Ko nuˈkxtakëm: ¿Wiˈix xypyudëjkëm?

Ko ti xytyuuntsondäˈägäˈäny, waˈan mnayajtëyëty: “¿Wiˈixëts ndukˈoyˈatäˈäny?”. Nan waˈan duˈun nnayajtëyëty ko mnuˈkxtaˈaky, per ¿yëˈë yˈandijpy ko yëˈëyë mˈëxtaapy diˈib mdukˈoyˈatëp? Kyaj yëˈë xëmë tˈandijy. Pes nnijawëyäˈänëm wiˈix ndukˈoyˈatäˈänëm ko nmënuˈkxtakëmë Dios. Axtë Job diˈib xëmë Dios mëduun, nyayajtëëwë: “Kojëts nmëgäjpxët, ¿waˈanëts xyˈatsowët?” (Job 9:16).

Mä jatuˈukpë artikulo të nˈijxëm ko kyaj jeˈeyë jäˈäy nyuˈkxtäˈäktë mët ko duˈun të tˈijxwëˈëmdë mä ryelijyonk, o mët ko oy nyayjawëyäˈänëdë. Yëˈë Diosë tëyˈäjtënbë myëdoowˈijtypyë nuˈkxtakën. Pën nnuˈkxtakëm extëm ttukjotkëdaˈaky ets pën oy diˈib ninuˈkxtakëm, yëˈë myëdoowˈijtypy. Axtë xyˈanmäˈäyëm ets nmëwingoˈonëm (Santya̱ˈa̱gʉ 4:8). Pääty, ¿wiˈix ndukˈoyˈäjtëm ko xëmë nnuˈkxtakëm? Min nˈokˈijxëm.

Jotkujkˈäjtën

Ko xypyaatyë amay jotmay, ¿mjäˈäwëp ko kyaj xymyëmadäˈägäˈäny? Biiblyë xyˈanmäˈäyëm ti mbäät nduˈunëm: “Nuˈkxtäˈäktë janääm jatsojk” ets “amdow pëjktsowdë Dios” (1 Tesalonicenses 5:17, TNM; Filipʉs 4:6). Pënatyë Dios yˈamdoowdëbë naybyudëkë, Biiblyë wyandakypy: “Dios mmoˈoyëdët yëˈë yˈagujkˈäjt jyotkujkˈäjtën, diˈibë waanë niˈigyë myëjëty [...]. Esë tyäˈädë agujkˈäjt jotkujkˈäjtën kyuwäˈänëp ja mjot mwinmäˈäny” (Filipʉs 4:7). Mbäät jantsy oy nnayjäˈäwëm ko nyaˈˈawatsëmë jot korasoon mä nDeetyˈäjtëmë tsäjpotmëdë ets ndukmëtmaytyakëm wiˈix nnayjäˈäwëm. Päätyë Biiblyë xyˈanmäˈäyëm: “Tuknijëduwë Jyobaa ja mtsëmy mgëˈëy, ets yëˈë mbudëkëdëp” (Salmo 55:22).

Abëtsemy nyaxwinyëdë mayë jäˈäy duˈun nyayjawëdë ko nyuˈkxtäˈäktë. Hee Ran, tuˈugë toxytyëjk diˈib Corea del Sur, jyënaˈany: “Mëjwiin kajaats nmëdatyë amay jotmay, per kojëts nnuˈkxtaˈaky duˈunëts njawë extëmëts ti nyajtuknikëëytyuˈuty ets mbäädëts nmëmadaˈaky”. Cecilia diˈib Filipinas, jyënaˈany: “Mëkëts nmëjotmaybyaatyë nnëëxëty. Nan nguentˈäjtypyëtsë ndääk diˈibëts kyaj xyˈokˈëxkäjpnë. Per kojëts nnuˈkxtaˈaky, yëˈëts oy xyajnayjäˈäwëp parëts nduny tijatyëts nikëjxmˈäjtypy tuˈuk tuˈugë xëë. Nnijäˈäwëbëts ko Jyobaa xypyudëkëyäämbëts parëts nguentˈattët”.

