Jyobaa xytyukniˈˈijxëm parë nduˈunëmë tyuunk

1. Ko naxwinyëdë jäˈäy yajtuknipeky tuˈugë tuunk, ¿ti Jyobaa tyuumpy?

¹ Ko Jyobaa ttuknipekyë naxwinyëdë jäˈäy tuˈugë tuunk, xëmë tpudëkë parë tkuytyundët. Extëm nˈokpëjtakëm, ko Jyobaa tˈanmääyë Noé ets tkojët tuˈugë arkë diˈibë nety ninäˈänëm duˈun tkatuny, yajxon tyukmëtmaytyakë wiˈix tkojët (Gén. 6:14-16). Ets ko ja Moisés diˈibë nety yujy tudaˈaky, yajtuknipëjky parë tninëjkxëdë Faraón ets ja mëjjäˈäytyëjkëty diˈib Israel, ta Jyobaa yˈanmääyë: “Ëjts mijts xëmë njaymyëëtˈataamypy, [...] ëjts mijts ndukniˈˈixëp ti mgäjpxëp mëtyäˈägëbën” (Éxo. 4:12, Mʉgoxpʉ ja̱ noky mʉdiˈibʉ jyaayʉn Moisés). Nan duˈun tyam, Jyobaa xytyukniˈˈijxëm wiˈix ngäjpxwäˈkxëmë oybyë ayuk, extëm mä Yajniˈëxpëkë Diosë Tyuunk ets mä Yajniˈëxpëkë wiˈix ngäjpxwäˈkxëm. ¿Ti mbäät nduˈunëm parë ndukˈoyˈäjtëmë tyäˈädë ëxpëjkën?

2. ¿Wiˈix mbäät xypyudëjkëm mä Yajniˈëxpëkë Diosë Tyuunk?

² Yajniˈëxpëkë Diosë Tyuunk. Niˈëxpëkë jawyiin tuˈuk tuˈugë diskursë diˈib naxäämp mä naymyujkën. Duˈun niˈigyë xyjatët ko xyˈixët wiˈix ja diˈib yajnäjxtëbë diskursë tnimaytyäˈäktë (Pro. 27:17). Ets nan mënëjkxë mliibrë Benefíciese mä naymyujkën ets yajtun extëm tuˈugë kuadernë. Ko ja diˈib yajnäjxypy mä Yajniˈëxpëkë Diosë Tyuunk tnigäjpxët mä të tyundë ja diˈib të dyajnaxtë diskursë, ajäˈäy diˈib të xyˈixy ko jëjpˈam ets diˈib myajtunaampy, ets këxjäˈäy mliibrë pëˈääy. Per diˈib niˈigyë xypyudëjkëm yëˈë ko nyajnäjxëmë diskursë. ¿Të myajkujayë parë xyajnaxët? Ko myaˈˈanëëmët parë xyajnaxëdë diskursë, tuundäˈäk yajxon wiˈix xyajnaxäˈäny ets duˈun xytyunët extëm të myaˈˈanëëmë. Ets ta net xyajtunët mä mnëjkxy ëwäˈkx käjpxwäˈkxpë.

3. ¿Wiˈix mbäät xypyudëjkëm mä Yajniˈëxpëkë wiˈix ngäjpxwäˈkxëm?

³ Yajniˈëxpëkë wiˈix ngäjpxwäˈkxëm. Parë yajxon njamyajtsëm tijaty të nyaxy mä Yajniˈëxpëkë wiˈix ngäjpxwäˈkxëm, tsojkëp jawyiin nikäjpxëm tijaty naxäämp parë ngomentaräjtëm. Ets kyaj nëgoo nyajajkëm parë nanduˈunë nmëguˈukˈäjtëm kyomentarattët. Mëdooˈit yajxon wiˈix nyaxyë demostrasyonk ets ix diˈib mbäät mbudëkëty parë mas oy xymyëtmaytyäˈägëdë jäˈäy. Ko mä Wiˈix nduˈunëmë Diosë Tyuunk myinëdë artikulo diˈib mbäät mbudëkëty, pëjkëˈëk mä mbäät pojënë xypyaaty.

4. ¿Wiˈix mbäät nyajtuˈunëm tijatyë Jyobaa xytyukniˈˈijxëm?

⁴ Extëmë Noé etsë Moisés yajtuknipëjktë tuunk, nanduˈun tyam të nyajtuknipëjkëm ngäjpxwäˈkxëmë oybyë ayuk abëtsemy nyaxwinyëdë, oy nuˈun xytsyiptakxëm (Mat. 24:14). Per mbäät agujk jotkujk nduˈunëm, pën ndukˈijxpajtëmë Jyobaa diˈib xyaˈëxpëjkëm, ets pën nyajtuunkpatëm yajxon tijatyë Jyobaa xytyukniˈˈijxëm (Isa. 30:20).