Ja oyjyaˈay yˈaxäjëyaambyë kunuˈkxën

DESDE tëëyëp, ko ijty yajˈyakyë wintsëˈkën jëjpˈam nyaxy mä yaˈˈawdatyë Jyobaa. Ja israelitëty yëˈë ijty yäjktëbë jëyujk animal extëmë wintsëˈkën, ets ëtsäjtëm wiˈix nyäjkëmë wintsëˈkën, yëˈë ko “nˈawdäjtëm ja Dios mët ja nˈääˈäjtëm”. Per ta wiinkpë wintsëˈkën diˈib tyukjotkëdakypyë Dios (Eb. 13:15, 16). Pënaty yäjktëp, jotkujk yajpäättë ets yˈaxäjëdëbë kunuˈkxën, extëm yä nˈixäˈänëm.

Ana diˈib xëmë myëduunë Dios jyapäädan tuˈugë yˈuˈunk, per kyaj nety mbäät tpääty. Ko tmënuˈkxtakyë Jyobaa, ta ttukwandaky ko pën mmooyëp tuˈugë mixyuˈunk, ta yëˈë ttukëdëkëyaˈany parë myëdunëdët “nuˈun ja xyëëw jyukyˈäjtën” (1 Sam. 1:10, 11). Ko tiempë nyajxy, ta Ana ojts wyeˈemy uˈunkmëët, ets ta tpaty tuˈugë mixyuˈunk diˈib xyëëwmooy Samuel. Ko nety kyaj yˈoktsiˈtsnë, ta ojts yajmënëjkxy mä ja tabernakulo parë jam tmëdunëdë Jyobaa, duˈun extëmë Ana twandaky. Jyobaa kyunuˈkxë Ana ko dyajkyë tyäˈädë wintsëˈkën, pes ojts tˈakpääty nimëgoxkë yˈuˈunk etsë Samuel tyuuny kugajpxy ets nan yëˈë niduˈuk jyaayë Biiblyë (1 Sam. 2:21).

Duˈun extëmë Ana etsë Samuel, nan mbäädë Jyobaa ndukëdëjkëmë jukyˈäjtën parë nmëduˈunëm. Jesus wyandak ko mëjwiin kajaa nyajkunuˈkxäˈänëm, pën nnayojxëm mä Jyobaa tyuunk (Mar. 10:28-30).

Dorcas yëˈë tuˈugë Dios mëduumbë diˈib jukyˈäjt mä primer siiglë ets yaˈixyˈajty ko jantsy oyjyaˈay “es tpudëkë ja jäˈäy diˈibë ayoodëp”, o ja tuk pëky njënäˈänëm, nnayojxë parë tpudëjkë ja myëguˈuktëjk. Per jotmaymyëët njënäˈänëm, ko ta “pyäˈämbejty” ets yˈoˈky, ets ja myëguˈuktëjk diˈibë nety mëët tyuˈukmuktë jantsy nimoon jantsy nidujkëdë. Ko tnijäˈäwëdë ko Pedro wingon yajpääty, ta tnigajxëdë mëktaˈaky. ¡Okpawinmay wiˈix agujk jotkujk nyayjäˈäwëdë ko tˈijxtë Pedro jyaˈty ets ko dyajjukypyëjkyë Dorcas! Yëˈë ja tim jawyiimbë apostëlë diˈib yajjukypyëjkë oˈkpë diˈib yajmaytyakp mä Biiblyë (Apos. 9:36-41). Dios ninäˈä tkajäˈäytyëgooy tijatyë Dorcas tukmëduunë (Eb. 6:10). Tap ojts yajkujayë mä Biiblyë ets mbäät nbanëjkxëmë yˈijxpajtën.

Apostëlë Pablo nan xymyoˈoyëmë oybyë ijxpajtën, pes yajtuunë xyëëw tiempë ets pyudëjkë wiinkpëty. Duˈun tnijäˈäyë ja Dios mëduumbëty diˈib Corinto: “Mët tuˈugë oyjyot nyajtunëdëts tëgekyë diˈibëts nmëdäjtypy, es mët tëgekyëts ja nmëjää nbudëkëdët miitsëty” (2 Kor. 12:15). Pablo nayojxë ko tpudëjkë myëguˈuktëjk, nanduˈun ëtsäjtëm, jotkujk nnayjäˈäwëm ko nbudëjkëmë nmëguˈukˈäjtëm, ets diˈib mas jëjpˈam, yëˈë ko Jyobaa xykyunuˈkxäˈänëm ets xypyudëkëyäˈänëm (Apos. 20:24, 35).

