Diˈib nnayajtëˈëwëm

◼ Mä tuˈugë käjpxwäˈkxpë kyayajkupëkynyëm parë nyëbatët, ¿ti mbäät dyajnigëxëˈëky mä kyäjpxwaˈkxy ets mä naymyujkën?

Diˈib mas jëjpˈam mbäät tuˈugë jäˈäy ttuny, yëˈë ko tniwinmayët parë nyëbatët. Pääty mä mëjjäˈäytyëjk tkakupëktënëm ets tuˈugë jäˈäy nyëbatët, jawyiin mbäädë jäˈäy tjaygyukë ti diˈibë Dios tsyejpy ets ttunët. Nan të nety dyajnigëxëˈëky ko jyantsy myëmëdowaambyë Diosë yˈanaˈamën.

Dios mëduumbë yajtukˈanaˈamdëp ets kyaj tyëgoyˈattët mä naymyujkën, pääty ja diˈib nëbatäämp, tsojkëp tmëdatëdë duˈumbë kostumbrë (Eb. 10:24, 25). Ets nan komentaratëp mä naymyujkën. Nan waˈan të yajkujayë mä Yajniˈëxpëkë Diosë Tyuunk, per mbäät tuˈugë jäˈäy nyëbety oy të kyayajkujayë.

Dios mëduumbë nan të yajtuknipëktë parë tkäjpxwäˈkxtëdë oybyë ayuk ets tpudëkëdë jäˈäy parë nanduˈun Dios mëdundët, pääty ja diˈib nëbatäämp tsojkëp jëjwitsë nyëjkxët käjpxwäˈkxpë (Mat. 24:14; 28:19, 20). ¿Näk poˈo mbäät kyäjpxwaˈkxy mä kyanëbetynyëm? Tsojkëp dyajnaxëdë tiempë yˈëwäˈkx kyäjpxwäˈkxët parë dyajnigëxëˈëgët ko të ja jyot wyinmäˈäny tpëjtaˈaky tjotmoˈoyaˈanyë Diosë tyuunk tuˈuk tuˈugë poˈo (Sal. 78:37). Per kyaj tiko nyaxët jekyë tiempë, mbäät jeˈeyë nyaxy poˈoˈam. ¿Ets nääk oorë mbäät tyuny tuˈukpë poˈo? Kyaj yajmëdaty tuˈugë anaˈamën. Yëˈë mëjjäˈäytyëjk mbäät tpëktëdë kuentë wiˈix niduˈuk niduˈuk yajpäättë ets tjaygyukëdët (Luk. 21:1-4).

Ko mëjjäˈäytyëjkëty, o ja diˈib pyudëjkëbë mëjjäˈäy pën mä ja naymyujkënë kyaj nëgoo mëjjäˈäytyëjk, tyuˈukmuktët mët ja jäˈäy diˈib nëbatäämp, tsojkëp tjamyatstët ko tëgatsyaty tuˈuk tuˈugë jäˈäy ets tˈixtët pën mbäät nyëbety o kyaj. Ja diˈib nëbatäämp, tsojkëp dyajnigëxëˈëgët ko jantsy itäämp Jyobaa tyestiigë, ko myëjjäˈäwëp ko tyuˈukmuky mëdë Diosë kyäjpn ets ko nyijkxy käjpxwäˈkxpë. Yëˈë mëjjäˈäytyëjk, jyaygyujkëdëp ko ja diˈib nëbatäämp kyaj duˈun të wyimbety ets nan kyaj tijaty tnijawë extëm diˈib tëëyëp nëbajt. Pënë mëjjäˈäytyëjk yˈijxtëp ko kyaj mbäät nyanëbety, ta tsuj yajxon ttukmëtmaytyäˈäktët extëmë Biiblyë jyënaˈany tiko kyaj mbäät nyëbety ets tˈixët wiˈix mbäät yˈakˈyajpudëkë.