Jyobaa yaˈijxëbë tsojkën, wijyˈäjtën etsë maˈkxtujkën ko oˈkpë dyajjukypyëkäˈäny

1. ¿Tiko Jyobaa ttsojky parë jyaˈˈatëdë jukyˈäjtën?

NUˈUNË Jyobaa yajpaty naytyuˈuk, ninäˈä kyanayjyäˈäwë mon tuk, nipënë nety tkayajtëgoyˈaty diˈib yaˈˈagujkˈat yajjotkujkˈatëdëp. Per tsyojk parë jyaˈˈatëdë jukyˈäjtën yä Naxwiiny ets jam tsäjpotm. Ets mët ko Jyobaa tmëdatyë tsojkën, ta tijaty ojts dyajkojtsondaˈaky (Sal. 36:9; 1 Fwank 4:19).

2. ¿Wiˈix nyayjyäˈäwë Jesus etsë anklëstëjk ko Jyobaa tijaty dyajkojtääy?

² Jyobaa, yëˈë tim jawyiin yajkojë yˈUˈunk, Jesus. Ta net mët yëˈëgyëjxmë Jesus ojts dyajkojy “tëgekyë diˈibë jam tsäjpotm es yä naxwiiny”, axtë ja miyonkˈambë anklës (Kol. 1:16). Jesus agujk jotkujk nyayjyäˈäwë ko ojts tpudëkë Tyeety (Prov. 8:30). Etsë anklëstëjk nan agujk jotkujk nyayjyäˈäwëdë ko tˈijxtë wiˈixë Jyobaa ojts dyajkojˈyë tsäjp etsë Nax mët ja pyudëjkëbë Jesus. ¿Wiˈixë nyayjyäˈäwëdë anklëstëjk? Biiblyë jyënaˈany ko yax jyojktë mëdë xondakën ets tmëjkumääytyë Dios, ets seguurë ko duˈunyëm ojts tmëjkumaytyë nuˈun tukëˈëyë ojts dyajkojy axtë ko tˈijxtë wiˈixë Jyobaa ojts dyajkojˈyë naxwinyëdë jäˈäy (Job 38:7; Prov. 8:31). Mä tukëˈëyë tijatyë Jyobaa yajkoj, nyigëxëˈëgyë tsyojkën etsë wyijyˈäjtën (Sal. 104:24; Rom. 1:20).

3. Extëm jyënaˈanyë 1 Korintʉ 15:21, 22, ¿ti nˈaxäjëyäˈänëm ko Jesus ojts xyjyuuybyëtsëˈëmëm?

³ Jyobaa tsyojk etsë naxwinyëdë jäˈäy jyukyˈattët winë xëëw winë tiempë mä ja lugäärë tsujpë diˈibë nety të dyajkojy. Per ko Adán mëdë Eva tmëbokytyuundë Jyobaa, ta kyaj mbäät nyekyjyukyˈäjttë winë xëëw. Ets ko ja tiempë tpaty, ta ojts yˈoˈknëdë ets nanduˈun ja yˈuˈunk yˈënäˈk (Rom. 5:12). ¿Ti net tyuunë Jyobaa? Netyë ojts tnigajpxy wiˈix dyaˈˈawäˈätspëtsëmäˈänyë naxwinyëdë jäˈäy (Gén. 3:15). Jyobaa, ta ttuknibëjtakë ko tkaxäˈänyë Jesus parë tjuuybyëtsëmët ja yˈuˈunk yˈënäˈkë Adán mëdë Eva mä ja poky kaytyey ets mä ja oˈkën. Duˈuntsoo, mbäädë nety tuˈuk tuˈugë jäˈäy tmoˈoy ja jukyˈäjtënë winë xëëbë diˈib wyinˈijxypy myëdunäˈänyëty (Fwank 3:16; Rom. 6:23; käjpxë 1 Korintʉ 15:21, 22).

4. ¿Ti nˈixäˈänëm mä tyäˈädë artikulo?