Jyobaa jantsy oy nyayjawëty ko nyajtuˈunëmë xëëw tiempë etsë jot mëjääw mä ja tyuunk ets mä nmëguˈukˈäjtëm. Per ¿jamdaa ti diˈib mbäät nˈaktuˈunëm? Tam. Kyaj jeˈeyë tsyokyëty nbudëjkëmë nmëguˈukˈäjtëm, nan mbäädë Jyobaa nbudëjkëm ko nnayäjkëmë meeny sentääbë. Ko duˈun nduˈunëm, ta yˈakˈyajtuunˈadëˈëtsëdë Diosë tyuunk abëtsemy nyaxwinyëdë. Extëm nˈokpëjtakëm, ko nnayäjkëmë meeny sentääbë, nan yëˈë yajtukpudëjkëdëbë misioneerë etsë wiinkpë Dios mëduumbë diˈib aduˈugë xyëëw tiempë yajtuundëp mä Diosë tyuunk. Tyäˈädë meeny nan yëˈë tuump parë ëxpëjkpajn kyojy, yajkäjpxnaxy ets ko pyëtsëmyë bideo, nan yëˈë tuump ko tijaty yˈayoˈonbëjtaˈaky ets parë niˈigyë yajkojˈyë tëjk mäjaty nˈëxpëjkëm. Mbäät nˈijtëm seguurë ko pën oyjyaˈaytyakëm, ta nyajkunuˈkxäˈänëm. Ets nan nëjkxëp nyajmëjpëtsëˈëmëmë Jyobaa mët tijaty nmëdäjt njaygyajpëm (Prov. 3:9; 22:9).

Wiˈix nääk tpudëkëdë Diosë tyuunk abëtsemy nyaxwinyëdë

Duˈun extëm ttuundë ja Dios mëduumbëty ja tiempë mä jyukyˈajtyë apostëlë Pablo, nanduˈun tyam, kyoonwëˈëmdëp abëky ja meeny sentääbë diˈib yˈagoˈonëdëp mä ja käjë diˈib yajpatp mä tuˈukmujkën, mä jyënaˈany “Obra mundial” (1 Kor. 16:2). Ta netë tyäˈädë meeny yajkexy poˈoboˈo jam Betel. Per nan mbäät jam nidëyë xykyexy. Pën mnijawëyaampy wiˈix mbäät xykyexy, käjpx mä sukursal diˈib nyikëjxmˈäjtypy ja lugäär mä mtsëënë. Mä Internet www.jw.org/mco, jap xypyäädëdë direksion. Tyää yajnigajpxy wixaty mbäät xytyuny, pes wiˈixëm yajtuny mä tuˈuk tuˈugë lugäär:

YAJˈYAKYË MEENY SENTÄÄBË DIˈIB KYAJ YAJKOONËMBITY

Mbäät japyë mä bankë xykyajxnaxyë meeny o mëdë tarjeta de débito o crédito. Mä näägë Betel nan mbäät yajkexy mä sitio jw.org o mä wiinkpë sitio diˈib yajtuundëp.
Mbäät xynyayakyë meeny sentääbë, o tijaty tsobatp extëmë oorë platë. Ko duˈun xytyunäˈänët, ta xyjyaˈayët tuˈugë neky mä xynyigajpxy ko duˈunyë xynyayakäˈäny.

YAJˈYAKYË MEENY SENTÄÄBË DIˈIB YAJKOONËMBIJTP

Mbäät xyyakyë meeny sentääbë ets ko nety xyyajtëgoyˈaty, ta yajkoonëmbitët.
Yajkoj tuˈugë neky mä xynyigajpxy ko myajkypy ja meeny, per ko mtsojkypy parë jatëgok yajkoonëmbitët.

