“Oy pryekusoorxyëp mijts mjatuny”
1. ¿Wiˈix jyënany tuˈugë nmëguˈukˈäjtëm ko tyuuny prekusoora?
1 Kathe Palm, tuˈugë prekusoora diˈib tuun nuˈunë yˈit lyugäärë Chile, jyënany: “Kyajxyëbëts mä nbatyë duˈumbë tuunk diˈibëts xyajnayjawëdëp jantsy jotkujk ets diˈibxyëbëts mëjwiin kajaa ndukˈoyˈajtypy”. Ko yaˈixy wiˈixë nmëguˈukˈäjtëm diˈib tuundëp prekusoor tˈaxäjëdë mëjwiin kajaa kunuˈxën, mbäät pën mˈanëˈëmxëty: “Oy pryekusoorxyëp mijts mjatuny”.
2. Nimaytyäˈäk tiko Diosë tyuunk mëjwiin kajaa dyakyë jotkujkˈäjtën.
2 Yajkypyë jotkujkˈäjtën. Jesus diˈib nbanëjxëmë yˈijxpajtën jantsy oy nyayjäˈäjë ko ojts ttuunë Tyeetyë tyuunk (Fwank 4:34). Pääty nyijäˈäbë naty yajxon tidën myaytyakypy ko tˈanmääy ja yˈëxpëjkpëty ko ja jaantsypyë jotkujkˈäjtën ja myiny ko nduˈunëm tijatyë Jyobaa jyaˈäjtypy. Ets duˈunë duˈun, ko tuˈugë jäˈäy xëmë ttuny tijatyë Dios tyukjotkëdakypy, ta jantsy jotkujk nyayjawëty. Ets ko niˈigyë tiempë dyajtuny, jyot myëjää etsë myeeny syentääbë parë tpudëkë jäˈäy, ta niˈigyë myëjwindëkë jyotkujkˈäjtën (Apos. 20:31, 35).
3. ¿Tijaty jotkujkˈäjtënë nbatëm ko kajaa nyajtuˈunëmë xëë tiempë mä Diosë tyuunk?
3 Ko nyajtuˈunëm kajaa xëë tiempë mä Diosë tyuunk, mbäät nyaˈëxpëjktsondakëm kanäägë jäˈäy, diˈib xymyoˈoyëm mëjwiin kajaa jotkujkˈäjtën. Mbäät tyam mwinmay ko kyaj jäˈäy ttsojkënyëˈattë Diosë yˈayuk, per ko mdunët prekusoor, ta niˈigyë xyjatäˈäny wiˈixë jäˈäy xymyëtmaytyäˈägët ets nëjxëp xypyekyë kuentë ko ta mayë jäˈäy diˈib ëxpëkandëp. Ko naty të mduny naa tuk jëmëjtën, ta myajwowäˈäny Mä yˈËxpëktë Prekusoor parë nëjx myajtukniˈˈixë mëjwiin kajaa diˈib mbäät mbudëkëty mä Dios xymyëduny (2 Tim. 2:15). Ets pën xëmë duˈun mduny, nëjxëp xyˈixy wiˈix wyimbëtsemy ko tyam xynyiˈipy ja tëyˈäjtën (Ecl. 11:6).
4. ¿Ti mbäät twinmaytyë ënäˈktëjk diˈib yajkëxanëbë yˈëxpëjkën?
4 Ënäˈktëjkëty, niwinmayëdë. Pën jam xyajkäˈpxanë mˈëxpëjkën, ¿të xywyinmay ti mdunaampy? Tyam waanë jeˈeyë tiempë xymyëdaty mët ko mˈeskuelëˈaty. Per ko mbëtsëmët, ¿wiˈixë tadë tiempë xyajtunäˈäny diˈibë naty jam myajtuumpy? En lugäär ets niˈigyë mˈaktimˈëxpëkët, ¿tiko xykyaˈˈanëëmë Jyobaa ko mjawinmaapy mdunäˈäny prekusoor regulaar? Tijaty mjataampy ko mdunët prekusoor, yëˈë mdukˈoyˈataampy nuˈunë mxëë mjukyˈäjtën, extëm ko xyjatët xymyëtmaytyäˈägët oytyimpënëty, xymyëmadäˈägët xytyunët diˈib mtsiptakxëp, mnayjëjwijtsëmbitëdët këˈëm ets xyjatët xyaˈëxpëkëdë jäˈäy.