⁴ Ko Jyobaa të twandaˈaky dyajjukypyëkäˈänyë oˈkpë, ta net tijaty nnayajtëˈëwëm. Extëm, ¿wiˈix jyukypyëkäˈändë?, ¿nëjkxëbëdaa nˈëxkäjpëm ja jiiky mëguˈuk ko nety jyukypyëktë?, ¿tiko nëgooyë xyyajxondäˈägäˈänënë ko nety ja oˈkpë jyukypyëktë?, ets ko Jyobaa dyajjukypyëkäˈänyë oˈkpë, ¿ti xytyukniˈˈijxëm parë nyajtsobatëmë tsyojkën, wyijyˈäjtën etsë myaˈkxtujkën? Min nˈokˈijxëm.

¿WIˈIXËDAA JYUKYPYËKÄˈÄNDË OˈKPË?

5. ¿Tiko njënäˈänëm ko kyaj tuktonyë oˈkpë jyukypyëkäˈändë?

⁵ Mët yëˈëgyëjxmë Jesus, ta Jyobaa dyajjukypyëkäˈäny miyonkˈamë jäˈäy. Per kyaj tuktonyë pyëdëˈëgäˈändë. ¿Tiko? Yëˈko pën tuktonyë jyukypyëktë, ta pojën ja Naxwinyëdë yˈujtspatäˈäny. Ets yëˈko Jyobaa kyaj ety käjy tijaty ttuny. Yëˈë nyijäˈäwëp ko parë jäˈäy jyukyˈattët agujk jotkujk, tsojkëp ak tukniwits ak tuknimäˈkxë tijaty ttunët (1 Kor. 14:33). Ko Jyobaa mëdë Jesus dyaˈoˈoyëdë wanaty wanatyë tyäˈädë Naxwinyëdë mä mbäädë jäˈäy tsyëënëdë, yëˈë yajnigëxëˈkë wijyˈäjtën etsë maˈkxtujkën. Ets ko netyë Jesus yˈAneˈemy Tuk Mil Jëmëjt, nan yëˈë duˈumbë jäˈäyˈäjtën yajnigëxëˈëgaampy. Pes xypyudëkëyäˈänëm ninuˈunë nety të ntsokwëˈëmëm mä Armajedon parë niˈˈijxëm ja it lugäär mä nˈagëˈëjëyäˈän nˈaxäjëyäˈänëm pënaty jukypyëkandëp.

6. Extëm jyënaˈanyë Apostʉlʉty 24:15, ¿pënaty jukypyëkandëp?

⁶ Per diˈib mas jëjpˈam tyunandëp pënaty nety të tsyokwëˈëmdë mä Armajedon, yëˈë ttukniˈˈixëyäˈändë pënaty jukypyëkandëp ja Diosë yˈAnaˈam Kyutujkën ets nanduˈun tijaty nyiˈanaˈamëp. ¿Tiko jyëjpˈamëty ets duˈun yajtunët? Yëˈko nimaybyë diˈib pëdëˈëgandëp, yëˈë diˈibë Biiblyë tyijpy “diˈibë ijt kaˈoyjyaˈay” (käjpxë Apostʉlʉty 24:15). Tyäˈädë jäˈäyëty tsojkëp mëjwiin kajaa nyayajtëgatsëdët parë mbäät ttukˈoyˈattë ko Kristë jyuuybyëtsëëmëdë. Nˈokpawinmäˈäyëm nuˈunën nmëdatäˈänëmë tuunk parë ndukniˈˈijxëm miyonkˈamë jäˈäy ets tˈixyˈattëdë Jyobaa. ¿Nyaˈëxpëkäˈänëm niduˈuk niduˈugë jäˈäy extëm tyam nduˈunëm? ¿Yajkaxäˈänëm mä tuˈugë tuˈukmujkën parë jap nyajtukniˈˈijxëm wiˈix nyaˈëxpëjkëm pënatyë nety të jyukypyëktë? Parë nnijäˈäwëm, tsojkëp nmaˈkxtujkëm. Per diˈibën tëy nnijäˈäwëm, yëˈë ko nety jyëjpkëxy ja Tuk Mil Jëmëjtpë mä Jesus yˈAnaˈamäˈäny të nety ja naxwinyëdë tyuktuky “mëdë Jyobaa yˈëxpëjkën extëmë nëë dyajwindukyë mejny” (Is. 11:9). ¡Mëjwiin kajaa ndukxondäˈägäˈänëm tijaty ndunäˈänëm mä tyuˈuyoˈoy ja tuk mil jëmëjtpë!

