Jat wiˈix mas oy xytyunëdë Diosë tyuunk: niwinmayë wiˈix xyajtsondäˈägäˈänyë maytyaˈaky

¿Tiko jyëjpˈamëty? Yëˈko pën ja jäˈäy kyaj tˈoymyëdoy extëm ja maytyaˈaky nyajtsondakëm, mbäät netyë tjëjpkäjpxtuˈuty mä kyajnëm ndukmëtmaytyakëmë Diosë yˈayuk. Pääty mayë nmëguˈukˈäjtëm jyënäˈändë ko diˈib mas jëjpˈam mbäät nˈijxëm, yëˈë wiˈix ja maytyaˈaky nyajtsondakëm. Mä Wiˈix nduˈunëmë Diosë Tyuunk ets mä liibrë Razonamiento miimp wiˈix mbäät nyajtsondakëmë maytyaˈaky, per näˈäty kyaj kaˈpxy myiny parë këˈëm nˈijxëm wiˈix nˈakˈyajnëjkxäˈänëm. Per oyxyëp kaˈpxy jyamiimbë, mbäät nyajtëgäjtsëm o nmëtmaytyakëm ja jäˈäy extëm këˈëm të niwinmäˈäyëm. Parë jäˈäy tˈoymyëdowët, oy ko yajxon niwinmäˈäyëm wiˈix nyajtsondäˈägäˈänëm ja maytyaˈaky, ets kyaj jamnëm nwinmäˈäyëm ko nety ja jäˈäy xyˈatsoˈowëm (Prov. 15:28).

Wiˈix nduˈunëm:

Winˈix ti mnimaytyäˈägaampy diˈib miimp mä ja ëxpëjkpajn diˈib mgëyakaampy, diˈib mˈijxypy ko mbäädë jäˈäy tˈoymyëdoy.
Winmay yajxon wiˈix tim jawyiin ja jäˈäy xyˈanëëmëyaˈany ko nety të xykyäjpxpoˈkxy. Mbäät xyˈanëëmë extëm: “Päätyëts nminy yëˈko...”, “Mayë jäˈäy yëˈë myëmääy myëdäjtëbë...”, “Wiˈix mˈokwinmay...”. Niˈigyë yˈoybyëtsëmy ko nyajtsondakëm ja maytyaˈaky naa kon ets adëyë. Ta näägë nmëguˈukˈäjtëm diˈib jyäjttëp agëbajky wiˈix ja maytyaˈaky dyajtsondäˈägäˈändë.
Yajtëw ja jäˈäy wiˈix wyinmay parë nanduˈun kyäjpx myaytyäˈägët (Mat. 17:25). Per kyaj xyajtëwët diˈib tsip yˈatsoojëmbitëp, pes mbäät jap tmëmay tmëdäjy ja yˈamay jyotmay, ets nan kyaj xyajnayjawëdët ko kuanë yˈatsoojëmbitët.

Tiko duˈun xykyatuny mä tyäˈädë poˈo:

Ko mDiosˈawdatët mëdë mfamilyë, juudë tiempë parë nanduˈun xynyiwinmayët wiˈix ja maytyaˈaky xyajtsondäˈägäˈäny ko mnëjkxët käjpxwäˈkxpë, ta net xytyuundäˈägët.
Ko mgäjpxwäˈkxët mët tuˈugë nmëguˈukˈäjtëm, tukˈawanë wiˈix ja maytyaˈaky xyajtsondäˈägäˈäny (Prov. 27:17). Pën mˈijxypy ko ja jäˈäy kyaj tˈoymyëdoy, ta xyajtëgatsët.