5. ¿Wiˈix mbäät tyunyë tääk teety etsë naymyujkën parë nmëguˈukˈäjtëm tyundët prekusoor?
5 Uˈunktääk uˈunkteety, ¿mnëˈëmoopy mduˈumoobyë mˈuˈunk mˈënäˈk parë tyundët prekusoor? Wiˈix mgäjx mmaytyäˈäktë ets wiˈix ja ijxpajtën xyaktë mbäät pyudëkëdë parë yëˈëjëty tpëjtäˈäktët jëjpˈamë Diosë tyuunk (Mat. 6:33). Ray diˈib ojts tyuuntsondaˈaky prekusoor ko dyajkejxyë yˈëxpëjkën, duˈun tjamyetsy: “Yëˈë ndäägëts xëmë wyinmääy ko mëjwiin kajaa dyakyë jotkujkˈäjtën ko tuˈugë jäˈäy tyuny prekusoor”. Per niˈamukë ninuˈun naymyujkëm, nan mbäät nbudëjkëm ets nmëjämoˈoyëmë nmëguˈukˈäjtëm parë tyundët prekusoor. Extëmë José diˈib España jyënaˈany: “Niˈamukë nmëguˈukˈäjtëm määtsë naty nnaymyukyëty duˈun tˈixtë prekusoorˈäjtk extëmë mas oybyë tuunk parë ënäˈktëjk. Ko tkäjx tmaytyäˈäktë ets tmëjˈixtë tyäˈädë tuunk, ets mët kots xypyudëjkëdë, tats pojënë nduuntsondaky prekusoor”.
6. ¿Ti mbäät xytyuny pën kyaj xytsyojkënyëˈaty mdunäˈäny prekusoor regulaar?
6 ¿Ti mbäät nduˈunëm ko njëjptsëˈk njëjpjäˈäjëm? Mbäät pën jyënaˈany: “Kyajts ndimtsojkënyëˈaty ndunët prekusoor”. Pën nanduˈun mwinmay, tukmëtmaytyäˈägë Jyobaa wiˈix mnayjawëty ets mbäät xyˈanëëmë: “Kyajts nnijawë pën mbäädëts nduny prekusoor, per ndunaambyëts diˈib mdukjotkëdakypy” (Sal. 62:8; Pro. 23:26). Ta net xyˈëxtäˈäyëdë naybyudëkë mä Diosë kyäjpn ets mä Biiblyë. Mayë nmëguˈukˈäjtëm diˈib tyam tuundëp prekusoor regulaar jawyiin ojts tˈijxmatstë ko tyuundë prekusoor ausilyaar, ets kom jantsy jotkujk nyayjäˈäjëdë, ta ttukniwijtsëdë parë tyëjkëdë tuumbë prekusoor regulaar (Sal. 34:8).
7. ¿Ti mbäät xytyuny pën mjëjptsëˈkëp ko xykyayajkäˈpxët 70 oorë?
7 Ja tuk peky diˈibë nmëguˈukˈäjtëm jyëjptsëˈkëdëp yëˈë ko tkayajkäˈpxtët 70 oorë. ¿Tiko mgamaytyaˈaky mëdë prekusoorëty diˈib myëdäjttëbë duˈumbë jotmay? (Pro. 15:22.) Ta net xyukniwitsët näˈäjaty mbäät mnejxy tëjkˈayeˈebyë. Ets mbäät xypyekyë kuentë ko myajkäˈpxëbë mˈoorë pën kyaj xynyekytyuny diˈib kyaj tyimjëjpˈamëty (Éfe. 5:15, 16).
8. ¿Tiko yˈoyëty ets nˈijxëm näˈä ganäˈäty pën mbäät nduˈunëm prekusoor?