7. Oknimaytyäˈäk tiko Dios mëduumbëty tjaygyukëyäˈändë ko nety dyaˈëxpëktë pënaty jukypyëjktëp.

⁷ Nuˈun tyuˈuyoˈoyaˈany ja tuk mil jëmëjtpë, tsojkëp niˈamukë Dios mëduumbë nyayajtëgatsëdët parë ttundët tijatyë Jyobaa tyukjotkëdakypy. Pääty ko nety nbudëjkëm pënaty të jyukypyëktë, njaygyukëyäˈänëm nuˈunën tsyiptäˈäganxëdë dyajtëgatstëdë jyot wyinmäˈäny, tjëjpkuwäˈägëdët ja tsojkën diˈib kyaj yˈoyëty ets jyukyˈattët extëmë Jyobaa ttukjotkëdaˈaky (1 Peed. 3:8). Seguurë ko tyäˈädë jäˈäyëty nan myëdunandëbë Jyobaa ko nety tˈixtë wiˈix niˈamukë ëtsäjtëm nyaˈijxëmë yujyˈat tudaˈakyˈat ets wiˈix nanduˈun nduˈunëmë mëjääw parë nnayajtëgäjtsëm ets njukyˈäjtëm extëmë Jyobaa ttukjotkëdaˈaky (Filip. 2:12).

¿NËJKXËBËDAA NˈËXKÄJPËM JA JIIKY MËGUˈUK KO NETY JYUKYPYËKTË?

8. ¿Tiko mbäät njënäˈänëm ko nˈëxkapäˈänëm ja jiiky mëguˈuk ko nety jyukypyëktë?

⁸ Taaˈäjtp kanäk pëky tiko njënäˈänëm ko nˈëxkapäˈänëm ja jiiky mëguˈuk ets ja mëtnaymyaayëbëty ko nety jyukypyëktë. Ets mbäät duˈun njënäˈänëm ko nˈijxëm wiˈixë Biiblyë tmaytyaˈaky jyukypyëjktë ja oˈkpë. Waˈanë Jyobaa myoˈoyäˈänëdë jembyë nyiniˈkx kyëbäjk extëmë nety yˈixˈattë mä kyaˈooktënëm ets duˈunyëm tmëdatäˈändë ja yˈääw yoˈkn ets ja jyot wyinmäˈäny. Nan nˈokjamyajtsëm ko Jesus yëˈë mëët ojts tˈijxkijpxyë oˈk tëgoˈoyën extëm ko jäˈäy myaˈay, ets ko dyajjukypyëkäˈäny duˈunxyëp extëm ko yajˈyuxy (Mat. 9:18, 24; Fwank 11:11-13). Ko tuˈugë jäˈäy myaˈaywyijy, kyaj ja wyiin jyëjp tyëgatsy, ja yˈääw yoˈkn ets duˈunyëm tjamyetsy tijaty të ttuny mä kyamanaxynyëm. Nˈokwinmäˈäyëm ja Lázaro, ko Jesus yajjukypyëjkë, ja nety të yˈijnë taxk xëëw määbë yˈooky ets tapë nety ogäˈän wyindëgooynyë. Per ko jyukypyejky, netyë ja myëgaˈaxëty yˈëxkäjpëdë ets seguurë ko Lázaro nan yˈëxkäjp ja myëgaˈaxëty (Fwank 11:38-44; 12:1, 2).

9. ¿Tiko kyaj pyëdëˈëgäˈändë wäˈätsjäˈäy pënaty jukypyëkandëp?