Xyjotkujkmoˈoyëm ets xymyëjämoˈoyëm ko nyajnäjxëmë amay jotmay

¿Kyaj xyˈoknijäˈäwënë ti mdunëp mët ko tijaty xymyëmay xymyëdäjy, oˈkën jëjpˈam yˈityë mjukyˈäjtënë o të xypyaatyë ayoˈon diˈib mëjwiin kajaa? Pën mmënuˈkxtakypyë Dios “diˈibë myëdäjtypy ja paˈˈayoˈon”, ta oy mnayjawëyaˈanyëty. Biiblyë xyˈanmäˈäyëm ko “Dios xyajjotkujkˈäjtëm mä tëgekyë nˈayoˈonˈäjtëm” (2 Korintʉ 1:3, 4). Extëm nˈokpëjtakëm, ko nety tëgokë Jesus jyantsy myay jyantsy tyajy, ta “nyaygyoxtënääytyakë es [nyuˈkxtaky]”. ¿Ti net tuun jäjtë? “Net nyimiinë tuˈugë anklës diˈibë tsäjpotm es jyotmëkmooyë.” (Lukʉs 22:41, 43.) Nehemías, jatuˈugë Dios mëduumbë, nan ojtsë jotmay twinguwäˈägë ko ja axëkjäˈäy jyayaˈooganë parë tmastuˈudëdë Diosë tyuunk. Yëˈë ta nyuˈkxtaky: “Yajmëktäˈägëtsë nˈääw ngëˈë”. Diˈib ok tuun jäjtë, yëˈë yaˈijxë ko Dios pudëjkë parë kyaj tsyëˈëgët ets ttunët diˈibë nety të yajtuknipëky (Nehemías 6:9-16). Reginald, diˈib Ghana, jyënaˈany: “Kojëts nnuˈkxtaˈaky mäjëts meerë amay jotmay nyajnaxy, duˈunëts njawë extëmëts tuˈugë jäˈäy të ndukmëtmaytyaˈagyë nˈamay njotmay diˈibëts mbäät xypyudëkë etsëts xyˈanëëmë parëts kyaj nëgoo nmay ndäjët”. Duˈunë duˈun, pën nmënuˈkxtakëmë Dios, yëˈë xyjotkujkmoˈoyëm.

Diosë wyijyˈäjtën

Ko ti xytyunäˈänët, mbäät dyajtëgatsyë mjukyˈäjtën ets nanduˈun ja jyukyˈäjtënë mfamilyë. ¿Ti mbäät nduˈunëm parë oy wyimbëtsëmët? Biiblyë jyënaˈany: “Pën miitsëty niduˈugëty mdëgoyˈäjtxëp ja wijyˈäjtën, [ets mas ko xypyäättë jotmay] amdowdë Dios, es ja Dios mmoˈoyëdëp; jaˈa ko yëˈë nyayajkypy yajxon” (Santya̱ˈa̱gʉ 1:5). Pën nˈamdoˈowëmë wijyˈäjtën, Dios xypyudëkëyäˈänëm mëdë myëjää parë nwinˈijxëm diˈib oybyëtsëmëp. Jesus jyënany: “Ja mDeetyë tsäjpotmëdë [tyuknigaxëp] yëˈë Espiritë Santë diˈibë amdoojëdëp” (Lukʉs 11:13).

Axtë Jesukristë yˈamdoowë naybyudëkë Tyeety mä nety tkatunyëm diˈib jëjpˈam. Ko ojts twinˈixy ja nimäjmajtskpë yˈapostëlëty, tuktsuˈum tmënuˈkxtakyë Dios (Lukʉs 6:12).

Duˈun extëmë Jesus, mayë jäˈäy jotkujk nyayjawëdë ko tˈixtë wiˈixë Dios të pyudëkëdë parë twinˈixtë diˈib oy wimbëtsëmëp. Regina, diˈib Filipinas, kanäk pëky tmaytyaˈaky ja jotmay diˈib pyat. Ko ja nyaˈay ojts yˈoˈknë, ta këˈëm tkuentˈäjtyë fyamilyë, nanduˈun dyajtëgooyë tyuunk ets naytyuˈuk dyajˈyeˈky ja nyëëxëty. ¿Ti pudëjkë parë oy wyimbëtsëëmy tijaty tyuknibëjtakë? Yëˈë jyënaˈany: “Kojëts nnuˈkxtaˈaky, tajëtsë Jyobaa xypyudëkë”. Kwabena, diˈib tsënaapy Ghana, xyˈanmäˈäyëm tiko Dios tˈamdoyë naybyudëkë: “Nmëdäjtypyëtsë netyë nduungë oybyë mäjëts njëngojy ndëjkojy, per tajëts nyajtëgooy. Kojëts nˈijxy tijatyëts mbäät nduny, xëmëtsë Dios nˈanmääy etsëts xypyudëkët parëts nwinˈixët diˈib oy wimbëtsëmëp. Ijtpëts seguurë ko yëˈëtsë Jyobaa xypyudëjkë parëts nwinˈijxy tuˈugë tuunk diˈibëts xymyoˈoyëp tijatyëts nyajtëgoyˈajtypy ets diˈibëts mbäät xypyudëkë parëtsë Dios nmëdunët”. Mijts nan mbäädë Dios mduˈumoˈoyëty ko xymyënuˈkxtäˈägët mä xypyaatyë jotmay diˈib mbäät mdukmëjagamgeˈegyëty.

Të nˈijxëm tuk pëky majtsk pëky wiˈix mbäät ndukˈoyˈäjtëm ko nuˈkxtakëm. (Parë xyˈaknijawët käjpxë rekuäädrë mä jyënaˈany, “Wiˈix ndukˈoyˈäjtëm ko nuˈkxtakëm”.) Pën mdukˈoyˈataampy ko xymyënuˈkxtäˈägëdë Dios, tsojkëp jawyiin xyˈixyˈatët ets xynyijawët tijaty xytyukwandakëm. ¿Tiko mgamaytyaˈaky mët tuˈugë Jyobaa tyestiigë parë Biiblyë mdukniˈˈixëdët?a Ko duˈun xytyunët, mbäät mdukmëwingonyëty ja “diˈib myëdoowˈijtypyë nuˈkxtakën” (Salmo 65:2).