Nˈokˈyajtuˈunëm yajxonë liibrë ¿Ti tukniˈijxëbë Biiblyë?

Ko ja jäˈäy diˈib nyaˈëxpëjkëm tnijawë niˈigyë wiˈixë Biiblyë jyënaˈany ets tkuytyuny, ta dyajnigëxëˈëky ko tam kujkë Dios tmëwingony (Sal. 1:1-3). Pën nyajtuˈunëm yajxon tijaty myëmiimbyë tyäˈädë liibrë, nëjkxëp nbudëjkëm parë wyimbatët.

Yajtëˈëwën diˈib miimp mä tsyondaˈaky. Mä tsyondaˈaky tuˈuk tuˈugë kapitulo myinyë yajtëˈëwën diˈib yaˈˈatsoowëmbitäämp mä tadë kapitulo. Mbäät nyajtëˈëwëm ja jäˈäy parë niˈigyë tnijawëyäˈänët wiˈix yaˈˈatsoowëmbity. Nan mbäät xyˈanëëmë ets tnimaytyäˈägët wanaty. Per mbäät jam tuˈuk tëgatsy tˈatsoowëmbity, kyaj netyë xyˈanëëmët ko kyaj dyuˈunëty, pes mbäät yëˈë mbudëkëty parë xynyijawët ti diˈib mas oy mnimaytyäˈägëp ko nety mëët mˈëxpëktë (Prov. 16:23; 18:13).

Diˈib mëët kyaˈpxy. Pën ja diˈib nyaˈëxpëjkëm të tjaygyukë diˈib të ndukmëtmaytyakëm mä tuˈugë kapitulo, mbäät nˈanmäˈäyëm parë këˈëm tkäjpxët ja diˈib mëët kyaˈpxy. Ets ko jatëgok mëët nˈëxpëjkëm, mbäät tijaty nyajtëˈëwëm parë nˈijxëm pën të yajxon tjaygyukë. Per nan mbäät njuˈtëmë tiempë parë mëët ngäjpxtäˈäyëm o wanaty ndukmëtmaytyakëm. Mbäät ngäjpxëm ja parrafo ets kontiempë nwinmäˈäyëm tijaty nyajtëwäˈänëm.

Rekuäädrë mä yaˈˈajamyatsë. Ko jyëjpkëxy tuˈuk tuˈugë kapitulo, ta tmëminy tuˈugë rekuäädrë mä myiny wiˈix yaˈˈatsoowëmbity ja yajtëˈëwën diˈib miimp mä tsyondaˈaky ja kapitulo. Pën nˈajamyajtsëm mët ja jäˈäy diˈib nyaˈëxpëjkëm, ta nˈijxëm pën të tjaygyukë ets pën jyajtypy tnimaytyäˈägët. Ko nety mëët të ngäjpxëm ja rekuäädrë ets ja tekstë diˈib miimp, ta nˈanmäˈäyëm parë këˈëm tnimaytyäˈägët tiko tyëyˈäjtënëty extëm myiny mä rekuäädrë (Apos. 17:2, 3).