8 Ix pën mbäät mduny prekusoor. Tëgäjtspë jukyˈäjtën, pääty yˈoyëty ets näˈä ganäˈäty nˈijxëm pën mbäät nduˈunëm prekusoor. Extëm nˈokpëjtakëm, ¿kyaj ti nëgoo mnekyˈatsipyëty? Randy, tuˈugë nmëguˈukˈäjtëm ojts pyëtsemy mä tyuunk mä kyayajubilaratynyëm, duˈun jyënaˈany: “Kots tsojk nbëtseemy, tats nduundëjkë prekusoor mëdëtsë nnëdoˈoxy, ets tats ojts nëjxtë mä niˈigyë tsyekyëtyë naybyudëkë. Kajaatsë kunuˈxën nˈaxäjë, ets diˈib mas mëjwiin yëˈë ko kyajts ti xyˈatsipy mätsë njot nwinmäˈäny”.
9. ¿Ti mbäät tˈixtë kasäädë jäˈäy?
9 Ta kasäädë jäˈäy diˈib yˈijxtëp ko kyaj tyimjëjpˈamëty ets nimajtsk tyundët xëëˈam. Ets oyë net adëyë xyëë tiempë dyajnaxtë, mëjwiin kajaa ttukˈoyˈattë. Extëmë John jyënaˈany diˈibë nyëdoˈoxy myastutë tyuunk xëëˈam parë mas kajaa tmëdunäˈänyë Dios: “Nitiits duˈun oy xykyayajnayjawëty extëm kots nnijawë nnëdoˈoxy dyajnaxyë xyëë tiempë mä Diosë tyuunk”.
10. ¿Ti pudëjkëdëbë Dios mëduumbë parë tˈixtët pën mbäät tyundë prekusoor?
10 Nyaˈijxëmë tsojkën etsë mëbëjkën. Nitii tuunk kyajëjpˈamëty extëm ko ngäjxwäˈxëm, pes yëˈë Jyobaa diˈib duˈun jënäämp. Tim tsojkë tyäˈädë jukyˈäjtënë jyëjpkëxäˈäny ets yëˈëyë tsoˈogandëp diˈib nyigäjxtëbë Diosë xyëë (Rom. 10:13, NM). Pën ntsojkëm mëjwiin kajaa Jyobaa ets nmëjjäˈäjëm tijaty të xytyukmëduˈunëm, ta nmëmëdoˈojëm ja anaˈamën diˈibë yˈUˈunk yäjk, nˈëwäˈx ngäjxwäˈxëm amumduˈukjot (Mat. 28:19, 20; 1 Fwank 5:3). Ets pën nmëbëjkëm ko tyäˈädë tiempë jëjpkëxanëp, ta nduˈunëmë Diosë tyuunk nuˈun nmadakëm myentrës yˈakweˈemy ja tiempë, en lugäär nyajtuˈunëm mä tijaty jaˈäjtp yä naxwiiny (1 Kor. 7:29-31).
11. ¿Wiˈix mbäät nwinmäˈäyëm ko pën xyˈanmäˈäyëm: “Oy pryekusoorxyëp mijts mjatuny”?
11 Kyaj ndëjkëm tuumbë prekusoor mët ko ja oorë kajaa ngëyakäˈänëm, yëˈë duˈun mët ko njantsy tsyojkëmë Dios. Pääty ko pën mˈanëˈëmxëdët: “Oy pryekusoorxyëp mijts mjatuny”, mmëdoogukë, pes kyaj nëgoo mnayaˈˈanëëmë. Mënuˈkxtäˈägë Jyobaa pën mbäät mduny prekusoor extëm mayë nmëguˈukˈäjtëm tmëdundë Dios agujk jotkujk.
[Letrë diˈib miimp mä dibujë mä pajina 4]
Uˈunktääk uˈunkteety, ¿mnëˈëmoopy mduˈumoobyë mˈuˈunk mˈënäˈk parë tyundët prekusoor?
[Letrë diˈib miimp mä dibujë mä pajina 5]
Nitii tuunk kyajëjpˈamëty extëm ko ngäjxwäˈxëm, pes yëˈë Jyobaa diˈib duˈun jënäämp.