Nˈokpudëjkëmë jäˈäy diˈib wiints parë tˈixyˈatëdë Jyobaa
1. ¿Wiˈixë Jesus dyaˈijxë ko naytyukjotmaytyuunë jäˈäy diˈib wiints?
1 Jesus tamë nety tsyoˈonë Jericó ko majtskë wiints myëyaxkakë: “¡Wintsën, [...] paˈˈayoodëgëts ëëtsëty!”. Jesus määy täjpë nety, pes jeˈeyë nety yˈaktëgoyˈaty majtsk xëë tëgëk xëë parë yˈooganë. Per ta wyäˈkˈäˈäwë ets ojts tmëgajpxy ets dyaˈˈagëdaktë (Mat. 20:29-34). ¿Wiˈix mbäät nbaˈˈayoˈowëmë jäˈäy extëmë Jesus?
2. ¿Wiˈix mbäät nmëtmaytyakëmë jäˈäy diˈib wiints ko nbatëm nëˈääy tuˈääy?
2 Nˈokpudëjkëm. Ko nbatëm tuˈugë jäˈäy diˈib wiints, extëm nëˈääy tuˈääy, nˈokˈanmäˈäyëm pën ëtsäjtëm ets nˈokˈawäˈänëmë naybyudëkë. Tim jawyiin, mbäät tëgatsy wyinmay mä ëtsäjtëm, pes ta jäˈäy diˈib tuunëdëp axëëk. Per ko nˈijtëm ajiiky amëguˈuk ets naytyukjotmaytyuˈunëm, mbäät kyaj nyekytsyëˈëgë. Parë nˈijxëm ti naybyudëkë yajtëgoyˈajtypy, oy ko nyaˈijtëm winmäˈänyoty ko ta diˈib ijxp wanaty ets ta diˈib ninuˈun. Ko nety të nbudëjkëm, ta net nˈanmäˈäyëm ko yëˈë jäˈäy ndukniˈˈijxëmë Biiblyë. Ta net ndukwingugäjpxëmë tekstë extëmë Salmo 146:8 o Isaías 35:5, 6. Nan mbäät xypyudëkë parë xyajjënakëdë ëxpëjkpajn mä Internet jw.org diˈib mbäät tmëdooˈity. Ets pën kyajpxypyë braille, ta xyajtëwët pën tsyejpyë ëxpëjkpajn braille diˈib mbäät pyudëkëty parë niˈigyë tnijawëdë Biiblyë. Ets pën jamë kyomputadoorë diˈib myëdäjtypy tuˈugë programë diˈib kyajpxypyë letrë mä pantayë, mbäät pyudëkëtyë artikulo diˈib duˈun miimp mä jw.org etsë ëxpëjkpajn diˈib mbäät dyajjënaky mä formato (RTF). Per kyaj tukëˈëyë ëxpëjkpajn tmëminyë tyäˈädë majtskpë formato, jeˈeyë amxan ets mä ayuk diˈib niˈigyë yajkäjpxp abëtsemy nyaxwinyëdë. (Ixë rekuäädrë “Ko xypyudëkët tuˈugë jäˈäy diˈib wiints...”.)
3. ¿Wiˈix mbäät nˈëxtäˈäyëmë jäˈäy diˈib wiints mä territooryë?
