Nˈokwinmäˈäyëmë rey David diˈib tëëyëp jukyˈäjt Israel. Ko yˈënäˈkˈäjty, yëˈë yaˈoˈkë Goliat, tuˈugë filistee jäˈäy. Ok, ta tyuuny soldäädë ets rey jam Israel. Oy tijaty tyuun ets kyuwan ja nax käjpn. Per ko këˈëm nyaytyukˈijxpajtë, ta wyinˈëˈënë kyorasoon. Mëjwiin kajaa pyokytyuuny mëdë Bat-seba ets axtë ojts tniˈanaˈamë parë ja nyaˈay Urías yˈoogët. Ko Jyobaa jyëjwijtsëmbijtë, kyupëjkë tyëgoˈoyën mëdë yujyˈat tudaˈakyˈat ets ta jatëgok oy yˈijty mëdë Jyobaa (Sal. 51:4, 6, 10, 11).

18. ¿Ti xypyudëkëyäˈänëm parë nmëdooˈijtëmë Jyobaa yˈayuk?

¹⁸ Nˈokpanëjkxëmë käjpxwijën diˈib yajpatp mä 1 Korintʉ 10:12 ets kyaj këˈëm nnaytyukˈijxpajtëm. Pesë Biiblyë jyënaˈany: “Kyaj yëˈë pyaatyëtyë naxwinyëdë jäˈäy diˈib tuˈuyeˈepy, këˈëm nyaynyëˈëmoˈoy nyaytyuˈumoˈoyëdët”. Kom kyaj njäjtëm këˈëm nnaytyuˈumoˈoyëm, mbäät nbanëjkxëmë Jyobaa yˈayuk o Satanás (Jer. 10:23). Pääty, nˈoknuˈkxtakëm xëmë ets nˈokpanëjkxëm extëm xytyuˈumoˈoyëmë Diosë myëjää. Nˈokmëdooˈijtëm yajxonë Jyobaa yˈayuk.

[Notë]

[Dibujë diˈib mä pajina 24]

Ko xëmë nduˈunëmë Diosë tyuunk, ¿wiˈix mbäät xykyuwäˈänëm mä tijatyë Satanás xytyukˈyajtëgoyäˈänëm? (Ixë parrafo 4 axtë 9)