Jat wiˈix mas oy xytyunëdë Diosë tyuunk: ko mnayjëjpˈixëdët parë jatëgokë jäˈäy xynyijëmbitët

¿Tiko jyëjpˈamëty? Pën nbatëm tuˈugë jäˈäy diˈib yˈoymyëdoobyë Diosë yˈayuk, nnijëmbitäˈänëm jatëgok parë nyajxoˈkëm ja tëëm diˈib të nnipëm (1 Kor. 3:6). ¿Ti mbäät nduˈunëm? Mä nganayjëgäjpxëm, oy ko jäˈäy nyajtëˈëwëm näˈä mbäät jatëgok njëmbijtëm. Nan oy ko nˈanmäˈäyëm ti nˈatsoojëmbitäˈänëm ko nety jatëgok nnijëmbijtëm. Duˈun dyaˈitët wyinmäˈänyoty parë xyˈawijxëm. Pën ja yajtëˈëwën jap yaˈˈatsoojëmbity mä ja ëxpëjkpajn diˈib nnikakëm, mbäät ja jäˈäy tkajpxy. Kyaj tsyiptaˈaky parë jatëgok nnijëmbijtëm ko nety të tnijawë ti ndukmëtmaytyäˈägäˈänëm ets ko nety jawyiin të nˈëxpëjkëm. Ko jatëgok nnijëmbijtëm, mbäät nˈanmäˈäyëm ko yëˈë nˈatsoojëmbitäˈänëm ti ojts nyajtëˈëwëm ets nˈakˈyajnëjkxëm ja maytyaˈaky.

Wiˈix nduˈunëm:

Ko jawyiin nˈëxpëjkëm wiˈixë jäˈäy nmëtmaytyäˈägäˈänëm tëjkmdëjkm, nˈokwinmäˈäyëm ti nˈatsoojëmbitäˈänëm ko jatëgok nnijëmbijtëm. Nˈokwinˈijxëm tuˈugë yajtëˈëwën diˈib miimp mä ja ëxpëjkpajn diˈib ngëyakäˈänëm mä tadë xëë, o mä ja ëxpëjkpajn diˈib nyajtuˈunëm ko mëdë jäˈäy nˈëxpëjkëm. Ko jatëgok nnijëmbijtëm, ta ndukˈijxëm ja ëxpëjkpajn.
Ko xymyëtmaytyaktäˈäyët ja jäˈäy diˈib të tˈoymyëdoyë Diosë yˈayuk, anëëmë ko mjamëtmaytyäˈägaampy jatëgok parë xyˈatsoojëmbitäˈäny jatuˈugë yajtëˈëwën. Ta it lugäär mä jäˈäy kyaj tiempë tmëdattë ets kyaj ttunäˈändë kompromisë parë jatëgok ninëjkxëm. Pën duˈun, mbäät nˈanmäˈäyëm: “¿Myajpatp naa duˈun oorë? [Waˈan tˈatsoojëmbity.] Janaxäämbëts ja tuk sëmään yatsoo parë nimaytyakëm waanë [nigäjpx ti mnimaytyäˈägaampy]. Pën kyaj tiempë xymyëdaty, kyaj ti jotmay”.
Kuytyunë mˈayuk pën të xyˈanëëmë jäˈäy ti oorë xynyinëjkxäˈäny (Mat. 5:37). Ko nety të xynyijëmbity myëmajtskˈok, nayjëjpˈixëdë wiˈix xyˈanëëmëyaˈany parë jatëgok mjëmbitët.

Tiko duˈun xykyatuny mä tyäˈädë poˈo:

Ko xynyiˈëxpëkët wiˈixë jäˈäy xymyëtmaytyäˈägäˈäny, winmay ti mˈatsoojëmbitaampy ko jatëgok xynyinëjkxët. Tukmëtmaytyäˈäk ja mëguˈuk diˈib mëët mgäjpxwaˈkxy.