Tukxondäˈäk ko xykyäjpxwäˈkxëdë oybyë ayuk

¿Mtsiptakxëp näˈäty mnëjkxtët käjpxwäˈkxpë? Pën duˈun, kyaj myijtsëty jeˈeyë duˈun mjaty, nimay duˈun jyattë. Waˈan mët ko jäˈäy kyaj tmëdowäˈändë o mët ko axëëk xyˈatsoˈowëm, o waˈan xytsyiptakxëm nmëtmaytyakëm diˈib kyaj nˈixyˈäjtëm. Ko duˈun njäjtëm, yëˈë diˈibë kyaj jotkujk xyyajnayjäˈäwëm, per yëˈë nmëduˈunëm tuˈugë Dios diˈib jotkujk ets tsyojkypy parë nmëduˈunëm agujk jotkujk (Sal. 100:2; 1 Tim. 1:11, TNM). Min nˈokˈijxëm tëgëk pëky, tiko mbäät ndukxondakëm ko nëjkxëm käjpxwäˈkxpë.

Tuk pëky, yëˈko nimaytyakëmë ääw ayuk diˈib jotkujkmoopy. Mayë jäˈäy kyaj tˈawix tjëjpˈixtë jotkujkˈäjtën, mbäät njotkujkmoˈoyëm ko ndukmëtmaytyakëm ja oybyë ayuk diˈib nyimaytyakypyë Diosë Kyutujkën (Is. 52:7). Ëtsäjtëm, nan mbäät xyjotkujkmoˈoyëmë tyäˈädë oybyë ayuk. Pääty, mä nganëjkxëm käjpxwäˈkxpë, oy ko nbawinmäˈäyëm tijaty kunuˈkxën yajminaambyë Diosë yˈAnaˈam Kyutujkën.

Majtsk pëky, yëˈë ngäjpxwäˈkxëm diˈib mbäädë jäˈäy ttukˈoyˈattë ets parë oy yˈittët mëdë Dios, pes myastuttëbë axëëkpë kostumbrë ets mbäät jyukyˈattë winë xëëw (Is. 48:17, 18; Rom. 1:16). Mbäät nbawinmäˈäyëm ko ëtsäjtëm duˈun extëm tuˈugë jäˈäy diˈib yajnitsokp, ets oy nääk tkakupëktë, duˈunyëm nˈëxtäˈäyëm axtë ko nbatëm pënaty jantsy nitsoˈogandëp (Mat. 10:11-14).

Tëgëk pëkypyë yëˈë diˈib mas jëjpˈam: ngäjpxwäˈkxëm parë nyajmëjpëtsëˈëmëmë Jyobaa. Yëˈë yajtsobatypy mëjwiin kajaa tyäˈädë tuunk (Is. 43:10; Eb. 6:10). Ets mbäät nduˈunëm, pes yëˈë xymyoˈoyëmë yˈespiritë santë. Pääty nˈokmënuˈkxtakëm parë xymyoˈoyëmë xondakën diˈib yajkypyë Diosë myëjääw (Gal. 5:22). Mëdë Jyobaa nyaybyudëkë, mbäät ngäjpxwäˈkxëm amëk jotmëk (Apos. 4:31). Pääty, oy wiˈixë jäˈäy xyˈatsoˈowëm, duˈunyëm ndukxondäˈägäˈänëmë tyäˈädë tuunk diˈib të nyajtuknipëjkëm (Ezeq. 3:3).

KO NETY TË YAˈIJXTÄˈÄYË TYÄˈÄDË BIDEO WIˈIXËTS JATËGOK NDUKXONDAKY PARËTS NMËDUNËDË JYOBAA, TA YAˈˈATSOOWËMBITËDË TYÄˈÄDË YAJTËˈËWËN:

• ¿Tiko mbäät xëmë nˈëxpëjkëm oy kanäk oorë njakäjpxwäˈkxëm poˈoboˈo?

• ¿Wiˈix mbäät nbanëjkxëm ijxpajtënë María?

• ¿Näˈä tiempë xyjuuty parë xypyawinmayë Diosë yˈAyuk?

• ¿Ti diˈib mas mdukxondakypy ko mnëjkxy käjpxwäˈkxpë?