¿Tiko Dios ttseky ets nmënuˈkxtakëm?

Dios xyˈanmäˈäyëm parë mëët nnaymyaˈayëm

Ko nimajtskë jäˈäy xëmë kyäjpx myaytyäˈäktë, ta kyëktëkë nyaymyayë. Dios xyˈanmäˈäyëm ets nmëtkäjpx nmëtmaytyakëm parë mëët nnaymyaˈayëm. Duˈun jyënaˈany: “Ets miitsëty xymyëgäjpxäˈändëts ets xynyiminäˈändëts ets xymyënuˈkxtäˈägäˈändëts, ets ëjts nmëdoowˈitäˈänyëts” (Jeremías 29:12). Ko xëmë nmëtmaytyakëmë Dios, ta niˈigyë nmëwingonäˈänëm ets yëˈë, ta nanduˈun xymyëwingonäˈänëm (Santya̱ˈa̱gʉ 4:8). Biiblyë duˈun twandaˈaky: “Jyobaa wingon yajpääty mä pënaty mmëgäjpxëp” (Salmo 145:18). Ko niˈigyë nmënuˈkxtakëm, ta niˈigyë kyëktëkëyaˈany ja naymyayë.

Dios xypyudëkëyäˈänëm

Jesus jyënany: “¿Pën niduˈuk miitsëty myoˈoyëp ja yˈuˈunk tuˈugë tsää ko yˈamdowdët ja tsäjkaaky, o tuˈugë awäˈäntsäˈäny ko yˈamdowdët ja äjkx? Kyaj pën, ¿këdii? Es miitsëty [...], mmooytyëp ja oyatypyë ja mˈuˈunk mˈënäˈkëty, waanë niˈigyë ja mDeetyë tsäjpotmëdë tmoˈoyët ja oyatypyë pënëty amdoojëdëp” (Matewʉ 7:9-11). Duˈunë duˈun, Dios tsyejpy ets nmënuˈkxtakëm, pes “naytyukjotmaytyuunëp” mët ëtsäjtëm ets xyjantsy pyudëkëyäˈänëm (1 Peedrʉ 5:7). Nan xyˈanmäˈäyëm parë nˈamdoˈowëmë naybyudëkë ko nmëdäjtëmë jotmay. Biiblyë jyënaˈany: “Katë mmay mdäjtë, nik oy, pën ti tuun jäjtëp [...] amdow pëjktsowdë Dios, es xyjaˈaygyëdäˈäktët nandëˈën” (Filipʉs 4:6).

Naxwinyëdë jäˈäy yajtëgoyˈäjttëbë Dios

Pënaty yˈëxpëjkpëtsëëmdëp wiˈixë jäˈäy jyaˈayˈattë, të tpëktë kyuentë ko miyonkˈamë jäˈäy yajtëgoyˈäjttëp ets nyuˈkxtäˈäktët. Axtë nuˈkxtaktëp diˈib kyaj tmëbëktë Dios ets diˈib kyaj yˈittë seguurë pën jamë Dios.a Tyäˈädë yëˈë yajtëyˈäjtëndëjkëp ko ojts ngojëm parë nˈëxtäˈäyëmë Dios. Jesus jyënany: “Jotkujk yajpäättë pënaty jyäˈäwëdëp ko yajtëgoyˈäjttëbë Dios” (Mateo 5:3 TNM). Tuk pëky wiˈix mbäät nˈëxtäˈäyëmë Dios, yëˈë ko xëmë nmënuˈkxtakëm.

¿Wiˈix ndukˈoyˈatäˈänëm ko nmënuˈkxtakëmë Dios?