¿Mduumbyë mëjää parë myajtuunkmoˈoyët mä naymyujkën?
1. ¿Desde näˈä mbäät tuˈugë yetyëjk ttuny extëm jyënaˈanyë 1 Timotee 3:1?
1 Mä 1 Timotee 3:1 jyënaˈany: “Pën ja pën ttseky es tyunët ja mëbëjkpëtëjk kuentˈäjtpë, oyë tadë tuunk diˈibë tsyejpy”. Tyäˈädë ää ayuk yëˈë myëjämoobyë yetyëjkëty parë ttundëdë mëjää ets yajtuunkmoˈoytyët mä naymyujkën. Per ¿awixtëp axtë koonëm myëjjäˈäy myëˈˈënäˈkëdët parë duˈun yajtuunkmoˈoytyët? Kyaj. Mas oy ko tsojk tyuuntsondäˈäktët. Mbäät desde tyam yajtukniˈˈixëdë parë tyundët diˈib pyudëjkëbë mëjjäˈäy (1 Tim. 3:10). ¿Të mnëbajnë? Pën të, min nˈokˈijxëm ti mbäät xytyuny parë mdunët mä naymyujkën.
2. ¿Wiˈix mbäät xyajmëjwindëkë mtsojkën parë xyakëdë naybyudëkë, ets tijaty mbäät xytyukmëdunyë wiinkpë?
2 Yajmëjwindëkë mtsojkën parë xyakëdë naybyudëkë. Ko xypyäädäˈänët ja tuunk mä naymyujkën, kyaj yëˈëjëty parë jeˈeyë mxëë xypyëkët, yëˈë duˈun parë ttukˈoyˈatëdë mëguˈuktëjk. Pääty, jëjpˈam ets xymyëdatëdë tsojkën parë xypyudëkëdë mëguˈuktëjk. Diˈib mbäät mbudëkëty, yëˈë ko xypyawinmayëdë yˈijxpajtënë Jesus (Mat. 20:28; Fwank 4:6, 7; 13:4, 5). Pën mtsiptakxëp mnaytyukjotmaytyunëdët ja mëguˈuktëjk, amdowë Jyobaa nyaybyudëkë (1 Kor. 10:24). ¿Ja ti diˈib mbäät xytyukpudëkë mëguˈuktëjk diˈib pëjkëp o diˈib të myëjjäˈäyënë? Nan mbäät mduny mä yˈaˈoyë Tëjk mä nˈËxpëjkëm, extëm mä wyaˈatsy o xykyuentˈatët ja pëjy ujts. Nan oyxyëp ko mnayˈawanëty parë xyajnaxëdë diskursë mä Yajniˈëxpëkë Diosë Tyuunk pën kyaj jyaˈty ja diˈib patëp. Agujk jotkujk nëjkx mnayjawëty ko xypyudëkëdë mëguˈuktëjk (Apos. 20:35).
3. ¿Ti mas jëjpˈam tsojkëp parë mdunët mä naymyujkën, ets wiˈix xypyäädët?
3 Yajkëktëkë mnaymyayë mëdë Dios. Pënaty tunäämp mä naymyujkën, tsojkëp oy yˈitët mëdë Dios, kyaj jeˈeyë tsyekyëty tmëdatëdë wijyˈäjtën o tjatët tijaty ttunët. Tuˈugë yetyëjk diˈib oy ijtp mëdë Dios, tyuumbyë mëjää parë tijaty tˈixy extëmë Jyobaa mëdë Jesus (1 Kor. 2:15, 16). Myëdäjtypyë oybyë jäˈäyˈäjtën extëmë “espiritë santë xyajjikyˈäjtëm” (Gal. 5:22, 23). Pyëjtakypy jëjpˈamë Diosë tyuunk ets jyotmoopy mä kyäjpxwaˈkxy (Mat. 6:33). Parë oy mˈitët mëdë Dios, tsojkëp xytyukniwitsët parë naytyuˈuk mˈëxpëkët: xykyäjpxëdë Biiblyë jabom jabom, xykyäjpxtäˈäyëdë rebistë Diˈib Xytyukˈawäˈänëm etsë ¡Despertad! ets xyˈëxpëkët tijaty naxäämp mä naymyujkën ets kyaj mdëgoyˈatët (Sal. 1:1, 2; Eb. 10:24, 25). Pablo myëjämooy ja mixy diˈib xyëˈäjt Timoteo parë wyimbajtˈadëˈëtsët mä Diosë tyuunk, duˈun tˈanmääy: “Kuentˈat [...] ja mˈëxpëjkën” (1 Tim. 4:15, 16). Pääty, ëxpëk tijaty myajnaxaampy mä Yajniˈëxpëkë Diosë Tyuunk ets wiˈix mgäjpxwäˈkxäˈäny, ets nëjkx jëjwitsë. Pëjtäˈägë mwinmäˈäny ets tunë mëjää parë niˈigyë xytyunëdë Diosë tyuunk, extëm mdunët prekursoor, Betel o mnëjkxët Mä tˈëxpëktë Biiblyë Yetyëjk diˈib Naytyuˈukˈäjttëp. Ko xyajkëktëkëdë mnaymyayë mëdë Dios, yëˈë nëjkx mguwäˈänyëty parë kyaj xypyanëjkxët “ja ënäˈktëjkëtyë wyinmäˈäny” (2 Tim. 2:22).
