Këdii këˈëm mnayajtuˈudukyëty ko xyjëjptsëˈëk xyjëjpjawë
1. ¿Tiko nääk kyaj tˈanëëmëdë jäˈäy ko yaˈëxpëkandëp?
1 ¿Mtsiptakxëp xyˈanëëmëdë jäˈäy ko myaˈëxpëkaampy mët ko xyjëjptsëˈëgë ko oy xykyayaˈëxpëkët? Näägë Dios mëduumbë diˈib tëëyëp jukyˈäjttë, extëmë Moisés etsë Jeremías, nan nnayjäˈäwëdë ko kyaj mbäät ttundë ja tuunk diˈib yajtuknipëjktë (Éx. 3:10, 11; 4:10; Jer. 1:4-6). Pääty, kyaj wyiˈixëty ko duˈun näˈäty nnayjäˈäwëm. Per ¿ti mbäät xypyudëjkëm?
2. ¿Tiko kyaj mbäät jeˈeyë nëjkxëm käjpxwäˈkxpë tëjkmdëjkm ets ndukmëˈijxëmë nmëguˈukˈäjtëm parë yëˈë dyaˈëxpëkëdë jäˈäy?
2 Tuk pëky, yëˈë ko njamyajtsëm ko Jyobaa ninäˈä xykyaˈˈanmäˈäyëm nduˈunëm diˈib kyaj nmëmadakëm (Sal. 103:14). Pääty pën yëˈë xytyukˈanaˈamëm etsë jäˈäy nyaˈëxpëjkëm, yëˈë duˈun mët ko mbäät duˈun nduˈunëm (Mat. 28:19, 20). Jyobaa kyaj yëˈëyë tyäˈädë tuunk të ttuknipëky diˈib kuwijy kuwinmäˈäny o diˈib ëxpëky (1 Kor. 1:26, 27). Pääty kyaj mbäät jeˈeyë nëjkxëm käjpxwäˈkxpë tëjkmdëjkm etsë net ndukmëˈijxëmë nmëguˈukˈäjtëm parë yëˈë dyaˈëxpëkëdë jäˈäy.
3. ¿Wiˈixë Jyobaa xytyukniˈˈijxëm parë mbäädë jäˈäy nyaˈëxpëjkëm?
3 Jyobaa yëˈë xytyukniˈˈijxëm. Jyobaa yëˈë xytyukniˈˈijxëm wiˈix mbäät nyaˈëxpëjkëmë jäˈäy (2 Kor. 3:5). Mët yëˈëgyëjxmë kyäjpn, xytyuknijäˈäwëm ja tëyˈäjtënë diˈib kyaj tnijawëdë ëxpëkyjyaˈay diˈib yä naxwiiny (1 Kor. 2:7, 8). Mä Biiblyë kanäk pëky jap myiny wiˈix tyukniˈˈijxë Jesus, diˈib mas oy yaˈëxpëjk. Ets mä naymyujkën xëmë nyaˈˈanmäˈäyëm wiˈix mbäät nduˈunëm. Nan nmëdäjtëmë ëxpëjkpajn diˈib xypyudëjkëm, extëmë liibrë ¿Ti tukniˈijxëbë Biiblyë?, diˈib nyimaytyakypy wingëjxy ets tsuj yajxon ja tëyˈäjtënë diˈib jëjpˈam yajpatp mä Biiblyë. ¡Pääty kyaj jyatsiptaˈaky nyaˈëxpëjkëm tuˈugë jäˈäy!
4. ¿Tiko mbäät nˈijtëm seguurë ko Jyobaa xypyudëkëyäˈänëm?
4 Moisés mëdë Jeremías tyuundë diˈib yajtuknipëjktë mët ko Jyobaa pyudëjkëdë (Éx. 4:11, 12; Jer. 1:7, 8). Pääty, nˈokˈanmäˈäyëm nanduˈunë Jyobaa parë xypyudëjkëm. Ets mbäät nˈijtëm seguurë ko yëˈë xypyudëkëyäˈänëm, pes jantsy jotkujk nyayjawëty ko ndukniˈˈijxëmë jäˈäy ja tëyˈäjtënë mä pënën yëˈë (1 Fwank 3:22). Pääty, nˈokpëjtakëmë winmäˈäny parë nyaˈëxpëjktsondakëm tuˈugë jäˈäy. Nëjkxëp ndukxondakëm ets nan nëjkxëp nˈaxäjëm mëjwiin kajaa kunuˈkxën.