¿Tijaty mbäät nduˈunëm parë nganaräjtëm ja nmëguˈukˈäjtëmë jyamyëët diˈib kyaj Tyestiigëty?

1. ¿Tiko njënäˈänëm ko kyaj yëˈëyë ja nmëguˈukˈäjtëm ttseky ets ja jyamyëët tyëkët ëxpëjkpë?

¹ ¿Këdii mä naymyujkën tapë nmëguˈukˈäjtëm diˈib kyaj Tyestiigëtyë jyamyëët? Jyatsojktëbë tyäˈädë nmëguˈukˈäjtëm etsxyëbë jyamyëët tyëkëdë ëxpëjkpë. Per kyaj yëˈëyëty jeˈeyë, nanduˈun niˈamukë ninuˈun nˈëxpëjkëm, duˈun extëmë Dios, “tsyejpy es nidëgekyë [nyitsoˈogët] es nandëˈën tjaygyukëdët diˈibë dëˈën tëyˈäjtën” (1 Tim. 2:4). Per ¿wiˈix mbäät nganaräjtëmë nmëguˈukˈäjtëmë jyamyëët diˈib kyaj Tyestiigëty?

2. Parë nbudëjkëm ja diˈib kyaj Testiigëty, ¿tiko jyëjpˈamëty njaygyujkëm tijaty jotmay pyatypy?

² Tim jawyiin, oy ko nˈijxëm tijaty extëm tˈixy ja diˈib kyaj Tyestiigëty. Mayë tyäˈädë yetyëjk tsyojktëbë fyamilyë, kyuentˈäjttëbë kyudëjk ets oy yˈuˈunkteetyˈattë, jeˈeyë ko tëgatsyë mëbëjkën tmëdattë. Ja tuk peky, kyaj yajxon tˈixyˈattë pënën Testiigëty ets nan mbäät yˈanëˈëmxëdë wixatyë myëtnaymyaayëbë o jäˈäy diˈib xyˈaxëkˈijxëm. Ta netë yetyëjk o toxytyëjk diˈib yˈaxëkˈijxypy ko ja jyamyëët dyajtunyë xyëë tiempë mä “ryelijyonk” diˈib ijty yajtuumpy mä fyamilyë. Ko njaygyujkëm tijaty jotmay pyatypy, yëˈë mbäät xypyudëjkëm parë nˈoyjyaˈaytyakëm ets nyaˈijxëmë mayˈäjt wintsëˈkën parë mët ja jäˈäy diˈib kyaj yˈëxpëky, ets yëˈë nëjkx xypyudëjkëm parë kyaj ntsëˈkëm ko mëët nnaybyatëm (Pro. 16:20-23).

3. ¿Wiˈix mbäät nganaräjtëm ja nmëguˈukˈäjtëmë jyamyëët diˈib kyaj Tyestiigëty?

³ Nˈoknaytyukjotmaytyuˈunëm. Tuk peky wiˈix mbäät nganaräjtëm ja nmëguˈukˈäjtëmë jyamyëët diˈib kyaj Testiigëty, oy ko jawyiin ndukˈijxëm wiˈix tijaty nduˈunëm ets ok, ta ndukmëtmaytyakëmë Diosë yˈAyuk (1 Peed. 3:1, 2). Per diˈib mas jëjpˈam, yëˈë ko naytyukjotmaytyuˈunëm mët yëˈë. Extëmë toxytyëjk yëˈë mbäät nyaytyukjotmaytyunyëtyë myëëdoxytyëjk etsë yetyëjk yëˈë myëëyetyëjk. ¿Wiˈix?

4. ¿Wiˈix mbäät nyaˈijxëm ko naytyukjotmaytyuˈunëm?