3 Nˈokˈëxtäˈäyëmë jäˈäy diˈib wiints. Ko nëjkxëm käjpxwäˈkxpë tëjkmdëjkm kyaj nëgoo nbatëmë jäˈäy diˈib wiints, pes kyaj tmëtmaytyäˈägäˈändë diˈib miimp tyëjkˈagëˈëy diˈib kyaj tˈixyˈaty. Pääty, tsojkëp nduˈunëmë mëjää parë nˈëxtäˈäyëm ets nmëtmaytyakëm (Mat. 10:11). ¿Waˈan mëët nduˈunëm o nˈeskuelëˈäjtëm tuˈugë jäˈäy diˈib wiints? Pes nˈoktukmëtmaytyakëmë tëyˈäjtën. Pën mä territooryë jam tuˈugë eskuelë parë wiints, nˈokˈyajtëˈëwëm ja direktoor pën tsyejpy ets nmënëjkxëmë ëxpëjkpajn braille parë tpëjtäˈägët mä byibliotekë. ¿Mˈixyˈajtypy tuˈugë jäˈäy diˈib jamë jyiiky myëguˈuk diˈib wiints? ¿Jam mä mderritooryë tuˈugë organisasion diˈib pyudëjkëbë wiints o jam tuˈugë tëjk mä tsyëënëdë jäˈäy diˈib kyaj yˈoy myëkëty o diˈib wiints? Nˈoktukmëtmaytyakëm ja jyiiky myëguˈuk, ja diˈib tuump mä ja tëjk o ja direktoor diˈib mä eskuelë ko Jyobaa tyestiigëty nbudëkëyäˈänëmë jäˈäy diˈib wiints, ets ko nmëdäjtëmë ëxpëjkpajn braille ets diˈib mbäät tmëdoowˈittë. Nˈoktukˈijxëm mëdë Biiblyë ko Dios yaˈijxpëkaambyë jäˈäy diˈib wiints winë xëë winë tiempë. Nan mbäät ndukˈijxëmë bideo diˈib xyëˈäjtypy “No sé qué haría sin ella”, diˈib yajpatp mä jw.org. Tyäˈädë bideo yëˈë myaytyakypy tuˈugë nmëguˈukˈäjtëm diˈib wiints diˈib të pyudëkëty ko tmëdatyë Biiblyë braille. Ko nimaytyakëm tiko nˈëxtäˈäyëmë jäˈäy diˈib wiints, mbäät kyaj xytsyiptakxëm nbatëm.
4. ¿Ti xytyukniˈˈijxëmë yˈeksperiensyë Janet?
4 Janet, tuˈugë nmëguˈukˈäjtëm diˈib wiints, ojts nyijkxy mä tuˈugë tëjk mä tsyëënëdë jäˈäy diˈib wiints. Ta tyëjkë maytyakpë mët tuˈugë kiixy ets tˈanmääy: “Ko Jesus yˈijty yä Naxwiiny ojts dyaˈijxpëkyë wiints, duˈun dyaˈijxë ti tyukmëdunaampy niˈamukë jäˈäy diˈib wiints mä tiempë myiny kyëdaˈaky”. Ta net ojts tkäjpxtë Diˈibʉ Jatanʉp 21:3, 4, Janet ta ttukmëtmaytyaky wiˈixë Diosë yˈAnaˈam Kyutujkën dyaˈˈadëwäˈänyë tyäˈädë wandakën. Ja kiixy duˈunyë ojts wyëˈëmë, ta net jyënany: “Ninäˈänëmtsë nety duˈun tuˈugë wiints xykyaˈˈanëëmë. Mayë jäˈäy diˈib ijxtëp wyinmaytyë ko diˈib wiints, yëˈë kyumëdoopy ti të ttuny o ti të ttundë ja yˈaptëjk”. Janet ta ttuknigejxy mä correo electrónico parë pojënë tpäädët mä Internet ja liibrë ¿Ti tukniˈijxëbë Biiblyë? ets tyam, majtskˈok tˈëxpëktë Biiblyë mä tuˈukpë sëmään.
5. Oy tyam kyaj mbäät nyaˈijxpëjkëmë wiints, ¿wiˈix nëjkx ttukˈoyˈattë ko naytyukjotmaytyuˈunëm?
5 Ëtsäjtëm kyaj mbäät nyaˈijxpëjkëmë wiints extëm ttuunyë Jesus, per mbäät nbudëjkëm parë tnijawëdët ja tëyˈäjtën diˈib yajpatp mä Diosë yˈAyuk. Nan mbäät nbudëjkëm pënaty yajpattëp wiints mët ko Mëjkuˈu diˈib anaˈamp yä Naxwiiny yaˈitëdë kubiˈits kuˈook (2 Kor. 4:4). Ko netyë Jesus tsyoˈonë Jericó, ta dyaˈijxpëjky majtskë wiints mët ko tpaˈˈayooy (Mat. 20:34). Ko nanduˈun naytyukjotmaytyuˈunëmë jäˈäy diˈib wiints, ta nëjkx nbudëjkëm parë tˈixyˈattëdë Jyobaa diˈib yaˈijxpëkanëdëp ets diˈib mmoˈoyanëdëbë jukyˈäjtën winë xëë winë tiempë.