⁹ Jyobaa wyandakypy ko mä ja jembyë jukyˈäjtën, nipën kyajënäˈänäˈäny: “Pëjkëbëts” (Is. 33:24; Rom. 6:7). Pääty, ko netyë Dios dyajjukypyeky pënaty të yˈoˈknëdë, oy mëk ja nyiniˈkx kyëbäjk diˈib myëbëdëˈëgandëp. Per duˈunyëm pokyjyaˈay yajpäädäˈändë. Pes ko wäˈätsjäˈäy pyëdëˈëktët, kyaj nëjkx ja jyiiky myëguˈuk nyekyˈëxkapëdë. Mä nety tyuˈuyoˈoy ja Tuk Mil Jëmëjtpë mä Kristë yˈAneˈemy, ta wanaty wanaty njëmbitäˈänënë wäˈätsjäˈäy. Ko yˈabatët, ta Jesus jatëgok ttukëdëkëyaˈany ja Tyeetyë yˈAnaˈamën (1 Kor. 15:24-28; Diˈibʉ Jat. 20:1-3).

¿TIKO NËGOOYË XYYAJXONDÄˈÄGÄˈÄNËNË KO NETY JA OˈKPË JYUKYPYËKTË?

10. ¿Wiˈix nnayjyawëyäˈänëm ko nety ja oˈkpë jyukypyëktë?

¹⁰ Nˈokpawinmäˈäyëm wiˈix nnayjyawëyäˈänëm ko jatëgok nwinguˈijxëm ja jiiky mëguˈuk diˈib të yˈoˈknëdë. ¿Xiˈigäˈän xonäˈänëm? ¿Jëˈëyäˈän yäˈäxäˈänëm mëdë xondakën? ¿Nguyˈëwäˈän nguyyäˈäxäˈänëmë Jyobaa mët ko nëgooyë nety nxondakënë? Kyaj yajnijawë, per diˈibën tëy nnijäˈäwëm, yëˈë ko nëgooyë nëjkx ntsokäˈänënë Jyobaa mëdë Jesus mët ko nety të dyajjukypyëktë ja jiiky mëguˈuk.

11. Extëm jyënanyë Jesus mä Fwank 5:28, 29, ¿ti yajmoˈoyandëp pënatyë nety jukypyëjktëp pën myëmëdoowdëbë Dios?

¹¹ Nˈokpawinmäˈäyëm nanduˈun wiˈix agujk jotkujk nyayjyawëyäˈänëdë pënaty jukypyëjktëp ko nety dyajtëgäjtsnëdë jyukyˈäjtën ets tmëmëdoownëdë Dios. Pënatyë nety nayajtëgäjtsëdëp, ta nëjkx tpäättë ja jukyˈäjtën diˈib “winë xëë winë tiempë”, per pënaty kyaj tmëmëdowäˈändë Dios, kyaj yajkupëkäˈändë parë dyajmäˈättët ja myëguˈuktëjk mä nety yˈagujkˈat jyotkujkˈattë mä ja it lugäärë tsujpë (käjpxë Fwank 5:28, 29; Is. 65:20).

12. ¿Wiˈixë Jyobaa tkunuˈkxäˈäny niˈamukë pënatyë nety jukyˈäjttëp yä Naxwiiny?

¹² Ko nety njukyˈäjtënë mä të tyuundëkë Diosë yˈAnaˈam Kyutujkën, niˈamukë Dios mëduumbë tˈixäˈändë ko tëyˈäjtën extëm jyënaˈanyë Proverbios 10:22: “Jyobaa kyunuˈkxën yëˈë diˈib yajmëkjäˈäytyakp, ets yëˈë kyaj dyajminyë jäj jëmuˈumën”. Jyobaa xytyukpudëkëyäˈänëmë yˈespiritë santë parë nëjkx wanaty wanaty njäˈäyˈäjtëm extëmë Jesus ets njëmbijtënë wäˈätsjäˈäy (Fwank 13:15-17; Éfes. 4:23, 24). Nan wanaty wanaty jyëmbitanë oy mëk ja niniˈkx këbäjk ets nˈitäˈänënë mas oyjyaˈay. ¡Agujk jotkujk nëjkx njantsy nnayjyawëyäˈänëm! (Job 33:25). Per ¿wiˈixën tyam xypyudëjkëm ko nbawinmäˈäyëm jyukypyëkäˈändë oˈkpë?