WIˈIX MBÄÄT NˈAKˈYÄJKËM TIJATY

Min nˈokˈijxëm kanäk pëky wixaty mbäät nbudëjkëmë Diosë tyuunk diˈib yajtuump abëtsemy nyaxwinyëdë. Pën mdunaampy extëm yajnigäjpxäˈäny, yajtëw jam Betel pën mbäät duˈun xytyuny. Net xynyijawët tijaty mbäät xyyaky parë xypyudëkëdë Diosë tyuunk. Mä tuˈuk tuˈugë paˈis tëgäjtspë ley, pääty jyëjpˈamëty ets xyyajnidëwët mä jäˈäy diˈibë duˈumbë nyijäˈäwëp ets wiˈix tijaty yajkugëbety.

Seguros de vida etsë plan o fondo de jubilación: Pën mmëdäjtypyë mseguurë mä të xykyujuyë mjukyˈäjtën o pën mmëdäjtypyë plan o fondo de jubilación, mbäät yëˈë xytyuknikëjxmˈaty tuˈugë corporación diˈib myëdäjttëbë Jyobaa tyestiigëty.

Kuentë diˈib mmëdäjtypy mä bankë: Pën mmëdäjtypyë meeny mä bankë, mbäät yëˈë xytyuknikëjxmˈaty tuˈugë corporación diˈib myëdäjttëbë Jyobaa tyestiigëty ko mˈoogët. Per duˈun xytyunët extëm ja bankë dyajnigutukë.

Acciones etsë bonos: Mbäät xynyamoˈoyë tuˈugë corporación diˈib myëdäjttëbë Jyobaa tyestiigëty. Nan mbäät xyyaˈoyë tuˈugë neky mä xynyigajpxy ko ja acciones etsë bonos jam yajkaxët ko mˈoogët.

Nax: Pën mijts jamë mnax o mdëjk diˈib mbäät yajtooky, mbäät xynyayaky mä tuˈugë corporación diˈib myëdäjttëbë Jyobaa tyestiigëty. Ets pën jam mtsëënë, mbäät xyyaˈoyë tuˈugë neky mä xynyigajpxy ko jaanëm xykyëyakäˈäny ko nety mˈoˈknë.

Testamentë etsë fideicomisos: Mijts mbäät tyam xyyaˈoyë tuˈugë testamentë o fideicomiso mä xynyigajpxy ko ja mnax, mjëën mdëjk o meeny sentääbë, yëˈë myëwëˈëmëbë sukursal diˈib myëdäjttëbë Jyobaa tyestiigëty ko nety mˈoˈknë. Ko duˈun xytyunët mbäät kyujënaky ja mgugëbety.

Pën mˈaknijawëyaampy wixaty mbäät xyyakyë meeny parë xypyudëkëdë Diosë tyuunk diˈib yajtuump abëtsemy nyaxwinyëdë, käjpxë foyetë Donaciones planificadas para favorecer el servicio del Reino en todo el mundo. Miimp Inglés ets amxan. Kom tëgäjtspë ley mä tuˈuk tuˈugë paˈis, mbäät kyaj nääk mduˈunxëty diˈib miimp mä tyäˈädë foyetë. Nan myaˈˈanmaapy ets ko xykyäjpxtäˈäyët, ta xyyajtëwët tuˈugë jäˈäy diˈib nyijäˈäwëbë ley ets wiˈix yajˈyakyë kugëbety. Mayë jäˈäy yäjktëbë meeny sentääbë parë tpudëkëdë Diosë tyuunk diˈib yajtuump abëtsemy nyaxwinyëdë ets ko duˈun ttundë, ta kyaj nëgoo kyugëbattë. Pën mä mbaˈis yajmëdäjtpë tyäˈädë foyetë, amdow diˈib tuump sekretaaryë mä mduˈukmuky.

Pën mˈaknijawëyaampy, tëkë mä jw.org, ets tim abatkëˈëy mmoˈoy klik mä jyënaˈany: “Nayakaambyëtsë meeny sentääbë parë Diosë tyuunk diˈib yajtuump abëtsemy nyaxwinyëdë”, o nan mbäät mgajpxy mä sukursal.