Nˈokˈyajnigëxëˈkëm ja jäj tëˈkxën

1. ¿Ti tuunk të nyajtuknipëjkëm?

¹ Jantsy tsuj kyëxeˈeky ko xëë pyëtsemy ets kyujäjy kyudëˈkxy axtë ko tsyuˈujënë, ets yëˈë diˈibë Jyobaa yajmëjpëtsëëmëp. Per ko Jesus ojts tˈanëëmëdë yˈëxpëjkpëty ets tmëdattëdë tëˈkx jäjën, yëˈë myaytyak “mëtyiibë jaˈa jukyˈäjtëny wiinëëxëëbë yajkpëny” (Juan 8:12, Nuevo Testamento de Mazatlán). Dios yëˈë diˈibë të xymyoˈoyëmë tyäˈädë tëˈkx jäjën. Pääty, tsojkëbë net nyajnigëxëˈkëm parë ttukˈoyˈattëdë jäˈäy. Jesus jyënaˈany: “Waˈan yëˈë mjäjënëty tjäjy mëk extëm mbäät ja jäˈäy tˈixtë” (Mat. 5:16). Tyam, duˈunë jäˈäy yajpäättë extëmxyëp kubiˈits kuˈook, pääty tsyekyëty ndukniˈˈijxëm ja tëˈkx jäjën. ¿Wiˈix mbäät nyajnigëxëˈkëm duˈun extëmë Kristë?

2. ¿Wiˈixë Jesus dyaˈijxë ko jëjpˈam etsë jäˈäy tnijawëdë tëyˈäjtën?

² Yˈëwäˈkx kyäjpxwäˈkxtë. Jesus yajtuunë xyëë tiempë, jyot mëjää etsë meeny sentääbë parë jäˈäy ttukniˈˈijxë tëyˈäjtën, duˈun tëjkmdëjkm, mä jyuy tyooktë, tungëjxy kopkëjxy ets oymyääjëty mä jäˈäy ttimpaty. Nyijäˈäbë naty wiˈixë jäˈäy ttukˈoyˈatäˈäny ko tnijawëdët ja tëyˈäjtën (Fwank 12:46). Ets parë nimayë jäˈäy yajtukniˈˈixët, ta ja yˈëxpëjkpëty ojts tˈanëëmë: “Miitsëtyë dëˈën extëm ja jäjën es xytyukniˈˈixëdët ja jäˈäy” (Mat. 5:14). Ets jyantsy tyuundë duˈun, pyudëjkëdë jäˈäy ets tyukniˈˈijxëdë tëyˈäjtën.

3. ¿Wiˈix mbäät nyajnigëxëˈkëm ko nmëjjäˈäjëm ja tëyˈäjtën?

³ Tyamë Dios mëduumbëty jëjpˈam tpëjtäˈäktë tuunk diˈib të yajtuknipëktë ets “jikyˈattë extëmë pënëty yoˈoytyëp mä ja jäjën”, pääty yˈëwäˈkx kyäjpxwäˈkxtë mä jäˈäy ttimpäättë (Éfe. 5:8). Diˈib näˈäty tyuundëbë nmëguˈukˈäjtëm parë jäˈäy ttukmëtmaytyäˈäktë Diosë yˈayuk mä tyundë o mä yˈeskuelëˈattë, yëˈë ko pyoˈkxtë tkäjpxtë Biiblyë o wiinkpë ëxpëjkpajtën mä mbäädë jäˈäy yˈixëdë. Duˈun tuˈugë kiixy ttuuny mä yˈeskuelë ets duˈun dyaˈëxpëjktsondaky tuˈugë myëguˈuk ets abeky ja nimäjmajtsk tmooyë liibrë.

4. ¿Tiko mbäät njënäˈänëm ko nyajnigëxëˈkëmë naty ja tëˈkx jäjën ko oy njäˈäyˈäjtëm?

⁴ Oybyë jäˈäyˈäjtën. Parë nyajnigëxëˈkëm ja tëˈkx jäjën, nan oy ko nmëdäjtëm ja oybyë jäˈäyˈäjtën (Éfe. 5:9). Mä eskuelë, mä nduˈunëm ets oytyimmääjëty, tsojkëp nyajnigëxëˈkëm ko nDiosmëduˈunëm, net mbäädë jäˈäy ndukmëtmaytyakëmë Diosë yˈayuk (1 Peed. 2:12). Extëm nˈokpëjtakëm, tuˈugë mixyuˈunk diˈib mëgoxkë jyëmëjt jantsy oy jyaˈayˈaty eskuelë, pääty ja maˈestrë tnigajxë ja tyääk tyeety ets tˈanmääy: “¡Ninäˈänëmtsë naty duˈun ngaˈixy tuˈugë mixyuˈunk diˈib yˈijxypy yajxon diˈibën oy ets diˈibën axëëk!”. Duˈunë duˈun, ko nˈëwäˈkx ngäjpxwäˈkxëm ets ko nyaˈijxëmë oybyë jäˈäyˈäjtën, ta jäˈäy tpäädët ja tëˈkx jäjën diˈib mënëjkxëdëp mä “jukyˈäjtëny wiinëëxëëbë” ets nanduˈun ja Dios myëjpëtsëmët.