¿Tsojkëbëts niˈigyë nˈaktimtunëdë Diosë tyuunk?

1. ¿Ti mbäät axëëk yajnayjawëty tuˈugë Dios mëduumbë?

¹ ¿Të näˈä duˈun mˈoknayajtëëjëbë? Waˈan tyam axëëk mnayjawëty ko kyaj mbäät xynyekytyuunë Diosë tyuunk extëm ijty, mët ko tam mëjjäˈäyënë, o myajpatnë päˈäm mëët o niˈigyë ja tuunk xynyikëjxmˈäjnë mä mfamilyë. Tuˈugë nmëguˈukˈäjtëm diˈib nidëgëëgë yˈuˈunk jyënaˈany: Wiingëts nayjawëty kots kyaj nëgoo nekymyëdatyë tiempë etsë jot mëjää parëts nëjxët käjxwäˈxpë mët ko jamëts nyajtuny mätsë nfamilyë. Ko duˈumbë jotmay nbatëm, ¿ti mbäät xypyudëjkëm parë nˈijxëm pën mbäät mas niˈigyë nmëduˈunëmë Dios o pën kyaj?

2. ¿Ti Jyobaa jyëjpˈijxypy mä ëtsäjtëm?

² ¿Ti Jyobaa jyëjpˈijxypy mä ëtsäjtëm? Niˈamukë njatsojkënyˈäjtëm parë mas niˈigyë nmëdunäˈänëmë Jyobaa. Per taaˈäjtpë tëgatsyˈäjtën ko ti njatsojkënyˈäjtëm ndunäˈänëm ets mä ti mbäät jeˈeyë nˈaktuˈunëm. Ko niˈigyë nˈaktimtunäˈänëm, yëˈë yajnigëxeˈkypy ko kyaj yëˈëyë ndukjotkujkˈäjtëm diˈib nduˈunëm. Nˈokjamyajtsëm ko Jyobaa yajxon tnijawë tijaty nmëmadakëm, yëˈë kyaj xytyukˈanaˈamëm diˈib kyaj nmëmadakëm (Sal. 103:13, 14). Pääty, ¿ti Jyobaa jyëjpˈijxypy? Yëˈë ets nmëduˈunëm amumduˈukjot ets naygyëyäjkëm nuˈun ja madakën jyaˈty (Kol. 3:23).

3. ¿Wiˈix mbäät nnijäˈäjëm mäbäät ja madakën jyaˈty parë nduˈunëmë Diosë tyuunk?

³ ¿Wiˈix mbäät nnijäˈäjëm mäbäät ja madakën jyaˈty? Ko nˈanmäˈäyëmë Jyobaa ets xytyukˈijxëm wiˈixën meerë nyaˈijx nyajpatëm (Sal. 26:2). Nan mbäät nyajtëˈëjëm tuˈugë mëtnaymyaayëbë diˈib oy Dios mëduump, diˈib yajxon xyˈixyˈäjtëm ets diˈib kyaj tsyëˈëk jyawët parë xyˈanmäˈäyëm tëyˈäjtën mëët mä mbäät nayaˈoˈoyëm (Pro. 27:9). Jamyats nanduˈun ko mbäät okë jukyˈäjtënë tyëgatsy, pääty oy ko näˈä ganäˈäty nwinmäˈäyëm wiˈix nyaˈijx nyajpatëm (Éfe. 5:10).

4. ¿Wiˈix mbäät xyajnayjäˈäjëm ko nyajtukjamyajtsëmë Diosë tyuunk?

⁴ ¿Wiˈix mbäät nayjäˈäjëm ko nyajtukjamyajtsëm? ¿Të näˈä xyˈokˈijxpë wiˈixë jäˈäy yäˈäx jyoktë parë myadäˈägët ja jyaˈay mä jam pyëyëˈkijpxtë? Ko duˈun ttundë, yëˈë ets ja jyaˈay myadäˈägët, kyaj parë duˈunyë myoongëdäˈägët. Nan tim duˈun jyaty ko mä naymyujkën o mä ëxpëjkpajn nyajtukjamyajtsëm ets nyaˈˈanmäˈäyëm ko tsojkˈam yajkäjxwäˈxäˈänyë Diosë yˈayuk: yëˈë parë xypyudëjkëm, kyaj yëˈë xytyukjaygyukëyäˈänëm ko kyaj nëgoo ti nduˈunëm (2 Tim. 4:2). Pääty, mbäät nˈijtëm seguurë ko pën nduˈunëmë Diosë tyuunk mäbäät ja madakënë jyaˈty, Jyobaa nëjxp tjamyetsy ja nduunkˈäjtëm ets ja tsojkën diˈib të nyaˈijxëm (Ebre. 6:10).