¿Wiˈix mbäät nbudëjkëm pënaty kyaj oy lyetrëkäjpxtë?

1. ¿Tiko tsyiptaˈaky ndukniˈˈijxëmë tëyˈäjtënë diˈib yajpatp mä Biiblyë pënaty kyaj oy lyetrëkäjpxtë?

¹ Ta näägë jäˈäy diˈib jyaˈoymyëdoodëbë Diosë yˈayuk ko ndukmëtmaytyakëm, per kom kyaj oy lyetrëkäjpxtë, ta tjëjptsëˈëgëdë parë tkäjpxtëdë Biiblyë o wiinkpë liibrë. Pääty ko tim ogäˈän ninëjkxëm kyaj yˈoyëty nˈawäˈänëmë liibrë ¿Ti tëyˈäjtën tukniˈijxëbë Biiblyë? Per ¿wiˈix mbäät nbudëjkëm parë tnijawëdë Diosë yˈayuk? Min nˈokˈijxëm ti të ttundë nmëguˈukˈäjtëm diˈib jeky kujk Dios mëdundë, diˈib yajpattëp naxy iˈpx paˈis.

2. ¿Tijaty ëxpëjkpajn mbäät nyajtuˈunëm parë nbudëjkëmë jäˈäy diˈib kyaj oy lyetrëkajpxy?

² Pën ja jäˈäy diˈib nyaˈëxpëjkëm kyaj oy lyetrëkajpxy o kyaj ttimjaty, mbäät yëˈë nyajtuˈunëmë foyetë Mëdow ko Dios mmëgajpxyëty o Mëdow ko Dios mmëgajpxyëty ets mjukyˈatët winë xëë. Tuˈugë prekursoor diˈib Estados Unidos yëˈë jäˈäy tyukˈijxypyë tyäˈädë majtskpë foyetë, ta dyajtëy diˈib tsyojkënyëˈajtypy. Etsë Betel diˈib Kenia jyënaˈany ko tyäˈädë majtskpë ëxpëjkpajn mëjwiin kajaa tpudëkë jäˈäy, yëˈko jap África kyaj jäˈäy tmëdattë kostumbrë parë nyekykyäjpxtët, yëˈëjëty jyäjttëp tijaty ko jeˈeyë yajtukmëtmaytyäˈäktë ets kyaj extëm mayë jäˈäy nyaˈëxpëjkëm ko nyajtëˈëwëm ets yˈatsoojëmbitët. Parë tuˈugë jäˈäy diˈib të yˈëxpëky, mbäät kyaj tsyiptakxëty lyetrëkäjpxët ets tˈatsoojëmbitët tijaty nyajtëˈëwëm, per diˈib kyaj nëgoo të yˈëxpëky, mbäät tsyiptakxëty. Pën ja jäˈäy jyajtypy lyetrëkäjpxët wanaty, ta mayë nmëguˈukˈäjtëm dyajtundë foyetë Oybyë ayuk diˈib tsoˈomp mä Dios o Mijts mbäät mnaymyayëty mëdë Dios, o liibrë Maytyaˈaky diˈib miimp mä Biiblyë.

3. ¿Ti mbäät nˈijxëm parë yajxon nyaˈëxpëjkëm pënaty kyaj tjattë oy lyetrëkäjpxët?

³ Nˈokmëjkumäˈäyëm. Pënaty kyaj oy tjattë letrë, mbäät tsyoytyundë o wyinmaytyë ko kyaj ti tjattë. Pääty parë ndukniˈˈijxëm ja tëyˈäjtën, tsojkëp jawyiin nyajnayjäˈäwëm oy. Mayë jäˈäy diˈib kyaj tjattë letrë, kuwijˈyëty ets pojën tijaty tjattë. Pääty, nˈokwintsëˈkëm ets nˈokmëjˈijxëm (1 Peed. 3:15). Mas niˈigyë yˈëxpëkäˈänët ko tpëkëdë kuentë ko kyaj nanëgoobë jyot myëjää dyajtuny ets ko tam tnijawë ja tëyˈäjtën. Pääty, nˈokmëjkumäˈäyëm janääm jatsojk.

4. ¿Wiˈix mbäät nbudëjkëm pënaty kyaj oy lyetrëkäjpxtë parë jawyiin tˈixtët ti mëët nˈëxpëkäˈänëm?

