Käjxwijën diˈibë Jyobaa yajkypy mä meerë tyëgoyˈaty
1. ¿Wiˈix ojts mbudëkëty tuˈukmujkënë tuk xëëbë ets wiˈix pyudëjkëdë wiinkpë nmëguˈukˈäjtëm?
1 Ko kyexyë tuˈukmujkënë tuk xëëbë, ta njënäˈänëm: “¡Yëˈë naty meerë nyajtëgoyˈäjtëm!”. Tuˈugë sirkuitë ojts jyënaˈany: “Ko jyëjpkejxy ja programë ta näägë nmëguˈukˈäjtëm ojts jyënandë ko yajmëjwindëkëyandëbë Diosë tyuunk”. Jatuˈugë sirkuitë jyënany: “Mëjwiin kajaa të xypyudëjkëm parë nˈijxëm ti tiempë tyam ndukjukyˈäjtëm ets pën oy o pën kyaj yˈoyëty diˈib të nduknibëjtakëm nduˈunäˈänëm”. Ets ja tuˈuk jyënany: “Mayë nmëguˈukˈäjtëm ojts jyënäˈändë ko kajaa ojts pyudëkëdë parë tpëjtäˈäktët jëjpˈamë Diosë tyuunk”. Ets mijts, ¿wiˈix ojts mbudëkëtyë tuˈukmujkënë tuk xëëbë?
2. ¿Tijaty yajnimaytyäˈägäämp mä tuˈukmujkënë tuk xëëbë?
2 Mä tuˈukmujkënë tuk xëëbë diˈib tsondäˈägäämp septiembrë, ja nˈaxäjëyäˈänëmë käjxwijën diˈibë Jyobaa yajkypy mä meerë tyëgoyˈaty. Ja txëˈatäˈäny: “Nˈokˈaˈoˈkëmë Jyobaa”, ets jap yajpääty mä Salmo 118:8, 9. Näägë diskursë diˈib naxäämp ja txëˈaty: “¿Wiˈixë Jyobaa xyjotmëkmoˈoyëm ko nyajnäjxëmë ayoˈon jotmay?”, “Nˈokpudëjkëmë jäˈäy parë Jyobaa tˈaˈoogëdët”, “Nˈokpanëjxëmë Jyobaa yˈijxpajtën parë xyˈaˈokëmë nmëguˈukˈäjtëm”, “Ënäˈktëjkëty, yajnigëxëˈëktë ko mdukˈijxpajttëbë Jyobaa” ets “Xykyuwäˈänëm ko nyajpatëm tuˈugyë mëdë nmëguˈukˈäjtëm etsë Jyobaa”.
3. ¿Tijaty mbäät nduˈunëm parë naytyukpudëjkëm ja tuˈukmujkënë tuk xëëbë?
3 ¿Tijaty mbäät nduˈunëm parë xypyudëjkëm? Jantsy jeˈeyë xynyijawët näˈä tyunäˈänyëty, ta xytyukniwitsët parë mnëjxët ets xywyowët pënaty myaˈëxpejkypy. Jamyats ko pënaty yäjktëp yajxon ja tyëëm, yëˈë diˈib yajwëˈëmdëp tijaty myëdoodëp (Luk. 8:15). Pääty, yajxon xymyëdooˈitët tijaty yajnimaytyäˈägäämp, ets yëˈëyë mgujayëp diˈib jëjpˈam ets diˈib mwinmaapy mbudëkëdët mä mjukyˈäjtën ets mä xymyëdunyë Dios. Ets ko ja tuˈukmujkënë kyëxët, ta xyjuudëdë tiempë ets mëdë mfamilyë xynyimaytyäˈägët tijaty të nyaxy, ets xynyigäjxtët wiˈix mbäät niduˈuk niduˈuk xyajtundë diˈib të xymyëdooˈittë.
4. ¿Tiko njantsy awijx njantsy jëjpˈijxëmë tuˈukmujkënë tuk xëëbë?
4 Tyäˈädë tuˈukmujkënë tuk xëëbë yajxon të yajtukniwitsë ets kontiempë, duˈun extëm ko yaˈoytyunyë kaaky tojxë jantsy jektsypyë o xuˈkxpë diˈib mbäät xyˈoytyuˈunëm. Jyobaa ngunuˈxëdëp parë mnëjxët ets mnaytyukpudëkëdët ja käjxwijën diˈib yëˈë yajkypy mä meerë tyëgoyˈaty (Mat. 24:45).