¿Mgäjpx maytyakp mëdë Dios?

Pënaty oy naymyaayëdëp käjpx maytyaktëp xëmë, ko nyaybyäädëdë, mä telefënë, mä correo electrónico o ko nyaytyuknigaxëdë neky. Nanduˈun jyaty mëdë Dios, parë mëët nnaymyaˈayëm tsojkëp xëmë nmëtkäjpx nmëtmaytyakëm. Per ¿wiˈix mbäät duˈun nduˈunëm?

Ko nmënuˈkxtakëm. Per kyaj duˈunë Dios nmëgäjpxëm extëm ko nmëgäjpxëm tuˈugë naxwinyëdë jäˈäy diˈib nanduˈun extëm ëtsäjtëm. Ko nmënuˈkxtakëmë Dios, yëˈë nety nmëgäjpxëm ja diˈib mëj ijtp abëtsemy nyaxwinyëdë, diˈib tukëˈëyë të dyajkojtäˈäy, ets pääty jyëjpˈamëty nwintsëˈkëm. Ets parë Dios tmëdooˈitët wiˈix nˈanmäˈäyëm, tsojkëp nguytyuˈunëm tijaty xytyukˈanaˈamëm. Min nˈokˈijxëm tëgëk pëky.

Myëduˈuk, tsojkëp yëˈëyë Jyobaa nmënuˈkxtakëm, kyaj yëˈëjëtyë Jesus ets ni yëˈë diˈibë jäˈäy tyijtëp santë (Éxodo 20:4, 5). Biiblyë jyënaˈany: “Katë mmay mdäjtë, nik oy, pën ti tuun jäjtëp, käjxtäˈäktë es amdow pëjktsowdë Dios, es xyjaˈaygyëdäˈäktët nandëˈën” (Filipʉs 4:6). Myëmajtsk, tsojkëp nuˈkxtakëm xyëëgyëjxmë Jesukristë, ja Diosë yˈUˈunk. Yëˈë jyënany: “Ni pën kyajäˈty mä Dios Teety pën kyajts ëj xymyëbeky” (Fwank 14:6). Ets myëdëgëëk, diˈib nˈamdoˈojëmë Dios yëˈë diˈib tuˈugyëp mët diˈibë tsyojkënyëˈajtypy. Biiblyë jyënaˈany: “Kyaj ntsëˈk njäˈäjëm ko nˈamdoˈojëm tii ja Dios, mët ko nnijäˈäjëm ko ti nˈamdoˈojëm diˈibë ijtp tiˈigyë diˈibë yëˈë tsyejpy, yëˈë xymyëdoˈom” (1 Fwank 5:14).a

Kyaj mbäät jyekyë naymyayë, pën jeˈeyë niduˈuk myaytyaˈaky. Tsojkëp nimajtsk tnijawëdët näˈä mbäät kyäjpxtë ets näˈä mbäät tmëdooˈittë. Nanduˈun jyaty mëdë Dios, tsojkëp nmëdooˈijtëm ko xymyëgäjpxëm. Per ¿wiˈix xymyëgäjpxëm?

Tyam xymyëgäjpxëm mët yëˈëgyëjxmë Biiblyë (2 Timotee 3:16, 17). Nˈokpëjtakëm tuˈugë ijxpajtën, okpawinmay ko xyˈaxäjë tuˈugë neky diˈibë mëtnaymyaayëbë të mduknigexyëty. ¿Këdii ko xykyäjpxët duˈun xymyëdowët ko yëˈë jyawë mmëgäjpxëp? Nanduˈunën jyaty mëdë Biiblyë, ko ngäjpxëm duˈunxyëp extëmë Dios xymyëgäjpxëm. Päätyë Gina diˈib të yajmaytyaˈaky mä tim jawyiimbë artikulo jyënaˈany: “Pën ntsejpyëts etsëtsë Dios xyjawët extëmë myëtnaymyaayëbë, tsojkëbëts ngäjpxëdë nyeky o Biiblyë”. Ets ta yˈakjënäˈäny: “Kojëts tuˈuk tuˈugë xëë ngajpxyë Biiblyë, yëˈë diˈibëts niˈigyë xytyukmëwingoomp”. Ets mijts, ¿mgajpxypyë Biiblyë tuˈuk tuˈugë xëë? Pën mduumpy duˈun, yëˈë nety mnasˈijxëp etsë Jyobaa mmëgäjpxëdët ets niˈigyë xymyëwingonët.