⁴ Pën ja jäˈäy diˈib nyaˈëxpëjkëm tsiptakxëp lyetrëkäjpxët, nˈokˈanmäˈäyëm ets tnikäjpxët ti mëët nˈëxpëkäˈänëm. Näägë nmëguˈukˈäjtëm diˈib Sudáfrica yˈanmääytyëp ja diˈib yaˈëxpëjktëp parë pyudëkëdët tuˈugë jyiiky myëguˈuk o myëtnaymyaayëbë diˈib jyäjttëp yajxonë letrë. Jatuˈugë nmëguˈukˈäjtëm diˈib Gran Bretaña yëˈë myoobyë lyiibrë ja jäˈäy ets tkäjpxët tuk parrafo majtskë parrafo parë tpëkëdë kuentë ko pojënë yajpääty mä yaˈˈatsoojëmbity ko liibrë yaˈˈajäˈäy. Ets tuˈugë nmëguˈukˈäjtëm diˈib India yëˈë yˈanmaabyë jäˈäy ets tˈixët ja dibujë diˈib yˈëxpëkandëp ja tuk sëmään ets tpawinmayët myentrës tpääty ja xëë mä yˈëxpëkäˈändë.

5. ¿Wiˈix mbäät nyaˈijxëmë maˈkxtujkën ko jäˈäy nyaˈëxpëjkëm?

⁵ Nˈokmaˈkxtujkëm. Yëˈëyë nimaytyäˈäk diˈib jëjpˈam yajjaygyukëyäämp mä ja ëxpëjkpajn ets pudëkë ja jäˈäy parë yajxon tjaygyukët. Ko tim ogäˈän ninëjkxëm mbäät jeˈeyë mëët nmaytyakëm naa 10 o 15 minutë. Kyaj nëgoo kajaa mˈëxpëktët, mbäät jeˈeyë mëët xyˈëxpëktë tuk parrafo majtsk parrafo. Mëmaˈkxtuk ko oytyaˈagyë tkäjpxët. Mbäät ok ttunyë mëjää parë peˈtypy lyetrëkäjpxët ko niˈigyë kyëktëkëdë tsyojkën mä Jyobaa. Ets parë kyëktëkët, oy ko nwoˈojëm mä nduˈukmujkëm ko tim ogäˈän ninëjkxëm.

6. ¿Wiˈix mbäät tuˈugë jäˈäy nbudëjkëm parë tjatëdë letrë?

⁶ Ja diˈib myaˈëxpëjkypy mbäät mas tsojk wyimbety ko tjatët yajxon lyetrëkäjpxët (Sal. 1:1-3). Ko mayë nmëguˈukˈäjtëm yˈëxpëjktäˈäytyë mët ja jäˈäy, ta tˈëxpëktë foyetë Jat wiˈix mjäˈäyët ets mletrëkäjxët naa mëgoxk minutën. Pën ja diˈib myaˈëxpëjkypy mˈanmääyëp ko kyaj tˈokjatanë letrë, mbäät xypyudëkë ko xytyukmëtmaytyäˈägët tijaty kujk tjaty. Anëëmë ko Jyobaa pudëkëyanëp ko tˈaktunëdë myëjää (Prov. 16:3; 1 Fwank 5:14, 15). Näägë nmëguˈukˈäjtëm diˈib Gran Bretaña yˈanmääytyëp ja diˈib yaˈëxpëjktëp parë tpëjtäˈäktëdë wyinmäˈäny ets niˈigyë tijaty tjattët, extëmë abesedaaryë, tpäädët tuˈugë tekstë ets tkäjpxët, ets ok, mbäät tkäjpxtë ëxpëjkpajn diˈib wingëjxy miimp. Parë tuˈugë jäˈäy ndukniˈˈijxëm letrë, tsojkëp nbudëjkëm parë ttsojkënyëˈatët.

7. ¿Tiko jyëjpˈamëty etsë jäˈäy ndukniˈˈijxëmë tëyˈäjtënë diˈib kyaj oy lyetrëkajpxy?

⁷ Jyobaa kyaj tˈëxtijˈyë jäˈäy diˈib kyaj nëgoo të yˈëxpëky (Job 34:19). Yëˈë yˈijxypy wiˈix tmëdatyë jyot kyorasoon (1 Crón. 28:9). Pääty, nˈoktukniˈˈijxëmë tëyˈäjtën pënaty kyaj oy lyetrëkäjpxtë. Taaˈäjtp kanäk pëkyë ëxpëjkpajn diˈib mbäät nyajtuˈunëm. Ets ko tiempë nyaxët, mbäät mëët nˈëxpëjktsondakëmë liibrë ¿Ti tukniˈijxëbë Biiblyë? parë tjaygyukët këkpäät ja tëyˈäjtën diˈib yajpatp mä Biiblyë.