¿Nyajtëgatsäˈänëm wiˈix ngäjpxwäˈkxëm?
1. Ko tyam tyëgäjtsˈadëˈëtsyë jukyˈäjtën, ¿ti net mbäät nduˈunëm?
1 Tyam, tëgäjtsˈadëtspë jukyˈäjtën, duˈun yaˈijxkijpxyë extëm mä jäˈäy yaˈixypyëtsëmdë, yajtëgäjtstëp janäämëty ja lugäär ets ja jäˈäy diˈib yaˈixypyëtsëëmdëp. Pääty nanduˈun jyëjpˈamëty ets näˈäganäˈäty nyajtëgäjtsëm wiˈix ngäjpxwäˈkxëm, wiˈix ja jäˈäy nmëtmaytyakëm ets nyajtëgäjtsëm ja oorë näˈä ninëjkxëm. Per ¿ndunäˈänëm duˈun?
2. ¿Ti mbäät nduˈunëm parë nbanëjkxëm extëm nyijkxyë Jyobaa kyäjpn?
2 Wixatyë jäˈäy nmëtmaytyakëm. Diosë kyäjpn xëmë dyajtëgatsy wiˈix mbäädë jäˈäy nmëtmaytyakëm. Ko Jesus tkejxy ja yˈëxpëjkpëty käjpxwäˈkxpë, tim jawyiin ojts tˈanëëmë ets kyaj tmënëjkxtët ti nyiduˈuyoˈoytyëp ets ni meeny sentääbë (Mat. 10:9, 10). Per ok, kom nyijäˈäwëbë nety ko yaˈˈaxëkˈixandëp ets ko mëjwindëkëyäämp ja tuunk oymyääjëty, ta dyajtëgäjtsy wiˈix mbäät nduˈunëm (Luk. 22:36). Mä tadë siiglë të nyaxy, Diosë kyäjpn të dyajtëgatstë wiˈixë jäˈäy yajmëtmaytyäˈägët, duˈun extëm dyajtëgoyˈattë naybyudëkë. Extëm nˈokpëjtakëm, të dyajtundë tarjetë, programë mä raadyë etsë karrë mä ojts tpëjtäˈäktë bosinë parë dyajkäjpxtë. Tyam, ta mayë it lugäär mä tsipë jäˈäy yajpäättë mä jyëën tyëjk, pääty nyaˈˈanmäˈäyëm ets ngäjpxwäˈkxëm mä jäˈäy ndimpatëm ets naybyëjtakëm mä may yajpäättë, duˈun mayë jäˈäy nmëtmaytyakëm. Ets parë nbatëm diˈib tuundëp xëbääty, ta nyaˈˈanmäˈäyëm ets ngäjpxwäˈkxëm ko kyootsënë. Duˈunë duˈun, Jyobaa kyarrë diˈib tsäjpotm yëˈë diˈib yajtëgäjtsypy ja nëˈë tuˈu. ¿Nbanëjkxëm extëm nyijkxy? (Ezeq. 1:20, 21.)
3. ¿Ti mbäät nduˈunëm parë mas oyë jäˈäy nmëtmaytyakëm?
3 Wiˈix nyajtsondakëmë maytyaˈaky. ¿Ti diˈib tyamë jäˈäy jotmaytyuunëp mä ngäjpxwäˈkxëm? ¿Meeny sentääbë? ¿Familyë? ¿Ko jäˈäy nyayaˈook nyayajtëgoyëdë? Ko nnijäˈäwëm tijaty tuun jäjtëp ets wixatyë jäˈäy yaˈix yajpäättë, yëˈë diˈib xypyudëkëyäˈänëm parë niˈëxpëjkëm wiˈix mas oyë jäˈäy nmëtmaytyakëm (1 Kor. 9:20-23). Ko ja jäˈäy tnigäjpxët ti jotmaytyuunëp, oy ko yëˈë mëët nmaytyakëm ets kyaj nekyyajnëjkxëm ja maytyaˈaky diˈibë nety të niwinmäˈäyëm.
4. ¿Tiko mbäät tyamyë nduˈunëm extëm tijaty yajtukniwitsë?
4 Tim tsojk kyugëxëyaˈanyë tyäˈädë jukyˈäjtën ets tsyondäˈägäˈäny ja mëk ayoˈon. “Waanë jeˈeyë nˈakmëdäjtëm ja tiempë.” (1 Kor. 7:29.) Pääty, jëjpˈam ets tyamyë nduˈunëm extëm tijaty yajtukniwitsë. Duˈuntsoo nduˈunëm ja tuunk nuˈun waanë tiempë yˈakwëˈëmy.