Diˈib nääk të nyayajtëwëdë

Ja jäˈäyˈäjtën diˈib yajnasmaytsyoˈowëp mä Gálatas 5:22, 23, ¿yëˈëyëdaa diˈib yajkypyë “Diosë myëjääw”?

Mä tyäˈädë tekstë, taxtujk pëky yajmaytyaˈagyë jäˈäyˈäjtën diˈib mbäät tmëdattë Dios mëduumbë. Jyënaˈany: “Yëˈë tëëm diˈib yajkypyë Diosë myëjääw yëˈë tsojkën, xondakën, jotkujkˈäjtën, maˈkxtujkën, oyjyaˈayˈäjtën, ajiikyˈat amëguˈukˈat, mëbëjkën, yuunkˈat naxypyˈat, nnayjëjpkuwijtsëm këˈëm”. Diosë myëjääw mbäät xypyudëjkëm parë nyajnigëxëˈkëmë oyatypyë jäˈäyˈäjtën ets kyaj yëˈëyëty diˈib yä të yajnigajpxy.

Min nˈokˈijxëm ti apostëlë Pablo kyujäˈäyë mä tkanigajpxynyëm ja jäˈäyˈäjtën diˈib yajkypyë Diosë myëjääw, yëˈë jyënany: “Wäˈäts nnijäˈäm wiˈix jyikyˈattë pënëty tyuundëp diˈibë nyiniˈx kyëbäjk wyinmäˈänyˈäjttëp: mëˈinduundëp, tyuundëp kyäjxtëp ja axëkˈäjtën, yˈatsojktëp, yˈawdäjttëp ja agojwinnaxëty, brujëˈäjttëp, naymyëtsipˈäjtëdëp, naywyinjëjp naywyingojtëdëp, amëˈäjtsyˈäjttëp, jotˈambëjktëp mët waanë tii, jeˈeyë nyaymyëjpëjtäˈägäˈänëdë, naywyäˈxëdëp kanäk peky, naymyëtsipˈäjtëdëp, naywyinnaxëjäˈädëp, amiˈikyjyaˈayˈäjttëp, kujëˈxpëˈäjttëp es pënëty tyuundëp [...] yëˈë axëktuˈunën” (Gal. 5:19-21). Ko Pablo jyënany “pënëty tyuundëp [...] yëˈë axëktuˈunën”, ta njaygyujkëm ko kyaj tmaytyaktääy ja “tuˈun käjpxën diˈib yä naxwiiny” extëm diˈib myaytyak mä Colosenses 3:5. Nanduˈun jyaty mët ja taxtujk pëkypyë jäˈäyˈäjtën diˈib nyasmaytsyoˈowë mä Gálatas 5:22, 23. Apostëlë Pablo, kyaj tmaytyaktääy ja jäˈäyˈäjtën diˈib mbäät nmëdäjtëm mët ko xypyudëjkëmë Diosë myëjääw.

Ets pääty duˈun njënäˈänëm ko nˈijxëm diˈibë Pablo nyasmaytsyoˈowë mä Gálatas mët extëm tnijäˈäyë ja Dios mëduumbëty diˈib Éfeso: “Pënëty yoˈoytyëp mä ja jäjën, oyjyaˈayëty yëˈë, wäˈäts es tëyˈäjtën jyikyˈattë” (Éfes. 5:8, 9). Extëm nˈijxëm, ja oyjyaˈayˈäjtën, ko wäˈäts njukyˈäjtëm ets tëyˈäjtën myëët, jam tsyoony “mä ja jäjën”, per nan yëˈë ja “tëëm diˈib yajkypyë Diosë myëjääw”.

Pablo nan tyukˈanaˈamë Timoteo tmëdatëdë tyäˈädë tëdujk pëkypyë jäˈäyˈäjtën ko tˈanmääy: “Jikyˈat mët ja tëyˈäjtën es extëmë Dios ttseky, mëdë mëbëjkën, mëdë tsojkën, mëdë maˈxtujkën, mëdë yuunkˈäjt naxypyëˈäjtën” (1 Tim. 6:11). Per yëˈëyë mëbëjkën, tsojkën etsë yuunkˈäjt naxypyˈäjtën diˈib miimp mä ja “tëëm diˈib yajkypyë Diosë myëjääw”. Timoteo tsojkëbë nety pyudëkëdët ja Diosë myëjääw parë dyajnigëxëˈëgët ja tëgëëkpë jäˈäyˈäjtën diˈibë Pablo myaytyak ko yˈanmääyë: “Jikyˈat mët ja tëyˈäjtën es extëmë Dios ttseky, [...] mëdë maˈxtujkën” (ijxkijpxyë mëdë Kolosʉ 3:12; 2 Peedrʉ 1:5-7).

Päätyë Gálatas 5:22, 23 kyaj tmaytyaktäˈäy tukëˈëyë jäˈäyˈäjtën diˈib mbäät tmëdattë Dios mëduumbë. Diosë myëjääw mbäät xypyudëjkëm parë nyajnigëxëˈkëm ja taxtujk pëkypyë jäˈäyˈäjtën “diˈib yajkypyë Diosë myëjääw”. Per taaˈäjtpnëmë jäˈäyˈäjtën diˈib mbäät xypyudëjkëm parë nDiosmëduˈunëm jantsy oy ets nbaduˈudëjkëm “ja jembyë jikyˈäjtën diˈibë Dios yajkoj” ko njukyˈäjtëm “wäˈäts es tëyˈäjtën mëët” (Éfes. 4:24).