Nˈokˈijxëm wiˈix yˈoybyëtsëmy ko mëk nduˈunëm
1. ¿Ti mbäät xyaˈëxtëkëwäˈkëm ets kyaj nekytyukxondakëm mä ngäjpxwäˈkxëm?
1 Dios ojts dyajkojˈyë naxwinyëdë jäˈäy parë “tˈixët ko oybyëtsëëmp ko mëk tyuny yˈayoy” (Ecl. 2:24). Pääty, ko ngaˈijxëm yˈoybyëtsëmy mä ngäjpxwäˈkxëm, mbäät nˈëxtëkëwäˈkëm ets kyaj nekytyukxondakëm. ¿Ti mbäät xypyudëjkëm parë nwinmäˈäyëm ko oybyëtsëëmbë tyäˈädë tuunk?
2. ¿Tiko mbäät nwinmäˈäyëm extëm tijaty yˈixëty?
2 Nˈokwinmäˈäyëm extëm tijaty yˈixëty. Niwaanë jäˈäy diˈib ojts tˈaxäjëdë ja Jesusë tyukniˈˈijxën, per kyaj mbäät njënäˈänëm ko kyaj yˈoybyëtsëëmy tijatyë Jesus tyuun (Fwank 17:4). Ko tmaytyaky tuˈugë ijxpajtën mä ja jäˈäy diˈib ja triigë ojts twëjy, ta ojts tnaskäjpxë ko Diosë yˈayuk kyaj myuxäˈäny mä niˈamukë jäˈäyë kyorasoon (Mat. 13:3-8, 18-22). Per min nˈokˈijxëm wiˈix wyimbëtsëmy ko nduˈunëmë mëjää.
3. ¿Wiˈix mbäät ndëëmˈäjtëm oyë jäˈäy tkamëdowäˈäny?
3 ¿Wiˈix mbäät may ndëëmˈäjtëm? Mä ja ijxpajtën diˈibë Jesus myaytyak, jyënany ko pënaty yˈaxäjëdëp ja Diosë yˈayuk tëëmˈatandëp (Mat. 13:23). Ko mok yony ets xyäjˈaty, yëˈë yajkypyë mokpäjk, kyaj yëˈëjëtyë mokˈyoon. Nanduˈun jyaty ko tuˈugë Dios mëduumbë dyakyë tyëëm, kyaj yëˈë jeˈeyë tˈandijy ko dyajtëkë jäˈäy ëxpëjkpë, nan yëˈë duˈun ko dyajwaˈkxy may ja tëëm ko xëmë tnimaytyaˈaky ja Diosë yˈAnaˈamën. Tyäˈädë jantsy oy wyimbëtsëmy, ets mbäät agujk jotkujk xyajnayjäˈäwëm oyë jäˈäy tmëdowäˈän tkamëdowäˈänët. Ko ngäjpxwäˈkxëm nan yëˈë nyajwatsëmë Jyobaa xyëë (Is. 43:10-12; Mat. 6:9). Nan jotkujk nnayjäˈäwëm ko yëˈë mëët nduunmujkëmë Dios (1 Kor. 3:9). Etsë Jyobaa nan tyukjotkëdakypy ko “nˈawdäjtëm [...] mët ja nˈääˈäjtëm” (Eb. 13:15, 16).
4. Mä ngäjpxwäˈkxëm, ¿ti kyaj nnijäˈäwëm wiˈix wyimbëtsëmäˈäny?
4 Nan mbäät kyaj nbëjkëmë kuentë ko tyäˈädë tuunk oy wyimbëtsëmy. Näägë jäˈäy diˈibë Jesus myëtmaytyak, waˈan jaanëm ojts pyanëjkxëdë ko nety të yˈoˈknë. Nan mbäät duˈun jyaty mët ja tëëm diˈib nnipëm mä jäˈäyë kyorasoon, mbäät yony oknëm, ets mbäät kyaj nnijäˈäwëm ko tadë jäˈäy të tyëkë ëxpëjkpë. Mëjwiin kajaa oy wyimbëtsëmy ko nduˈunëmë Diosë tyuunk. Pääty nˈoktëëmˈäjtëm, ets nˈokˈyaˈijxëm ko yëˈë Jesus xyˈëxpëjkpëˈäjtëm (Fwank 15:8).