NˈOKˈYAJTSOBATËM KO JYOBAA XYTSYOJKËM

13. Extëm jyënaˈanyë Salmo 139:1-4, ¿wiˈix xytyukˈijxëm ko Jyobaa xyˈixyˈäjtëm yajxon, ets wiˈix dyajnigëxëˈëky mä oˈkpë dyajjukypyëkäˈäny?

¹³ Extëm të nˈijxëm, ko netyë Jyobaa dyajjukypyeky pënaty të yˈook të tyëgoytyë, duˈun dyajpëdëˈëgäˈäny extëmë nety të jyaˈayˈattë ets tyukjamyajtstäˈäyandëp tijaty. Nˈokpawinmäˈäyëm tidënë tyäˈädë yˈandijpy. Komë Jyobaa nëgooyë xytsyojkënë niduˈuk niduˈuk, pyëjkypyë kuentë ti nwinmäˈäyëm, ti njäˈäwëm, ti ngäjpx nmaytyakëm ets ti nduˈunëm. Pääty, kooxyëp xyˈokˈyajjukypyëjkëm, kyaj nëjkx tsyiptakxëty parë tijaty xytyukjamyajtstäˈäyëm ets xyyajpëdëˈkëm extëmë nety njäˈäyˈäjtëm ets nwinmäˈäyëm. Ja rey David nyijäˈäwë ko Jyobaa wäˈäts xyˈixyˈäjtëm niduˈuk niduˈuk (käjpxë Salmo 139:1-4).b ¿Wiˈix nnayjyäˈäwëm ko Jyobaa xyˈixyˈäjtëm yajxon?

14. ¿Wiˈix mbäät nnayjyäˈäwëm ko Jyobaa yajxon xyˈixyˈäjtëm?

¹⁴ Ko nwinmäˈäyëm nuˈunënë Jyobaa xyˈixyˈäjtëm, oy ko nyaˈijtëm winmäˈänyoty ko pääty dyuˈunëty mët ko jyantsy nyaytyukjotmaytyunyëty mët ëtsäjtëm. ¿Tiko? Yëˈko nëgooyë xytsyojkënë ets xyyajtsobatëm niduˈuk niduˈuk. Yëˈë jyamyajtstaapy wiˈix të njäjt të ngëbajtëm mä jukyˈäjtën ets pääty duˈun njäˈäyˈäjtëm. Ko duˈun nnijäˈäwëm, ¿këdii agujk jotkujk xyyajnayjyäˈäwëm? Ninäˈä mbäät nganayjyäˈäwëm naytyuˈuk, pesë Jyobaa xëmë yajpääty mët ëtsäjtëm ets yˈijxy tyuumpy wiˈix mbäät xyˈokpudëjkëm (2 Crón. 16:9).

NˈOKˈYAJTSOBATËM JA WYIJYˈÄJTËNË JYOBAA

15. Ko oˈkpë jyukypyëkäˈändë, ¿wiˈixë Jyobaa dyajnigëxëˈëgyë wyijyˈäjtën?

¹⁵ Ko tuˈugë jäˈäy ttsëˈëgë oˈkën, mbäät pojënë myëtsip tyuktunyëty diˈib kyaj ttunët mët ko kyäjpxˈatsëˈëgëdët yaˈoogäˈänyëty. Etsë naxwinyëdë jäˈäy diˈibë Satanás këˈamˈäjtëp, yëˈë yajtuumbyë tyäˈädë tsëˈëgë parë tuˈugë jäˈäy tkëyakyë myëtnaymyaayëbë ets ttuktuny diˈib nyijäˈäwëp ko kyaj yˈoyëty. Per ëtsäjtëm, kyaj nyajtukˈatsëˈkëmë oˈkën. Pes nnijäˈäwëm ko pën xyyaˈoˈkëm ja nmëtsipˈäjtëm, Jyobaa xyyajjukypyëkäˈänëm (Diˈibʉ Jat. 2:10). Të winmäˈäny nbëjtakëm ko oy pën ti ttunët, nitii xykyatukmastuˈudäˈänëmë Jyobaa (Rom. 8:35-39). ¡Nëgooyë Jyobaa wyijyˈäjnë ko të ttuknibëjtäägë dyajjukypyëkäˈänyë oˈkpë! Ko duˈun nnijäˈäwëm, ta kyaj xykyäjpxˈatsëˈkëmë Satanásë jyaˈay ko xyyaˈoogäˈänëm mët ko kyaj nmëmëdowäˈänëm. Nan xyyajjotmëktakëm parë ninäˈä ngamastutëmë Jyobaa.

