Diˈib nnayajtëˈëwëm

◼ ¿Diˈibatyë käjpxwijënë mbäät xypyudëjkëm ko nyajtuˈunëmë selulaar mä naymyujkën ets mä ngäjpxwäˈkxëm?

“Parë tukëˈëyë, ak ta nyidiempë.” (Ecl. 3:1.) Selulaar tuump parë ngajxëmë mensaje ets parë oytyim näˈäjëty nmëgäjpxëmë jäˈäy. Per ëtsäjtëm, tsojkëp nˈijxëm näˈä kyaj mbäät nyajtuˈunëm. Extëm nˈokpëjtakëm, mä naymyujkën yëˈë nˈawdäjtëmë Jyobaa, jap mä nˈëxpëjkëm ets naymyëjämoˈoyëm nixim niyam (Deut. 31:12; Sal. 22:22; Rom. 1:11, 12). ¿Këdii oyxyëp ko nyajpiˈtsëmë selulaar ets jaanëmë mensaje nˈijxëm ko nbëtsëˈëmëm mä naymyujkën? Pën tim jëjpˈam nyajmëgäjpxäˈänëm ets kyaj mbäät nyajpiˈtsëm, oyxyëp ko nduknibaˈanëm parë kyaj nyaˈamët.

Tsojkëp nduˈunëm “tëgekyë tyäˈädë mët yëˈëgyëjxm ja oybyë ayuk” (1 Kor. 9:23). Näˈäty, tuumbë selulaar mä nˈëwäˈkx ngäjpxwäˈkxëm. Extëm nˈokpëjtakëm, ja diˈib nyikëjxmˈäjtypyë grupë, mbäät dyajtunyë selulaar parë tmëgäjpxëdë myëguˈuktëjk diˈib të nyëjkxtë wiink territooryë. Nan mbäät tuˈugë nmëguˈukˈäjtëm dyajtuny parë tmëgäjpxët ja diˈib yaˈëxpëjkypy o diˈib nyijëmbitaampy jatëgok, pën jagam tsyëënë ja jäˈäy. Per oy ko nˈijxëm wiˈix nyajtuˈunëm ja selulaar parë kyaj xynyaˈamëm mä jam meerë jäˈäy nmëtmaytyakëm (2 Kor. 6:3). Ets pën yëˈë nˈawixäˈänëm ja nmëguˈukˈäjtëm, kyaj yˈoyëty ets nmëgäjpxëm mä telefënë tuˈugë mëtnaymyaayëbë o nduknigajxëmë mensaje. Nik oy ko ja jot winmäˈäny nbëjtakëm mä ngäjpxwäˈkxëm ets nˈijxëm ja nmëguˈukˈäjtëm diˈib jam mëët ngäjpxwäˈkxëm.

Nˈokˈëxtäˈäyëm ti wiinkpë tyukˈoyˈatëp (1 Kor. 10:24; Filip. 2:4). Kyaj yˈoyëty nwinmäˈäyëm ko pën kyaj tsojk njäjtëm mä pyëtsëmäˈändë käjpxwäˈkxpë, mbäät nmëgäjpxëm o nduknigajxëmë mensaje parë nyajtëˈëwëm diˈib territooryë yajtunäämp. Pes ko ok njäjtëm, ta jatëgok yajtukniwitsëyaˈany pën mëët nëjkxëm. Per näˈäty, mbäät ti tyuny jyatyëty diˈib xyajtuˈuwëˈëmëm parë kyaj tsojk njäjtëm. Ko nduˈunëmë mëjää parë tsojk njäjtëm, yëˈë nety nyajnigëxëˈkëm ko nwintsëˈkëm extëmë Jyobaa tijaty tniˈanaˈamë, ets ko nwintsëˈkëm ja diˈib jyuˈtypyë grupë ets ja nmëguˈukˈäjtëm.