4. ¿Tiko jyëjpˈamëty nduˈunëm tijaty yajxon ets nyajtukjotkujkˈäjtëm?
4 Tun tijaty yajxon ets myajtukjotkujkˈatët. Mä primer siiglë, ojts yajwinˈixtë yetyëjkëty diˈib mbäät yajtukjotkujkˈattë ets diˈib mbäät yajxon tijaty ttundë parë dyajwäˈkxtëdë käˈäy ukën ko jyamˈäjtyë yuu. Ja apostëlëtëjk tyukjotkujkˈäjttë ja yetyëjkëty ko yajxonë nety tyunäˈändë, duˈuntsoo ja apostëlëtëjk ttuundë diˈib mas jëjpˈam (Apos. 6:1-4). Tyäˈädë yëˈë mdukniˈˈijxëp ko tsojkëp xytyunët yajxon ko ti myajtuknipëkët. Panëjkxë Noé yˈijxpajtën diˈib duˈun meerë ttuuny extëm yaˈˈanmääy tkojëdë arkë (Gén. 6:22). Ko tuˈugë jäˈäy yajxon tijaty ttuny, yajtsobatypyë Jyobaa ets yëˈë yajnigëxëˈkypy ko oy mëët yˈity (1 Kor. 4:2; käjpxë rekuäädrë “Oy ko yajtukniˈˈixëdë”).
5. ¿Tiko yˈoyëty etsë ënäˈktëjk ttundëdë mëjää parë tnikëjxmˈattëdë tuunk mä naymyujkën?
5 Duˈun extëm ojts yajnaskäjpxë, Jyobaa ta tyam ttukjotëgoy mä myuky ja pëjtaˈaky (Is. 60:22). Jëmëjt jëmëjt ja nyëbattë jäˈäy naa 250,000. Kom jantsy mayë jäˈäy tyëkëdë mä Diosë kyäjpn, pääty tyëgoyˈatyë yetyëjk diˈib oy Dios mëduump ets diˈib mbäät tnikëjxmˈatyë tuunk mä naymyujkën. Ninäˈänëm duˈunë Diosë tyuunk kyajaˈˈaty extëm tyam (1 Kor. 15:58). Pääty, oyë tadë tuunk diˈibë ënäˈktëjk tsyojktëp ko tnikëjxmˈatäˈändë tuunk mä naymyujkën.
[Dibujë mä pajina 2]
Kom jantsy mayë jäˈäy tyëkëdë mä Diosë kyäjpn, pääty tyëgoyˈatyë yetyëjk diˈib oy Dios mëduump ets diˈib mbäät tnikëjxmˈatyë tuunk mä naymyujkën
[Dibujë mä pajina 3]
Oy ko yajtukniˈˈixëdë
Pudëjkëdëbë ënäˈktëjk diˈib oy tuundëp ko mëjjäˈäytyëjk tyuknipëkëdë ets tyukniˈˈixëdë tuunk. Extëm nˈokpëjtakëm, ko tëgok kyugëjxë reunyonk, ta tuˈugë sirkuitë nyaxweˈtsy mä plataformë mët tuˈugë nmëguˈukˈäjtëm parë tpudëkëyaˈany. Ko tˈijxy tuˈugë mixyuˈunk naa taayë tyanë, ta dyajtëëy pën yëˈë awijxëp parë myëtmaytyäˈägäˈänyëty. Ta ja mixyuˈunk jyënany ko yëˈë nety nyikëjxmˈäjtypy dyajwäˈätsët ja plataformë koogoo kyëxëdë reunyonk. Ja tyääk tyeety tapë nety yˈawijxëndë, per ja mixyuˈunk kyaj nyëjkxäˈäny pën kyaj ttuny diˈib nyikëjxmˈäjtypy. Ta ja sirkuitë wyaˈtstëgäjtsy ets ok, ta jyënany: “Yëˈë mëjjäˈäytyëjk diˈib mä tadë naymyujkën, xëmë ttukniˈˈixëdë yaˈayˈënäˈkuˈunk diˈib oy Dios mëduundëp parë tyundët mä naymyujkën. Pääty, tëgok tëgokëts ijty njäˈty mä tyäˈädë naymyujkën, xëmë jyaˈˈaty tuˈugë mixy diˈib yajkajxpë nyeky parë tyunët diˈib pyudëjkëbë mëjjäˈäy”.