16. ¿Tijaty mbäät nnayajtëˈëwëm, ets ti yajnigëxëˈëgaampy extëmë nety nˈatsoowëmbijtëm?

¹⁶ Pën ja nmëtsipˈäjtëm xykyäjpxˈatsëˈkëm ko xyyaˈoogäˈänëm, ¿ijtëm seguurë ko Jyobaa mbäät xyyajjukypyëjkëm? Parë nnijäˈäwëm, oy ko nnayajtëˈëwëm: “¿Nyajnigëxëˈkypyëts ko ndukˈijxpejtypyëtsë Jyobaa tijatyëts ndunaampy tuˈuk tuˈugë xëëw oy kyamëjwiin kyakajaajëty?” (Luk. 16:10). “¿Nyajnigëxëˈkypyëts extëmëts njukyˈaty ko ijtpëts seguurë ko Jyobaa xymyoˈoyäämbëts tijatyëts nyajtëgoyˈajtypy pën nbëjtakypyëts jëjpˈamë yˈAnaˈam Kyutujkën?” (Mat. 6:31-33). Pën jënäˈänëm ko duˈun, yëˈë nety nyajnigëxëˈkëm ko ndukˈijxpajtëmë Jyobaa ets ko listë nyajpatëm parë nmëmadakëm oy ti jotmay nwinguwäˈkëm (Prov. 3:5, 6).

NˈOKKUˈËˈËW NˈOKKUKÄJPXËM KO JYOBAA MYAˈKXTUKY

17. 1) ¿Wiˈixë Jyobaa dyajnigëxëˈëgyë myaˈkxtujkën mä oˈkpë dyajjukypyëkäˈäny? 2) ¿Wiˈix mbäät nyajnigëxëˈkëm ko nmëjjäˈäw ngunuˈkxyjyäˈäwëm ko Jyobaa dyaˈixyëty myaˈkxtujkën?

¹⁷ Jyobaa të twinˈixy ja xëëw etsë oorë näˈä dyajjëjptëgoyaˈanyë tyäˈädë jukyˈäjtën (Mat. 24:36). Pääty, oy nuˈun tjayajjukypyëkäˈänyë oˈkpë, duˈunyëm myaˈkxtuky ets jaanëm duˈun ttunäˈäny ko nety ja tiempë ttukjäˈty (Job 14:14, 15). Yˈawijxy jyëjpˈijxypy parë ttukjäˈtëdë tyäˈädë tiempë mä oˈkpë dyajjukypyëkäˈäny (Fwank 5:28). Taaˈäjtp kanäk pëky tiko mbäät nguˈëˈëw ngukäjpxëm ko Jyobaa myaˈkxtuky. Extëm nˈokpëjtakëm, të nimayë tiempë nmëdäjtëm parë të njodëmbijtëm (2 Peed. 3:9). Jyobaa tsyojkypy parë niˈamukë jäˈäy jyukyˈattët winë xëëw winë tiempë. Pääty, nˈokˈyajnigëxëˈkëm ko nmëjjäˈäw ngunuˈkxyjyäˈäwëm ko Jyobaa xymyëmaˈkxtujkëm. ¿Wiˈix? Ko nduˈunëmë mëjääw axtë nuˈun nmadakëm parë nˈëxtäˈäyëm pënaty jënandëp ja “yˈääw jyot ko kyupëkandëp ja tëyˈäjtën parë jyukyˈattët winë xëëw” ets ko nbudëjkëm parë ttsoktëdë Jyobaa ets tmëdundët (Hech. 13:48, TNM). Duˈuntsoo, ta nëjkx nanduˈun ttukˈoyˈattë ko myaˈkxtukyë Jyobaa.

18. ¿Tiko yˈoyëty nyaˈijxëmë maˈkxtujkën?