⁴ Pën kyajnëm xyˈixyˈaty ja nyaˈay o ja nyëdoˈoxy, oy ko jawyiin xytyukmëtmaytyäˈägët ja nmëguˈukˈäjtëm ti mdunaampy. Ets ko tim ogäˈän xymyëwingonët ets kyaj oy mwinˈix mˈatsowëdët, kyaj yëˈë myaˈëxtëkëwäˈägëdët. Ko oy xyajnayjawëdët ets ko mnaytyukjotmaytyunëdët, mbäät yëˈë pyudëkëty ets dyajjëgaˈagët mä wyinmäˈäny extëmë naty wyinmay mä Testiigëty (Rom. 12:20). Extëm nˈokpëjtakëm, näägë nmëguˈukˈäjtëm wyoowdëp aˈuxˈäjtpë ja diˈib kyaj yˈëxpëky mëdë fyamilyë parë nyayˈixyˈatëdët yajxon ets duˈuntsoo dyajjëgaˈagëdë tyäˈädë jäˈäy wiˈixë naty wyinmay mä Testiigëty. Nan oy ko yëˈë tmaytyäˈäktët tijaty ja jäˈäy myaytyäˈägaampy, ets kyaj mëktaˈaky ttukmëtmaytyäˈäktëdë Diosë yˈayuk. Ets ok, ko naty ja jäˈäy nyayjäˈäwënë oy, mbäädë net ttukmëtmaytyaˈagyë Biiblyë. Nan mbäät ja jäˈäy nyejkxy mä naymyujkënë ets nëjkx tˈixy ti ja jyamyëët yˈëxpëjkypy ko tˈixyˈatëdë nmëguˈukˈäjtëm diˈib mëët nˈëxpëjkëm. Pën ja jäˈäy kyaj nyaˈˈëxpëkäˈäny, oy ko nmëjkumäˈäyëm ko tpudëkë ja jyamyëët.

5. ¿Ti mbäät ttundë mëjjäˈäytyëjk?

⁵ Pën mbäät mas niˈigyë tganaraty ja diˈib kyaj Tyestiigëty, yëˈë mëjjäˈäytyëjk, ets yëˈë pyëktëbë kuentë näˈä mbäät tmëtmaytyäˈäktë. Mbäät ja jäˈäy diˈib kyaj të ttsekyë Diosë yˈayuk, tmëdowäˈänët ja jotkujkˈäjtën diˈibë Biiblyë yˈawäˈänëp ko naty yajpääty mä hospital o ko naty të pyaatyëty tuˈugë mëk päˈäm. Pën mä tuˈugë familyë kyaj tuknax yˈëxpëktë ets jam tpäättë tuˈugë jotmay, extëm jam pën yˈoogët mä ja fyamilyë, yëˈë mëjjäˈäytyëjk mbäät tˈanëëmë parë myinët nanduˈun ja diˈib kyaj Tyestiigëty mä jam tjotkujkmoˈoy ja familyë diˈib ëxpëjktëp.

6. ¿Tiko mbäät nganaräjtëm ja nmëguˈukˈäjtëmë jyamyëët diˈib kyaj Tyestiigëty? Oknimaytyäˈäk.

⁶ ¡Okpawinmay wiˈix ja nmëguˈukˈäjtëm nëjkx jyantsy xyondäˈäktë ko ja jyamyëët tyëkëdët ëxpëjkpë! Perë Jyobaa nëjkxëp nanduˈun jyantsy xyondaˈaky mëdë yˈanklës ets ninuˈun nˈëxpëjkëm (Luk. 15:7, 10). Per pën ja jäˈäy kyaj yˈëxpëkäˈäny, mbäät duˈunyëm jotkujk nayjäˈäwëm, pesë Jyobaa tyukjotkëdakypy ko duˈun nbudëjkëm ja jäˈäy, pes yëˈë tsyejpy ets ja “pojpë jäˈäy jyodëmbittët, [...] këdiibë kyutëgoytyët” (2 Peed. 3:9).

[Letrë diˈib miimp mä dibujë mä pajina 6]

Parë nganaräjtëm ja nmëguˈukˈäjtëmë jyamyëët diˈib kyaj Testiigëty, näˈäty oy ko jawyiin ndukˈijxëm wiˈix tijaty nduˈunëm ets ok, ta ndukmëtmaytyakëmë Diosë yˈAyuk