Tuˈugë naybyudëkë parë yajxon nduˈunëmë Diosë tyuunk
1. Nigäjpx majtsk pëky tiko të pyëtsëmyë artikulo “Conversaciones con un testigo de Jehová”.
1 Mä La Atalaya amxambë diˈib yajmoobyë jäˈäy, tmëminy näˈäganäˈäty tuˈugë artikulo diˈib xyëˈäjtypy: “Conversaciones con un testigo de Jehová”. ¿Tiko të pyëtsëmy? Myëduˈuk, yëˈë parë nimaytyakëm tijatyë Biiblyë tukniˈˈijxëp extëm mbäädë jäˈäy tˈoymyëdoy. Myëmajtsk, yëˈë parë nnijäˈäwëm wiˈix mbäädë jäˈäy ndukjaygyujkëm tsuj yajxon tijaty xyajtëˈëwëm (1 Peed. 3:15). ¿Wiˈix mbäät xypyudëjkëmë tyäˈädë artikulo?
2. ¿Wiˈix tuk pëky mbäät nyajtuˈunëmë tyäˈädë artikulo mä ngäjpxwäˈkxëm?
2 Xypyudëjkëm mä ngäjpxwäˈkxëm. Oy ko nbëjkëˈkëmë La Atalaya diˈib myëmiimbyë tyäˈädë artikulo parë jäˈäy nmoˈoyëm o mëët ngäjpxëm. Pes mä territooryë mbäät ti jäˈäy tjëjpkugäjpxë o ja diˈib tsyojkënyëˈajtypyë Diosë yˈayuk ets diˈib nyaˈëxpëjkëm mbäät ti xyajtëˈëwëm extëm të pyëtsëmy mä tyäˈädë artikulo. Pën kyaj ti nmëdäjtëm, mbäät nyajjënäjkëm mä Internet jw.org.
3. ¿Wiˈix mbäädë tyäˈädë artikulo nimaytyakëm mëdë jäˈäy?
3 ¿Wiˈix mbäädë tyäˈädë artikulo xynyimaytyaˈaky mëdë jäˈäy? Ta nmëguˈukˈäjtëm diˈib kyäjpxtëp mä ja Testiigë kyajpxy, ets ta net tˈanëëmëdë ja jäˈäy parë tkäjpxët ja tuk pëky. Oybyëtsëëmp ko duˈun yajtuny, pes mbäädë jäˈäy këˈëm tˈixy tijaty nmëbëjkëm ets kyaj axëëk nyajnayjäˈäwëm (Deut. 32:2).
4. ¿Wiˈix mbäät këˈëm naytyukpudëjkëmë tyäˈädë artikulo?
4 Mbäät këˈëm mbudëkëty ets xytyukpudëkë wiinkpë. Ko ngäjpxëmë tyäˈädë artikulo, nˈokˈijxëm diˈibë tekstë myëmiimpy, ti ijxpajtën yajtuumpy, wiˈix ja Testiigë dyajwinmay ja jäˈäy ets nanduˈun diˈibë ää ayuk yajtuumpy. Ta net duˈun xytyunët mä mgäjpxwaˈkxy (Prov. 1:5; 9:9). Tuˈugë nmëguˈukˈäjtëm jyënaˈany: “Ko ngäjpxëmë tyäˈädë artikulo, duˈunxyëp extëm nˈijxëm wiˈix ttuny tuˈugë oybyë prekursoor, diˈib xëmë nyijäˈäwëp wiˈix yˈatsowët”.
5. ¿Wiˈix mbäät ndukniˈˈijxëm ja diˈib nyaˈëxpëjkëm parë kyäjpxwäˈkxët?
5 Tyäˈädë artikulo nan xypyudëjkëm parë ndukniˈˈijxëm ja diˈib nyaˈëxpëjkëm wiˈix kyäjpxwäˈkxët. Mbäät mëët nduˈundakëm ets nˈanmäˈäyëm parë yëˈë ttunët diˈib tyuumpy ja Testiigë. Duˈuntsoo, ja diˈib nyaˈëxpëjkëm ttuundäˈägët wiˈix mbäät tnimaytyaˈagyë myëbëjkën wintsëˈkën myëët ets tsuj yajxon (Kol. 4:6). Tyäˈädë artikulo, yëˈë jatuˈugë tuumbajn diˈibë Jyobaa xymyoˈoyëm parë yajxon nduˈunëmë tyuunk (2 Tim. 4:5).