¹⁸ Jyobaa xyjyaˈijxäˈänënë wäˈätsjäˈäy, per maˈkxtukäämp axtë koonëm yˈabatët tuk mil jëmëjt. Ets jaanëm nëjkx tmeˈkxy ja nbokyˈäjtëm. Pääty, nˈokpanëjkxëmë yˈijxpajtënë Jyobaa. ¿Wiˈix? Ko yëˈëyë nˈijxëm ja oybyë jäˈäyˈäjtën diˈib myëdäjttëbë nmëguˈukˈäjtëm ets ko nmëmaˈkxtujkëm. Min nˈokˈijxëmë yˈijxpajtën tuˈugë nmëguˈukˈäjtëm. Ja myëmëjjäˈäy yëˈë patë tuˈugë päˈäm mët ko nëgooyë tijaty tmëmääy tmëdäjnë, ets ta yoˈoybyojty reunyonk. Tyäˈädë nmëguˈukˈäjtëm jyënaˈany: “Tijatyëtsë nety të nduknibëjtäägëdë ndunäˈändë tuk familyë, duˈunyë tyëgooytyaay”. Perë tyäˈädë nmëguˈukˈäjtëm, duˈunyëm ttsojky ets tmëmaˈkxtujky ja myëmëjjäˈäy. Tyukˈijxpajtë Jyobaa ets ninäˈä kyaˈëxtëkëwaˈky. Ets duˈun extëmë Jyobaa, kyaj jamyë ja wyinmäˈäny tpëjtaky mä ja amay jotmay, yëˈë yˈijx ja oybyë jäˈäyˈäjtën diˈibë nety myëdäjtypy ja myëmëjjäˈäy. Yëˈë jyënaˈany: “Nmëmëjjäˈäyëts nëgooyë oy jyaˈayˈäjnë ets tyuumbyë mëjääw parë nyiwäˈätsyëtyë tyäˈädë päˈäm wanaty wanaty”. Extëm nˈijxëm, jëjpˈam nmëmaˈkxtujkëmë nfamilyëˈäjtëm o ja nmëguˈukˈäjtëm diˈib yajkëjx yajnaxtëbë amay jotmay.

19. ¿Ti net ndunäˈänëm?

¹⁹ Jesus mëdë anklëstëjk nëgooyë ojts ttukxondaknëdë ko Jyobaa ojts dyajkojˈyë Naxwinyëdë. Pääty, nˈokpawinmäˈäyëm wiˈix tjantsy tyukxondäˈägäˈändë ko tˈixtëdë tyäˈädë Naxwinyëdë të tyuktuky mëdë jäˈäy diˈib tsyojktëp ets myëduundëbë Jyobaa, diˈibë nety të jyëmbijnëdë wäˈätsjäˈäy. Nˈokpawinmäˈäyëm nanduˈun wiˈix tjantsy tyukxondäˈägäˈändë pënaty mëdë Jesus yˈanaˈamäˈändë ko nety tˈixtë wiˈixë naxwinyëdë jäˈäy ttukˈoyˈattë (Diˈibʉ Jat. 4:4, 9-11; 5:9, 10). Nˈokpawinmäˈäyëm nanduˈun wiˈix yˈixˈatäˈäny ja jukyˈäjtën ko nety xyyajjëˈëy xyyajˈyaxëm ja xondakën ets kyaj yëˈëjëty ja jäj jëmuˈumën. Ets ko nety nanduˈun të jyëgaktäˈäy ja yuu päˈäm, moˈon tujkën etsë oˈk tëgoˈoyën (Diˈibʉ Jat. 21:4). Per mientrës jyaˈtyë tyäˈädë tiempë, nˈokpanëjkxëmë yˈijxpajtënë Jyobaa ko dyajnigëxëˈëgyë tsyojkën, wyijyˈäjtën etsë myaˈkxtujkën. Ko duˈun nduˈunëm, ta agujk jotkujk nëjkx nyajpatëm oy ti amay jotmay nwinguwäˈkëm (Sant. 1:2-4). Mëjwiin kajaa nmëjjäˈäw ngunuˈkxyjyäˈäwëm ko Jyobaa të twandaˈaky “dyajjikypyëkäˈäny tëgekyë oˈkpë” (Apos. 24:15).